Read Achang YEREMIA 33 Bible Online

YEREMIA 33 - Achang bible

YEREMIA 33

¹Ngos khyam khau thung mha lungh joq shih uhlyis YHENSAIN dah loeus ngah jyank mas doms jweh.

²Nyeisjvng lyis vzwvng kuot las nyah joqyos mas toh dah YHENSAIN, nyah nyings YHENSAIN ge soeu ngos lyis taiq.

³Ngos lyis lui aq, ngos nvng lyis toeuh das, hau nvng cha eq ma seq dah mauhphoh cho yahge yomzains muhzoh nvng lyis taiq das.

⁴YHENSAIN, Israel Mangso heisoeh ge. Yerusalem mas dah yhen jens yahge Yuda hwankti yhen ka thyoq khyoq zis xauh las hauh vthang ka lhaink las zan zis xauh das.

⁵Dvyhamh gas Babilon bang yah tyi lha zan das. Nyamoq gas ngos nhaiqyo, pot pot tsoeu lha zan khyoq dah mvng yah hauh joqyos mas tsain tyink das. Haih wus mas bang ma gis zis kuot goeus yvmvyah ngos haih wus lyis nungs phuk goeus.

⁶Nghuot laus eq ngos haih wus yahge nyah dius jens lyis gis los nhang lha yanghzan cho doms bos nhang das. Ngos nyamoq lyis nyenstap cho yahge jesluiq cho chixoeuq das.

⁷Yuda yahge Israel jens lyis nyeisgis yaplhoq nhang das. Nyamoq lyis xikpheh teh goeng goeng doms kuot das.

⁸Nyamoq ngos lyis tyi lha kuot cu dah yaunos lyis cheihshang dyei das. Ngos nyamoq yaunos yahge nyamoq dah gomloeus toq cho lhyi khyuot dyei das.

⁹Yerusalem gas ngos gauslaus das cho, chungh cho, khwank das cho bweh das. Nyeisjvng thoq dius nyau khanghmuh ngos Yerusalem bang lyis gis zis kuot dyei cho yahge hauh wus mas nyeisgis yaplhoq cho she los cho xauhgyo lyis nyamoq gyukwoms las nvn das.

¹⁰YHENSAIN taiq, Dius jens yah haih joqyos gas sihyos teh dius eq ma nyeis gaunyhauq eq ma nyeis, ge. Nyamoq taiq zis jus, Yuda wus jens, Yerusalem talhoeu vkom. Houmha dius eq ma nyeis, gaunyhauq eq ma nyeis. Nghuot laus eq haih joqyos mas namoq thwe doms xauhgyo das.

¹¹Gaus thwe, gauslaus thwe, nyihwank pwe dah pyo thwe xauhgyo das. Ngah Yhenmuh mas dius jens nhaiqshoqlang jyungshuk chi los zis yah nyamoq chunghthwe kat thwe xauhgyo das. Houka: Maukhung Jesphung YHENSAIN ka gis las nyah jyetdap cho vcaiq vto nghuot yvmvyah, Nyang lyis jyehjuh chungh geh, ge. Ngos haih mau lyis xikpheh vgus nyeisgis yaplhoq nhang das. Ngos, YHENSAIN taiq goeus.

¹²Maukhung Jesphung YHENSAIN taiq, Hai dius eq gaunyhauq eq ma nyeis, sihyos teh mau mas yvng yoeuh bang nyamoq dah yvng phung katjang dvlhain doms yoh kat das.

¹³Boms mau mas dah wus jens, jing khyei jens, Yuda mautyi pheh Benyamin mau mas Yerusalem vyvm vwi wukhau jens, Yuda wus jens mas yvng yoeuh bang gas nyamoq dah yvng jens lyis dvlhain doms suon das. Ngos, YHENSAIN taiq goeus.

¹⁴YHENSAIN taiq. Ngos Israel jens yahge Yuda jens yah toh dah dangthoengh tyink dyei das shishenh jweh los nyeis.

¹⁵Hauh shishenh lyis ngos Dawi vnyau vshih masyah dan dah hwankti lhyi khyen das. Hauh hwankti ka dvmau gonh jus zis yahge lyi bos khyvlyis kuot das.

¹⁶Yuda dius jens yahge Yerusalem bang lyis dan nhang lha jesluiq shohluiq nyeis das. Hauh wus lyis YHENSAIN ngamoq dah khyuot yoeus cho, ge lui das.

¹⁷Ngos YHENSAIN dangthoengh toh zis gas, Dawi dah vshih gas Israel dah hwankti vjangh duot das.

¹⁸Lewi vkoq masyah phudyei bang eq ngos lyis ngheq dyei jyungshuk, jyo jyungshuk, phudyei yah vjangh phuqsoe das.

¹⁹YHENSAIN ngos lyis taiq,

²⁰Ngos nyeih yahge nyenh lyis thanghchvp toh. Housoeh nyamoq gas vjangh nyah shishenh lyis los. Housoeh hau thanghchvp khanhamp eq ma yoh thyoq.

²¹Houyah dvyhangteh ngos ngah jyeidwis Dawi yah nyah vnyau vshih mas hwankti vjangh bos das oen thanghchvp kuot toh. Lewi vkoq mas dah phudyei bang eq vjangh ngos lyis phuqsoe das oen thanghchvp kuot toh. Hauh thanghchvp jens eq ma yoh dyoq das.

²²Ngos ngah jyeidwis Dawi dah vnyau vshih jens yahge Lewi vkoq masyah phudyei bang lyis je los nhang das. Housoeh houka maukhung mha kyi lhyi ma yoh suon teh thomh yvm mas sihsho lhyi ma yoh suon teh nghuot, ge.

²³YHENSAIN ngos lyis taiq,

²⁴Ngos khyen yoeus toh dah Israel yahge Yuda hai aiq yhenbang lyis peq tyamp goeus ge dius jens khasoeh taiq zis vsoh kat lah? Housoeh nyamoq gas ngah dius jens lyis xoqphuh nhang lha nyamoq lyis dius dvnyau ma suon lo.

²⁵Nghuot laus eq ngos YHENSAIN ka nyeih yahge nyenh yah thanghchvp kuot toh, maukhung nyeisjvng lyis joeu das lyi eq tsain kuot toh.

²⁶Ngos heisoeh nghuot goeus zis soh soh nghuot, Yakop dah vnyau vshih yahge ngah jyeidwis Dawi yah kuot toh dah thanghchvp lyis goeng nhang das. Ngos Dawi dah vnyau vshih masyah Abraham, Isak, Yakop dah vnyau vshih thoq mas guon das soeu dvyuk khyen das. Ngos ngah dius jens lyis nhaiqnyen das, nyamoq lyis nyeisgis yap doms lhoq nhang das.