Read Achang YEREMIA 31 Bible Online

YEREMIA 31 - Achang bible

YEREMIA 31

¹YHENSAIN taiq, Ngos gas Israel vkoq jens dah Mangso duot las nyamoq gas ngah dius jens duot das shishenh jweh los nyeis.

²Ngos sihyos mas, shei cho mhayah luiq los bang lyis nhaiqnyen cho chixoeuq. Israel jens no yoeus das zis omes lyis,

³ngos nyamoq lyis we masyah thuq xoeuq. Israel jens eh, ngos namoq lyis vjangh jyetdap, housoeh las ngos ma thank magons jyet cho namoq lyis tsoq chixoeuq.

⁴Ngos nvng lyis dvlhain doms kuot toh das las, nvng nah jyoeu yoeus nhont las gaus gaus yis yis dvlhain doms goh das.

⁵Nvng Samari boms mas zvbiq khyam dvlhain doms xauh tsungh das. Zvbiq Khyam tsungh bang gas hau zvbiq khyamh mha thuq zis xauh zo das.

⁶Nghuot goeus, Ephraim boms mas zungh bang yah, Zion boms, YHENSAIN, yah Mangso jyank mas doq loh goh, ge kaiq lui das shishenh jweh los nyeis.

⁷YHENSAIN taiq: Dius nyau jens mas kuhxing thank dah Israel xiklyis gausyis chunghthwe kat geh. Namoq chungh dah chunghthwe kat geh. YHENSAIN ka nyah dius jens lyis khyuot yoeus goeus. Nyet shih bang dvnganh lyis khyuot goeus.

⁸Ngos nyamoq lyis mautsung mau masyah shwih los das, nyeisjvng goms shoq mhayah eq tsainh los das. Nyamoq yah dvgeh nyoq jet soeu, khyeigyau soeu, vnoeuh gungs lyis chi dah vmesbih jens, lokhoeu bah ge dah vmesbih jens bos. Nyamoq dius nyau zainsmuh tauh los das.

⁹Ngah dius jens lyis ngos shwih los zis yah dvyhangteh ngaus zis yah eq shvmanh dung zis yah eq tauh los das. Ngos nyamoq lyis jeislo lvng mas shwih loh das, khyei-uh ma thungh, cho gis chank shwih das. Ngos gas Israel dah uwus teh nghuot las, Ephraim ka ngah lomons nghuot.

¹⁰YHENSAIN taiq, Dius nyau jens eh, ngah dang tsain gyo las, we dah thomh yvm mas ngah dang taiq hoeuh geh. Ngos ngah dius jens lyis sanh tyamp laus eq ngos nyamoq lyis tsainh las yvng yoeuh soeu ka nyah yvng jens lyis zungh teh zungh das.

¹¹Ngos Israel dius jens lyis phui kat las yombos dius nyau masyah khyuot yoeus.

¹²Nyamoq Zion boms mas gauslaus chunghthwe los kat das. Nyamoq ngah jyungshuk lyis gaus das. Houka jyo jyungshuk, zvbiq yahge tsanlun coeu, yvng jens noeu jens tsain nghuot. Nyamoq gas jeis vlhomuh sanh dah khyam teh nghuot las nyamoq chah zis dvnganh yoh das.

¹³Hauh uhlyis lonyi lo jens pyo pyo goh las, vbusbih jens loshang logis gauslaus das. Ngos nyamoq lyis nhaiqtaink das las, nyamoq dah ngaus zis lyis gauslaus cho pheh, nyamoq dah kuk cho lhyi gaus cho pheh lhaiq kat das.

¹⁴Ngos phudyei bang lyis gis thank zonoms yah jo nhang das. Ngah dius jens chah cho dvnganh lyis nhaiqtap nhang das. Ngos, YHENSAIN taiq goeus.

¹⁵YHENSAIN taiq, Rama mas thwe dvkoeuq xauhgyo. Kuk ngaus thwe nghuot. Rakhel ka nyah lo jens xiklyis ngaus nyeis, nyamoq ma nyeis lo las nhaiq ma yoh taink lo.

¹⁶Vngaus lo, nah nyoqdyeis buot tyamp aq. Namoq dah lo jens xiklyis kuot goeus zis dvnganh mas phauh ma shangh ma toh das. Nyamoq gas jeswus mau masyah tauh los das.

¹⁷Nah xiklyis thang pheh nghamhloms chank bos; nah lo jens gas yhen mha tauh los das. Ngos, YHENSAIN taiq goeus.

¹⁸Israel jens kuk zis yah taiq zis ngos xauhgyo: YHENSAIN eh, ngamoq gas ma pot shih dah gaunyhauq teh nghuot khoq laus eq, nvng ngamoq lyis domsyos gyo das zis jyauh. Ngamoq lyis shwih tauh los aq; ngamoq gas YHENSAIN, ngamoq dah Mangso jyank mas tauh los das zis cicont nghuot, ge.

¹⁹Ngamoq nah jyank masyah nungs phuk loh laus eq ma nyangh lyis ngamoq tauh los mes. Nvng ngamoq lyis joeng thang lhyi kuk zis yah ngamoq xoq gop joq. Ngamoq nyoqnho ngelang gyoh xoq. Khasoeh ge lyis ngamoq ngis yoq lyis yaunos kuot goeus.

²⁰Israel eh, nvng gas ngos jyet thank lo nghuot. Ngos nah nyings yoeus khanghmuh jyet zis yah soh. ngah nhaiqlom nah jyank mas jweh. Ngos nvng lyis nhaiqnyen das.

²¹Cho mha vlho cuk geh, chokhyoh jyih toh geh, namoq thuq loh cho lhyi doms xo geh Israel dius jens eh, tauh los geh, namoq thuq khoq dah wus jens, yhen pheh tauh los geh.

²²Ma lomsjingh dah dius jens eh, namoq khanyhank jweh shoq sheq nyeis das lah? Ngos vsaiq dvja gvnkhanh las vmesbih gas vbusbih lyis gomh teh shaih.

²³Maukhung Jesphung YHENSAIN, Israel Mangso taiq, Ngos dius jens lyis nyamoq dah mau lyis doms toeu lhyi, Yuda mau yahge nyah wus jens mas nyeis bang dvlhain doms taiq das: YHENSAIN nyeis dah gyingshang joqyos, Yerusalem mas dah gyingshang jing lyis Nyang shvmanh dyei bas jungh.

²⁴Dius jens gas Yuda mau yahge nyah wus jens dvnganh mas nyeis das, houmha yos zwi bang eq, yvng yoeuh bang eq nyamoq dah yvng phung yah dvgeh nyeis das.

²⁵Ngos nyungdaus bang lyis daus bi nhang das, yuot las yomnhuk bang dvnganh lyis zonoms yah nhaiqtap nhang das.

²⁶Housoeh las dius jens taiq das zis gas, Ngos yhet pyo las daus bi zis yah soh los, ge.

²⁷YHENSAIN taiq, Ngos Israel mau yahge Yuda mau mas dius yahge gaunyhauq yah tyink das shishenh jweh los nyeis.

²⁸Ngos nyamoq lyis khuot tyamp, lang khyoq, thyoq khyoq, mhont tyamp, thyoq tyamp das zis loqzamh zwi khoq teh nyamoq lyis doms tsungh das, doms toeu das zis loqzamh zwi das.

²⁹Hauh shishenh jweh lyis, dius jens gas, Nyhiphoq gas zvbiq shih jyen zo las lo jens gas zwis gyen ge ma sang lo das.

³⁰Hauh gungsthaiq, zvbiq shih jyen zo soeu khanghmuh nyah zwis gyen chah. Yuk khanghmuh nyah yaunos gvng mas nyang shei chah.

³¹YHENSAIN taiq, Ngos Israel dius jens yahge Yuda dius jens yah thanghchvp saiq toh das shishenh jweh los nyeis.

³²Hauh zis gas, Ngos nyamoq dah phauh thyeih moq lyis loq mas she lha Egutu masyah shwih los yoq lyis ngos nyamoq lyis dyei dah thanghchvp cauh teh ma nghuot das: ngos nyamoq dah yhensain phoq teh nghuot khoq laus eq nyamoq hauh thanghchvp lyis ma chank.

³³Ngos Israel dius jens yah toh das thanghchvp saiq gas haih zis nghuot das. Ngos ngah lyi nyamoq vkhau mha kat dyei das las hauh yvlyis nyamoq nhaiqlom mas lhaih toh das. Ngos gas nyamoq dah Mangso duot las nyamoq eq ngah dius duot das.

³⁴Nyamoq hank eq yhenkyoh lyis YHENSAIN lhyi seq das xiklyis ma jyauh lo noh: khasoeh ge lyis nyamoq ngis thank mas zis kuh thank jweh shoq, dvnganhmoq ngos lyis seq das. Ngos nyamoq dah yaunos lyis tohnyhik dyei las nyamoq dah shuot cho lhyi ma soh dyei lo das. Ngos, YHENSAIN taiq goeus.

³⁵YHENSAIN ka nyeih lyis bvng zis xiklyis buis, nyenh lyis bvng das nyhenshang lhamhmuh yahge kyi jens dyei toh. Nyang thomh lyis zes las hauh zis nyings huomh toh nhang. Nyah nyings Maukhung Jesphung YHENSAIN nghuot.

³⁶Nyang dangthoengh toh zis gas, hau soenghchoenk lyi joq dvchank Israel gas dius dvnyau joq das.

³⁷Dvnyeih buis lyis maukhung lhyi yoh keq las, nyeisjvng vpom lhyi yoh xo lhyi, ngos Israel dius jens lyis nyamoq kuot goeus cho dvnganh gvng mas nyang nyamoq lyis dvpeq tyamp das. YHENSAIN taiq goeus.

³⁸YHENSAIN taiq, Hananel tyoeuqzvm masyah buiswvng pheh Vthunk Khomh jweh shoq Yerusalem dvnganh lyis ngah wugungs khyvlyis doms ci das shishenh jweh los nyeis.

³⁹Hou mhayah wuskyo mvvs buiswvng pheh tsoq lang las Gareb jing jweh shoq loh. Hou mhayah Goa joqyos jweh shoq doms khuk los das.

⁴⁰Mvng nyhop las mhotkhyot yah dyingh dah langhkhau gonh, Kidron jeislo lvng dah maunyeis dvnganh, Buisthuq pheh Nyang khomh jweh shoq, ngah xiklyis gyingshang. Hauh wus lyis khanhamp eq ma doms thyoq khyoq lo, ma mhont lo, ge.