Read Achang YEREMIA 22 Bible Online

YEREMIA 22 - Achang bible

YEREMIA 22

¹YHENSAIN ngos lyis Dawi vnyau vshih, Yuda hwankti yhen mha loh las hwankti, nyah zau jens, Yerusalem bang lyis, YHENSAIN cha taiq goeus yvlyis gyo geh, oen taiq aq.

³Ngos, YHENSAIN namoq lyis lyi bos las jus zis kuot geh, oen tying toh. Mhuih zis xauh soeu lhyi nyang lyis mhuih soeu masyah khomp kat geh. Lvbaus lyis, chauhmuh chauhlo jens lyis ma jus khyvlyis vkuot goh, vzaiq goh. Haih gyingshang joqyos mas tswi ma bos soeu lhyi vsat goh.

⁴Namoq ngos tying toh zis jyoengh kuot lyis gas, Dawi dah vnyau vshih gas hwankti jens tsoq bweh das. Nyamoq yah dvgeh nyamoq dah zau jens eq, nyamoq dah dius jens eq hai hwankti yhen khyam khomh cho lhyingh yah, nyang ji las yoh tsoq suh lai das.

⁵Nghuot laus eq namoq ngos tyingtoh dang ma gyo lyis gas, haih hwankti yhen ka dyoq gyoh das oen ngos namoq lyis maukhi. Ngos, YHENSAIN taiq goeus.

⁶Ngah xiklyis Yuda hwankti yhen ka, yungh dah Gilead mau teh, Lebanon boms teh nghuot laus eq, ngos hauh yvlyis hank ma nyeis dah jyamhjyuklhyuk joqyos kuot das.

⁷Ngos hauh yvlyis mhont das bang nhang nyeis. Nyamoq gas nyamoq dah wuzung tsain chi lha namoq dah arit zains yungh lyis thoeuq las nyi mas tsain doeuh kat das.

⁸Hauh thang lhyi gohnyau bang nyoshoq suh lai las dvyuk yah dvyuk nyei goh das zis gas, Ngos YHENSAIN ka haih wusmuh lyis chamus heisoeh kuot au, ge das.

⁹Nyamoq phuk taiq das zis gas, Namoq gas, ngos namoq Mangso dah thanghchvp tyamp las gohtoeu mangso jens lyis paiq phuqsoe yvmvyah nghuot, ge.

¹⁰Yuda dius jens eh, hwankti Yosia xiklyis vngaus goh, nyang shei lha vkuk goh. Nghuot laus eq nyah lo Yoahaz xiklyis svsoh ngaus geh. Nyamoq gas nyang lyis shwih loh goeus khanhamp eq ma tauh los lo. Nyah choq thyet mau lyis khanhamp eq ma doms nyvng lo.

¹¹Nyah uwus Yosia shei lha Yuda hwankti bweh los Yoahaz yah sen lha YHENSAIN taiq. Nyang hei mhayah thuq loh goeus, nyang khanhamp eq ma tauh los lo.

¹²Nyang gas nyamoq shwih loh mau mas shei lha, haih mau lyis khanhamp eq ma doms nyvng lo das.

¹³Nyah yhen lhyi lyi ma jus khyvlyis tsuk las dang ma jings khyvlyis yhen jyeq kat. Nyah dius jens lyis mvgon shih zo, uhkung phauh ma dyei kuot soeu ka mvtanhzoe nghuot.

¹⁴Ngos ngah xiklyis yhen kuh dvyhen lhyi thoq tsank mas yvp lvm lvm tsain tsuk das ge soeu ka mvtanhzoe nghuot. Housoeh nyang gas yhen mha khomhbaiq phank, arit saiq mau, cheih nes yah cauh toh.

¹⁵Nvng arit saiq yhen tsuk lyis hauh zis nvng lyis hwankti zainsmuh bweh nhang lhyeh? Gohyhamh bang thoq lyis zes gis lhyeh? Nah uwus gas zo shuk las pyo khoq. Nyang gas lyi bos las dan khyvlyis kuot. Housoeh las nyang kuot cho dvnganh yvmas ung cho bos.

¹⁶Nyang gas shohjyen bang lyis dan khyvlyis soetuon yvmvyah nyeisgis yaplhoq. Hauh zis gas YHENSAIN lhyi seq, ge dah vjyuk nghuot.

¹⁷Nghuot laus eq nvng gas tyam lha vmyat lyis kyingh dvnyvng. Nvng tswi ma bos bang lyis sat, nah dius jens lyis lhuot zo zis yah zaiq ge, YHENSAIN taiq goeus.

¹⁸Housoeh las YHENSAIN ka Yosia lo Yuda hwankti Yehoiakim cho taiq. Nyang shei lha hank eq ma kuk das, nghuot ya ngah dyenschangh eh, kha iq gyuk chank bos, ge hank ma sang das. Nyah xiklyis hank ma ngaus das, Ngah yhensain eh, ngah hwankti eh, ge hank ma sang das.

¹⁹Nyang lyis Yerusalem wus khomh nghe pheh she thuq las mauhlyihzoe lyis nyhop teh nyhop das.

²⁰Yerusalem dius jens eh, namoq dah buisnoms jens dvnganh somh goeus las Lebanon mas loh las kaiq geh, Bashan mau mas loh las ngaus geh. Abarim boms masyah lui thuq kat geh.

²¹Nvng nyeisgis nyeis lyis YHENSAIN nvng lyis taiq goeus. Nghuot laus eq nvng gyo das zis ngoek. Houka nah kang dwis yoq gonh mas kuot los, nvng YHENSAIN domsyos khanhamp eq ma gyo.

²²Nvng kuot goeus dah ma gis cho gvng mas nah dah uhshe bang lyis lyeis yah muot tangh loh das. Nah dah buisnoms jens gas jes mas jons loh das. Nah dah wus jens eq xoqphuh das.

²³Lebanon boms masyah yoeus los dah arit saiq khyam yhen mas samlo no nyeis soeu eh, lokhoeu nos nos dah vmesbih teh nvng nos zis xauh lyis kha iq nhaiqnyen chank bos das lah?

²⁴YHENSAIN taiq zis gas, Yuda hwankti Yehoiakim lo hwankti Yehoiakhin eh, ngos jyoengh dwis nyeis Mangso nghuot zis yah dvyhangteh, nvng gas ngah loqyos loq mas dah kyihau loqkyop nghuot ku laus eq, ngos nvng lyis khyuot tyamp das.

²⁵Ngos nvng lyis, nvng lyis sat mes bang, nvng gyuk nyeis bang lyis dyei das. Babilon hwankti Nebukhaneza yahge nyah jeslo jens lyis dyei das.

²⁶Ngos nvng yahge nah ungwes lyis tsoengh jons loh nhang das. Nah metang hank eq ma khoeu dah mau mas loh das, aiq metang yah houmha shei das.

²⁷Namoq haih mau lyis doms nyvng mes laus eq khanhamp eq ma tauh los lo das.

²⁸Ngos taiq, Hwankti Yehoiakhin ka hank ma o lha doeuh tyamp dah jywang gwi teh bweh loh goeus. Nyang yahge nyah lo jens lyis nyamoq cha eq ma seq dah mau mas chamus shwih jons loh?

²⁹Maunyeis eh, maunyeis eh, maunyeis eh! YHENSAIN taiq yvlyis gyo aq.

³⁰Haih soeu lhyi nyah lo jens chithyuk das zis yahge khanhamp eq nyeisgis yap ma lhoq soeu nghuot ge dang thang thyet zis xauh. Nyang mas Yuda mau mas Dawi dah hwankti tank mas tsoq guon das zis vnyau vshih ma bos das. Ngos, YHENSAIN taiq goeus.