Read Achang YEREMIA 23 Bible Online

YEREMIA 23 - Achang bible

YEREMIA 23

¹Nyah dius jens lyis mhont las sanh tyo tyamp dah guon bang thoq mas YHENSAIN dah joeng cho ka kha iq gyuk chank bos lah?

²Heika YHENSAIN, Israel Mangso nyah dius jens lyis loqzamh zwi chah dah guon bang lyis taiq cho nghuot. Namoq gas ngah dius jens lyis loqzamh ma zwi. Namoq gas nyamoq lyis sanh tyo lha khat sanh tyamp. Namoq ma gis cho kuot gvng mas gvshih ngos namoq lyis joeng das.

³Ngos ngah dius jens lyis sanh tyo tyamp dah mau masyah nyet shih bang lyis tsainh yoeus las nyamoq dah yhen mau mas shwih tauh los das. Nyamoq mas lo jens nyoshoq jebais los das.

⁴Ngos nyamoq lyis loqzamh zwi das dah guon bang toh das. Ngah dius jens ma gyuk ma dvn lo das. Dvyuk eq ma dyuk das. Ngos, YHENSAIN taiq goeus.

⁵YHENSAIN taiq, Dawi dah vnyau vshih mas dan dah hwankti khyvlyis khyen das shishenh jweh los das. Hauh hwankti ka joeui bos bos guon las dvmau gonh dan las lyi jus zis kuot das.

⁶Nyang hwankti kuot uhlyis Yuda dius jens gas jesluiq das, Israel jens gas nyens nyens tap tap nyeis das. Nyang lyis, YHENSAIN ka yah dan cho nghuot, ge lui das.

⁷YHENSAIN heisoeh ge: Dius jens ngah nyings mas maukhi lhyi Israel jens lyis Egutu masyah shwih los dah YHENSAIN nyang nyeis zis yah dvyhangteh ge mau ma khi lo shishenh jweh los das.

⁸Hauh gungsthaiq Israel jens lyis mautsung mau yahge ngos nyamoq lyis sanh tyo dah gohtoeu mau dvnganh masyah shwih tauh los dah YHENSAIN nyang nyeis zis yah dvyhangteh ge ngah nyings yah maukhi das shishenh jweh los das. Housoeh nyamoq gas nyamoq nyang mau mas nyeis das.

⁹Ngah nhaiqlom thungh thyi loh las ngos nvn nyeis. YHENSAIN gvng mas, nyah gyingshang dang gvng mas ngos gas yhei yet soeu, zvbiq yoeu soeu teh nghuot.

¹⁰Hauh mau gas YHENSAIN lhyi lom ma luk bang dyingh joq. Nyamoq gas lhung dah kang dwis las nyamoq dah yomsoq lyis ma jus khyvlyis yhung. YHENSAIN nhoengh gvng mas hauh mau gas kuk las katjang eq tsain kyuk loh.

¹¹YHENSAIN taiq: Lvpe jens yahge phudyei bang gas mangso ma bos. Nyamoq Yhenmuh mas ma gis zis kuot yvlyis ngos nyvng goeus.

¹²Nyamoq chank dah cho ka cho jyot das, chuot das. Ngos nyamoq lyis khyeiuh thungh las lains nhang das. Ngos nyamoq thoq mas dyoqbis zainsmuh she kat das. Nyamoq lyis joeng das shishenh jweh los. Ngos, YHENSAIN taiq goeus.

¹³Samari mau mas dah lvpe jens dah yaunos lyis ngos nyvng goeus. Nyamoq gas Bala nyings yah taiq zis yah ngah dius jens lyis shwih whang loh.

¹⁴Ngos Yerusalem mas dah lvpe jens zes kuot yvlyis nyvng. Nyamoq gas nyi shuot las hwah. Nyamoq gas dius jens ma gis zis kuot das cho mha pangh. Housoeh las ma gis zis kuot masyah hank eq ma no. Ngah xikkhonh mas nyamoq dvnganh gas Sodom yahge Gomora mas bang teh ma gis.

¹⁵Housoeh las heika ngos Maukhung Jesphung YHENSAIN ka Yerusalem lvpe jens yah sen lha taiq zis nghuot. Ngos nyamoq lyis khoh dah vzains zo nhang lha nyonoq jeis shuk nhang das: khasoeh ge lyis nyamoq gas dvmau gonh mangso lhyi ma seq cho lhoeu nyhent goeus.

¹⁶Maukhung Jesphung YHENSAIN ka Yerusalem bang lyis taiq. Namoq lvpe jens taiq yvlyis vgyo goh. Nyamoq gas namoq lyis ma jus dah nghamhloms cho yah dvtyink dyei nyeis. Nyamoq gas nyamoq nghamh zis dvtaiq nyeis, ngos taiq zis ma nghuot.

¹⁷Ngos taiq zis gyo das xiklyis ngoek dah dius jens gas, Nyamoq jyank mas dvnganh gis das ge taiq nyeis shih. Nyamoq gas nhaiqlom than bang yuk khanghmuh lyis nyamoq mas dyoqbis zainsmuh khanhamp eq ma jweh das, ge taiq.

¹⁸Ngos taiq, Haih lvpe jens hank eq YHENSAIN dah nghamh cho khanhamp eq ma seq. Nyamoq mas hank khanhamp eq nyah loeus ma xauhgyo, ma seqgyo, nyang cha taiq zis gyo eq ma gyo, ma kamp gyo.

¹⁹YHENSAIN dah nhaiqyo zis gas lyeis jyang, than dah lyeis gas lhung bang dah uhloms thoq mas zangh das.

²⁰Hauh zis gas, nyang kuot das ge zis dvnganh ma dye kuot nyuk dvchank ma tam das Nyah dius jens gas haih zis bvng bvng seqgyo buisnyeis jweh los das.

²¹YHENSAIN taiq, Ngos haih lvpe jens lyis ma nhang laus eq nyamoq loh. Ngos nyamoq lyis loeus cha ma dyei laus eq nyamoq ngah nyings mas tsain pe.

²²Nyamoq ngos nghamh zis seq ya, nyamoq ngah dius jens lyis ngah loeus yoh taiq hoeuh las nyamoq dah ma gis cho kang dwis zis yahge nyamoq kuot dah lhung cho toh tyamp shoq yoh kuot das.

²³Ngos gas dvjoq mas kyingh ma nyeis, dvkhauyah nyeis dah Mangso nghuot.

²⁴Ngos ma yoh nyvng yvmas hank ma yoh tamh. Ngos gas maukhung yahge nyeisjvng mas dvkhauyah nyeis yvlyis nvng ma seq lhyeh?

²⁵Ngos ngah loeus hauh lvpe jens lyis yhetmoq masyah dyei ge, ngah nyings yoeus las hwah taiq hoeuh yvlyis ngos seq.

²⁶Nyamoq kuot taiq las hwah pe dah lvpe jens ngah dius jens lyis khanyhank jweh shoq shwih whang nyeis das lah?

²⁷Nyamoq taiq dah yhetmoq gas ngah dius jens ngos lyis nyah phauh thyeih moq ngos lyis tohnyhik las Bala shot pheh lhain loh teh kuot das ge nghamh.

²⁸Yhetmoq moq dah lvpe ka yhetmoq dvnghuot oen taiq chah. Nghuot laus eq ngah loeus xauhgyo dah lvpe ka hauh loeus lyis wontang taiq hoeuh chah. Huhyau yah sunghso ka dvyhangteh ma nghuot.

²⁹Ngah loeus gas nyi teh, luk bat thyi dah doeus teh nghuot.

³⁰Nyang changh taiq goh dah dang lyis yoeus las ngah loeus teh taiq hoeuh dah lvpe jens lyis ngos tyi.

³¹Nyamoq nyang dah dang taiq las ngah jyank masyah los ge taiq hoeuh dah lvpe jens lyis eq ngos tyi.

³²Ngos, YHENSAIN cha taiq zis gyo geh. Hwah cho yah dyingh dah nyamoq yhetmoq taiq dah lvpe jens lyis tyi. Nyamoq hau yhetmoq taiq las hwah, moengs zis yah ngah dius jens lyis shwih whang loh. Ngos nyamoq lyis ma nhang, nghuot ya loh geh oen vmingh ma dyei. Nyamoq gas dius jens lyis ma pangh jus. Ngos, YHENSAIN taiq goeus.

³³YHENSAIN ngos lyis taiq: Yeremia eh, ngah dius dvyuk yuk, lvpe, nghuot ya phudyei soeu ka nvng lyis, YHENSAIN loeus cha nghuot ge nyei lyis, nvng taiq das zis gas, Nvng gas YHENSAIN dah yvwons duot las nyang nvng lyis thyuk tyamp das, ge.

³⁴Ngah dius, lvpe, phudyei soeu dvyuk yuk, YHENSAIN dah yvwons, ge dah dang yhung lhyi yangh, ngos nyamoq yahge nyamoq dah yhenbang lyis joeng das.

³⁵Hauh gungsthaiq, nyamoq dvyuk dvyuk nyamoq dah dyenschangh yahge nyamoq dah buisnoms lyis, YHENSAIN khasoeh phuk dyei? YHENSAIN cha taiq, oen nyei chah.

³⁶Housoeh las nyamoq gas YHENSAIN dah yvwons ge dah dang ma gis sang lo. Khasoeh ge lyis dvyuk yuk sang lhyi ngos ngah loeus nyamoq dah yvwons gyingh kuot das. Dius jens gas nyamoq dah Mangso, Kang dwis Mangso, Maukhung Jesphung YHENSAIN dah dang masyah nungsdoms loh.

³⁷Lvpe jens nyei zis gas, Yeremia eh, YHENSAIN nvng lyis phuk taiq dang cha dyei? YHENSAIN cha taiq, ge.

³⁸Ngos tying dang domsyos ma gyo zis YHENSAIN dah yvwons ge dah dang taiq lyis nyamoq lyis taiq das zis gas,

³⁹ngos nyamoq lyis jyoengh yoeus las ngos yah we yvpheh doeuh tyamp das. Nyamoq eq nyamoq yahge nyamoq dah phauh thyeih moq lyis dyei toh dah wus eq ngah xikkhonh masyah doeuh tyamp das.

⁴⁰Ngos nyamoq thoq mas vcaiq vto xoqphuh cho she kat das las houka khanhamp eq ma yoh tohnyhik lo das.