Read Achang YEREMIA 25 Bible Online

YEREMIA 25 - Achang bible

YEREMIA 25

¹Yosia lo Yehoiakim Yuda hwankti bweh zis nyei vzvn lyis, Yuda jens dvnganh yah sen lha ngos YHENSAIN jyank masyah loeus xauh yoeus. Heika Babilon hwankti Nebukhaneza doq zis cangxeih vzvn nghuot.

²Ngos Yuda jens yahge Yerusalem bang dvnganh lyis taiq.

³Amon lo Yuda hwankti Yosia guon zis dvci somh vzvn masyah khvnyhik jweh shoq, aiqci somh zvn YHENSAIN ngos lyis jis las, hauh nyang taiq zis ngos namoq lyis ma taiq kyoh khanhamp eq ma kuot. Nghuot laus eq namoq ma gyo.

⁴Namoq ma gyo, ma kamp gyo. YHENSAIN ka nyah jyeidwis lvpe jens lyis tsoq nhang laus eq, namoq ma gyo.

⁵Nyamoq gas, namoq lyis namoq dah lhung cho kang dwis masyah, namoq kuot nyeis ma gis cho mhayah tauh los geh, housoeh lyis YHENSAIN namoq yahge namoq phauh thyeih moq lyis vcaiq vto dyei toh mau mas xauh nyeis loh das, ge taiq.

⁶Nyamoq gas namoq lyis gohtoeu mangso jens lyis vpaiq phuqsoe goh. Namoq kuot dah phvra lyis paiq zis yah YHENSAIN lhyi nhaiq vyo nhang goh. Namoq YHENSAIN dah domsyos gyo lyis nyang namoq lyis ma joeng das, ge taiq goeus.

⁷Nghuot laus eq YHENSAIN nyang taiq zis gas, nyah dang gyo das zis ngoek las hauh gungsthaiq nah phvra yah nyang lyis nhaiqyo nhang lha nah thoq mas nyah joeng cho nvnyang she los.

⁸Housoeh las Maukhung Jesphung YHENSAIN taiq zis gas, namoq nyah dang ma gyo yvmvyah,

⁹Ngos mautsung pheh dah dius nyau dvnganh lyis khi das. Babilon mas dah ngah jyeidwis hwankti Nebukhaneza lyis khi das, Yuda yahge houmha nyeis dyos bang, yhenkyoh dius nyau dvnganh lyis zan das zis ngos nyamoq lyis shwih los das. Ngos haih dius nyau yahge nyah yhenkyoh lyis mhont das las vcaiq vto thyoq khyoq toh das. Gyuk phoh dvn phoh kuot das.

¹⁰Ngos nyamoq dah gausyis kaiq thwe, gauslaus thwe, nyihwank pwe dah pyo thwe lhyi tsingtsam kuot das. Nyamoq nyibung xiklyis coeu ma yoh lo das, houmha jyo eq ma joq lo das.

¹¹Haih dvmau gonh gas dyoqgyoh joq las dvn phoh mus joq das. Yuda yahge yhenkyoh dius nyau jens gas Babilon hwankti lhyi nyhetci zvn phuqsoe das.

¹²Hauh thang lhyi ngos Babilon bang yahge nyah hwankti lhyi nyamoq yaunos gvng mas joeng das. Ngos hauh mau lyis mhont las vcaiq vto dyoq gyoh joq nhang das.

¹³Ngos dius nyau jens thoq mas she los das oen taiq kyuk dang Yeremia lyis yah taiq las haih maussauh buk mas lhaih comh toh dah dyoqbis zainsmuh dvnganh yah ngos Babilon bang lyis joeng das.

¹⁴Ngos Babilon bang lyis nyamoq kuot goeus yvlyis tauh dyei das. Dius nyau nyoshoq yahge kuhxing dah hwankti jens gas nyamoq lyis jons kuot das.

¹⁵YHENSAIN, Israel dah Mangso ngos lyis taiq: Heimha nhaiqyo cho yah dyingh dah zvbiq kom joq. Hauh zis yoeus las ngos nvng lyis nhang dah dius nyau dvnganh jyank mas loh las shuk nhang aq.

¹⁶Nyamoq hauh zis shuk lyis, ngos nyamoq yah tyi dah moeng zan cho nhang gvng mas nyamoq vtyi vkamh ma soh lo tsain yet das.

¹⁷Housoeh las ngos YHENSAIN loq masyah hauh kom yoeus las YHENSAIN ngos lyis nhang dah dius nyau dvnganh lyis shuk nhang.

¹⁸Yerusalem yahge Yuda wus jens dvnganh yah dvgeh nyamoq dah hwankti jens, uhshe bang dvnganh lyis houmha zis shuk nhang. Housoeh hauh zis gas sihyos, gyukphoh, dvn phoh tsain bweh joq. Housoeh nyamoq kuot nyeis zis yah dvyhangteh, dius jens gas nyamoq dah nyings yhung las nhoengh.

¹⁹Heika hauh kom mha xauh shuk dah gohyhamh bang dvnganh dah nyings nghuot. Egutu hwankti, nyah zau jens yahge uhshe bang, Egutu dius jens dvnganh yahge Egutu mas nyeis dah lvbaus dvnganh. Uza mau mas hwankti jens dvnganh; Ashkelon, Gaza, Ekron yahge Ashdod mas nyet shih bang ge Philisti wus jens mas dah hwankti jens dvnganh; Edom, Moab, Amon dius jens dvnganh; Taire yahge Sidon hwankti jens dvnganh; Mediteranean mau dah hwankti jens dvnganh; Dedan, Tema, Buz wus jens; Nyamoq dah cam lyung lyung thyet bang dvnganh; Arabia hwankti jens dvnganh; Sihsho yos mas nyeis bang dah hwankti jens dvnganh; Zimri, Elam yahge Media hwankti jens dvnganh; mautsung pheh ni mas we mas dvyuk thang lhyi dvyuk hwankti jens dvnganh; Nyeisjvng thoq mas dah dius nyau khanghmuh shuk chah. Thang thank lyis Babilon hwankti shuk das.

²⁷Hauh thang lhyi YHENSAIN ngos lyis taiq. Dius jens lyis taiq aq, Ngos, Maukhung Jesphung YHENSAIN, Israel Mangso ka nyamoq lyis yet shoq, duk shoq, lains las ma yoh toq lo shoq shuk nhang aq, ge vmingh dyei nyeis. Khasoeh ge lyis ngos nyamoq yah tyi lha moeng dyoq cho nhang kat.

²⁸Nyamoq nah loq masyah yoeus shuk das zis ngoek lyis, Nyamoq lyis shuk nyang shuk chah, ge Maukhung Jesphung YHENSAIN taiq oen aq.

²⁹Ngah thyoqpi muh lyis ngvnyang wus mas xi das. Nyamoq joeng zis ma xauh lai das ge nghamh lhyeh? ma nghuot, ngos nyamoq lyis xauh joeng das. Khasoeh ge lyis, ngos nyeisjvng thoq mas dius dvnganh thoq mas moeng dyoq nhang das. Ngos, Maukhung Jesphung YHENSAIN taiq goeus.

³⁰Yeremia eh, nvng ngos taiq goeus zis dvnganh taiq hoeuh chah. Nvng haih dius jens lyis taiq chah zis gas, YHENSAIN ka maukhung mhayah hoeu das, maukhung nyhang mhayah maujau jau das. Nyang nyah dius jens yah tyi lha zvbiq nang soeu kaiq teh kaiq das. Nyeisjvng thoq mas nyah thwe yuk khanghmuh xauhgyo das.

³¹Hauh thwe ka nyeisjvng goms shoq lvngtang toeuh das. YHENSAIN ka dius nyau jens yah tyi lha soe bos. Dius jens dvnganh lyis zaukauq jang mas shwih los das las lhung bang lyis shei nhang das. YHENSAIN taiq goeus.

³²Maukhung Jesphung YHENSAIN heisoeh ge: Dyoqbis zainsmuh gas dius nyau dvnyau thang lhyi dvnyau thoq mas jweh los nyeis. Lyeismuh jyang ka nyeisjvng we thank yvmas tsainh toh.

³³Hauh nyeih lyis YHENSAIN sat zis xauh dah mvng gas, nyeisjvng dvthang mha yah gohtoeu dvthang jweh shoq sanh joq das. Nyamoq xiklyis hank ma kuk das. Hauh yvlyis hank ma yoeus loh, hank ma nyhop das. Hauh zis gas tsoh mas jenh teh boms joq das.

³⁴Namoq uhshe bang eh, ngaus geh, yvng nghuot dah ngah dius jens lyis yoeuh bang namoq eh, kaiq ngaus geh, tsohmop mas lains loeu las kuk geh. Namoq lyis sat das shishenh jweh los. Namoq gas yvng lus jens lyis teh sat zis xauh das.

³⁵Namoq xiklyis phang luiq das cho ma bos.

³⁶YHENSAIN ka nyang nhaiqyo zis yah nah dius nyau lyis mhont las nah nyenstap mau lyis thyoq khyoq toh goeus yvmvyah shanghsenh yvmas ngaus las noskyingh geh.

³⁸Khangkhyi ka nyah khyung lhyi toh khoq teh YHENSAIN ka nyah dius jens lyis tyamp goeus. Gyukphoh moeng dyoq zis yahge YHENSAIN dah gyukphoh nhaiqyo cho ka hauh mau lyis jyamhjyuklhyuk kuot tyamp.