Read Achang YEREMIA 28 Bible Online

YEREMIA 28 - Achang bible

YEREMIA 28

¹Hauh vzvn, Zedekia hwankti guon zis nyei vzvn, oeng vkhyvp lyis, Gibeon mas dah Azur lo lvpe Hanania gas Yhenmuh mas phudyei bang yahge dius jens nyeis yvmas ngos lyis taiq.

²Maukhung Jesphung YHENSAIN, Israel Mangso taiq: Ngos Babilon hwankti dah yomsoq lyis khyauh goeus.

³Hwankti Nebukhaneza Babilon pheh yoeus loh dah Yhenmuh zisyos dvnganh lyis aiq zvn gyo lyis ngos haih joqyos mas doms chi tauh los das.

⁴Babilon pheh shwih jons loh dah Yuda hwankti Yehoiakim lo Yehoiakhin yah dvgeh Yuda dius jens dvnganh lyis eq shwih tauh los das. Nghuot goeus, ngos Babilon hwankti dah yomsoq lyis khyauh das. Ngos YHENSAIN taiq goeus ge, ge.

⁵Hauh thang lhyi phudyei bang yahge Yhenmuh mas yap joq bang dvnganh dah xikkhonh mas ngos lvpe Hanania lyis taiq.

⁶Mauhphoh nghuot! Ngos, YHENSAIN haih zis kuot dyei das oen nghamhloms. Nyang nvng pe cho bweh los nhang lha Yhenmuh mas dah zisyos yahge shwih jons loh bang dvnganh Babilon masyah shwih tauh los das oen svsoh nghamhloms.

⁷Nghuot laus eq ngos nvng yahge dius jens lyis cha taiq zis gyo geh.

⁸Nah shishenh, ngah shishenh dah xik pheh, gohlhain dah lvpe jens gas dius nyau nyoshoq yahge yomsoq bos dah munghdan jens mas moeng dyoq zis, phanghkhauq, yahge noslom jweh los das ge pe toh.

⁹Lvpe dvyuk, Nyenstap cho bos das ge pe mvbeh, hau nyang pe dang bweh los lyis nyang gas YHENSAIN nhang dah lvpe jyoengh nghuot cho yoh seq los das, ge.

¹⁰Housoeh Hanania gas ngah lainzain mas dah tanzoe lyis yoeus las kying kyop khyauh tyamp.

¹¹Hanania dius jens dvnganh xikkhonh mas taiq, YHENSAIN taiq, Heika dius nyau dvnganh dah lainzain mas hwankti Nebukhaneza kih dyei dah tanzoe lyis khasoeh khyauh das cho nghuot. Nyang aiq zvn gyo lyis kuot das, ge. Hauh thang lhyi ngos thuq loh.

¹²Dvyoq nyangh thang lhyi YHENSAIN ngos lyis taiq.

¹³Hanania lyis loh taiq aq. YHENSAIN heisoeh ge: Nvng saiq tanzoe yoh khyauh das laus eq nyang thyeq tanzoe doms toh das.

¹⁴Maukhung Jesphung YHENSAIN, Israel Mangso taiq, Nyang haih dius nyau jens lyis thyeq tanzoe kih dyei las nyamoq gas Babilon hwankti Nebukhaneza lyis phuqsoe das. YHENSAIN taiq: Yewus jens lyis yangh Nebukhaneza lyis phuqsoe nhang das.

¹⁵Hauh thang lhyi ngos Hanania lyis haih zis puk taiq. Hanania eh, gyo aq. YHENSAIN nvng lyis ma nhang, nvng gas haih dius jens lyis loms bas jungh ge hwah nyeis.

¹⁶Housoeh las YHENSAIN nyang heisoeh ge: ngos nvng lyis nyeisjvng thoq masyah shung tyamp das. Nvng dius jens lyis YHENSAIN dah cho gomloeus dang taiq yvmvyah nvng khvzvn ma thank lyis shei das, ge.

¹⁷Housoeh las Hanania gas hauh zvn, nyhet vkhyvp lyis shei.