Read Achang YEREMIA 32 Bible Online

YEREMIA 32 - Achang bible

YEREMIA 32

¹Yuda hwankti Zedekia guon zis dvci vzvn, Babilon hwankti Nebukhaneza guon zis dvci xet vzvn lyis YHENSAIN ngos lyis taiq.

²Hauh shishenh lyis Babilon hwankti dah jesphung ka Yerusalem lyis zan nyeis. Ngos gas hwankti yhen khyam mha lhunk toh zis xauh nyeis.

³Hwankti Zedekia gas ngos lyis houmha lhunk las YHENSAIN taiq yvlyis taiq hoeuh las Babilon hwankti lyis haih wus los lhaink toh nhang, ge zau kauq goeus.

⁴Hwankti Zedekia eq ma phang luiq das. Nyang gas Babilon hwankti loq mas kyauh zis xauh las nyoqnho changh xauh nyvng goh das las nhuot tsuk xauh jisgoh das.

⁵Zedekia gas Babilon pheh shwih loh zis xauh las, nyang houmha ngos loh komh jweh shoq nyeis das. Nvng Babilon bang lyis zan laus eq ma ung das. Ngos, YHENSAIN taiq goeus.

⁶YHENSAIN ngos lyis taiq,

⁷Ngah phvthank Shalum lo Hanamel ka, Benyamin mau, Anathot mas nyah maunyeis dvchuq wis das cho ngos lyis los sang das. Khasoeh ge lyis ngos gas nyang yah ni thank boek nghuot las ngos hauh yvlyis wis das toeuh yoh soeu nghuot, ge das.

⁸Housoeh YHENSAIN taiq vgus Hanamel ka khyam khau mha jweh los las, ngos lyis hau maunyeis wis das xiklyis nyei. Housoeh las YHENSAIN ngos lyis jyoengh taiq yvlyis ngos seq.

⁹Ngos Hanamel jyank masyah yos wis las hauh phauh nyang lyis ngwis kyvp dvci nyhet koeuq laiq dyei.

¹⁰Ngos yos wis maussauh mas loqyos duon, kyihau tap, kanghjyoeng jens eq shwih las ngwis lyis jvng masyah laiq dyei.

¹¹Housoeh ngos gas kyihau dap dah yos wis maussauh yahge kyihau ma dap maussauh aiq koeuq yah yoeus las,

¹²Neria lo, Maseia nyeilo Baruk lyis kyauh. Ngos hauh zis nyang lyis Hanamel, yos wis maussauh mas kanghjyoeng loqyos duon bang, yhen khyam mha tsung toh bang dah xikkhonh mas dyei.

¹³Nyamoq dvnganhmoq xikkhonh mas ngos Baruk lyis taiq zis gas,

¹⁴Maukhung Jesphung YHENSAIN, Israel Mangso, nvng lyis haih yos wis las kyihau tap dah maussauh yahge kyihau ma dap maussauh aiq koeuq yah yoeus las jweh los das zvn nyoshoq mas yoh gomh shung toh das nyhenshang tsoh yam mas kat toh aq, ge vmingh dyei.

¹⁵Maukhung Jesphung YHENSAIN, Israel Mangso taiq: Haih mau mas yhen eq yos eq, zvbiq khyam eq doms xauh wis das.

¹⁶Ngos Neria lo Baruk lyis hau yos wis maussauh dyei thang lhyi shvmanh dung.

¹⁷Maukhung Jesphung YHENSAIN eh, Nvng nah yomsoq zainsmuh yahge nah yom yah maukhung nyeisjvng lyis kuot toh. Nah xiklyis svsoh yau zis cha ma bos.

¹⁸Nvng gas dius khyoengh mons lyis mathank magons jyetdap cho chixoeuq goeus, nghuot laus eq nvng dius jens lyis nyamoq nyhiphoq xiklyis joeng. Nvng gas kuhxing lha yomsoq bos dah Mangso nghuot: nvng gas Maukhung Jesphung YHENSAIN nghuot.

¹⁹Nvng gas joeui bos dah nghamh toeuq cho kuot las, muh zains kuot. Nvng dius jens kuot cho dvnganh nyvng las nvng nyamoq kuot zis yah dvyhangteh phauh shangh.

²⁰Nvng gohlhain Egutu mas yomsoq muh yahge mauh loqmuh kuot las khvnyhik jweh shoq eq tsoq las Israel jens mas eq, gohtoeu dius nyau jens mas kuot nyeis. Housoeh las gvshih nvng gas dvkhauyah nyings hoeuh nyeis.

²¹Nvng yomsoq muh yahge mauh loqmuh yah ngamoq dah jeswus lyis gyuk nhang lha nvng nah yomsoq yahge yom lyis yhung lha nah dius Israel lyis Egutu masyah shwih los.

²²Nyamoq dah phauh thyeih moq lyis dyei das ge dangthoengh toh zis yah dvyhangteh gis las nyeis coeu bos dah haih mau, nvng nyamoq lyis dyei.

²³Nghuot laus eq nyamoq haih mau lyis wvng sain nyeis uhlyis nyamoq nah tyingtoh dang lyis domsyos ma gyo, nghuot ya nvng jyauh khyvlyis kang ma dwis, nvng nyamoq lyis kuot aq ge vmingh dyei toh zis cha eq ma kuot. Housoeh las nvng nyamoq thoq mas haih thyoqpi cho dvnganh she los.

²⁴Babilon jens gas wus lyis yoeus das zis wus yvmlhaink mas gvduk doeu goeus. Nyamoq gas zan, moeng zan cho, phanghkhauq, yomh yah hauh wus nyamoq loq khau mha gyoh das. Namoq taiq zis dvnganh bweh los yvlyis namoq yoh nyvng das.

²⁵Yomzains YHENSAIN eh, wus gas Babilon bang yoeus bah ge goeus laus eq nvng gas ngos lyis kanghjyoeng jens dah xikkhonh mas maunyeis wis das cho vmingh dyei soeu nghuot.

²⁶Hauh thang lhyi YHENSAIN ngos lyis taiq.

²⁷Ngos gas YHENSAIN dius dvnganh dah Mangso nghuot. Ngah xiklyis nyo yau zis cha ma bos.

²⁸Housoeh las YHENSAIN taiq, Ngos jyoengh haih wus, Babilon hwankti Nebukhaneza yahge nyah jesphung lhyi dyei das; nyamoq hauh yvlyis yoeus tyamp das.

²⁹Haih wus lyis nyi ngheq das. Hau wus yah dvgeh yhenkhung thyoh mha Bala lyis xangh ngheq dyei, gohtoeu mangso jens lyis zvbiq jyungshuk huot zis yah ngos lyis nhaiq yo nhang dah yhen jens lyis ngheq das.

³⁰Israel jens yahge Yuda jens gas, loyvm yoq lyis yah ngos lyis nhaiq ma doeus nhang, nyamoq kuot zis yah ngos lyis nhaiqyo nhang.

³¹Haih wus mas dah dius jens gas haih wus kuot xi nyeih masyah ngos lyis nhaiqyo las phot phot tsoeu nhang. Ngos hauh yvlyis mhont das oen nghamh thyet goeus.

³²Khasoeh ge lyis Yuda jens yahge Yerusalem bang yah dvgeh nyamoq dah hwankti jens yahge uhshe bang, phudyei bang yahge lvpe jens gas ma gis dah muh tsain kuot goeus.

³³Ngos nyamoq lyis tsoq las jyauh nyeis laus eq nyamoq ma gyo, xuq eq ma xuq, ngos lyis nungs dvphuk khoq.

³⁴Nyamoq ngos lyis paiq das xiklyis tsuk toh dah Yhenmuh mas yangh nyamoq dah hoeng phoh phvra toh las hauh yvlyis vwot v-oeu kuot.

³⁵Molek mangso lyis nyamoq dah loloeu lonyi jens ngheq phudyei das xiklyis, Hinom langhkhau mha Bala phon tsain ci toh. Ngos nyamoq lyis hauh zis kuot das cho ma taiq toh. Nyamoq houteh zis kuot las Yuda jens lyis yaunos kuot nhang das zis ngah uhnuk mas yangh ma wvng los ku.

³⁶YHENSAIN, Israel Mangso ngos lyis taiq. Yeremia eh, dius jens gas moeng dyoq, phanghkhauq, yomh yah haih wus Babilon hwankti loq mas gyoh nhang das ge taiq nyeis. Gvshih ngos taiq chah shih zis gyo aq.

³⁷Ngos nyamoq lyis nhaiqyo, nhaiqlom tsoeu zis yah sanh tyamp dah mau dvnganh masyah tsainh das las nyamoq lyis haih joqyos mas shwih tauh los las heimha jesluiq shohluiq nyeis nhang das.

³⁸Nyamoq gas ngah dius, ngos gas nyamoq Mangso duot das.

³⁹Nyamoq nyang eq nyamoq dah vnyau vshih jens eq nyeisgis das xiklyis ngos lyis vjangh nyoqnho ngelang dyei das zis, ngos nyamoq kang dwis cho mha toeuqkhom dvkoeuq kyingh dyei das.

⁴⁰Ngos nyamoq yah vcaiq vto thanghchvp toh das. Ngos nyamoq xiklyis gis cho kuot das zis khanhamp eq ma no das. Nyamoq ngah jyank masyah khanhamp eq ma phanh loh bas jungh nyamoq nhaiqlom dvnganh yah ngos lyis gyukwoms nyeis nhang das.

⁴¹Ngos nyamoq xiklyis nyeisgis cho kuot dyei das zis pyo. Ngos nyamoq lyis haih mau mas vjangh nyeiscaink yapte nyeis nhang das.

⁴²Ngos haih dius jens thoq mas hai dyoqbis zainsmuh she kat vgus, ngos nyamoq lyis thoengh toh dah gis cho dvnganh she los dyei das.

⁴³Dius jens yah, Haih mau gas Babilon jens lyis dyei tyamp las, sihyos teh dius eq gaunyhauq eq ma nyeis joqyos nghuot goeus, ge. Nghuot laus eq haih mau mas yos doms xauh wis das.

⁴⁴Dius jens gas yos wis das, hau wis maussauh mas loqyos duon, kyihau tap, kanghjyoeng kat das. Heika Benyamin mau, Yerusalem vyvm vwi wukhau, Yuda wus jens, boms mau wus jens, jing khyei wus jens, yahge Yuda mautyi wus jens mas nghuot. Ngos dius jens lyis nyamoq mau mas doms toh das. Ngos, YHENSAIN taiq goeus.