Read Achang YEREMIA 35 Bible Online

YEREMIA 35 - Achang bible

YEREMIA 35

¹Yosia lo Yehoiakim Yuda hwankti kuot uhlyis, YHENSAIN ngos lyis taiq.

²Rekhab vhuh bang jyank mas loh jisgoh aq. Hauh thang lhyi nyamoq lyis Yhenmuh dvyvp yvp mas khi hwank las nyamoq lyis zvbiq gvmshuk aq, ge.

³Housoeh ngos gas Habazinia lo, gohtoeu Yeremia lo Yazania yahge nyah vmang Vnoeuh moq lo jens dvnganh yahge Rekhab vhuh dvyhen gonh lyis shwih las,

⁴Yhenmuh dah yhen khau, Igdalia lo, lvpe Hanan dah changlo jens yvp mas shwih toh. Haih yvp gas Yhenmuh mas yhaugyen dah zau, Shalum lo Maseia dah yvp vtoeu mas joq. Gohtoeu zau jens dah yvp vnvm mas eq nghuot.

⁵Hauh thang lhyi ngos gas hau Rekhab lo jens dah xikkhonh mas zvbiq yah dyingh dah khuq jens kom jens loh khyoq las, Zvbiq shuk geh, oen sang.

⁶Nghuot laus eq nyamoq toeuh zis gas, Ngamoq zvbiq ma shuk. Ngamoq phauh thyeih Rekhab lo Yonadab ngamoq lyis, Ngamoq eq ngamoq vnyau vshih jens eq, khanhamp eq zvbiq vshuk, ge taiq toh.

⁷Nyang ngamoq lyis, yhen vkuot, yos vzwi, zvbiq khyam vtsungh, nghuot ya vwis. Ge taiq toh. Ngamoq boenghwus teh nyeis dah haih mau mas gyoh nyeis bas jungh, vjangh yah zvng mas nyeis chah, ge eq tying toh.

⁸Ngamoq gas, Yonadab dyei toh dah shet cho dvnganh lyis domsyos gyo goeus. Ngamoq eq, ngamoq dah yhensain nyhiq jens, loloeu lonyi jens khanhamp eq zvbiq ma shuk.

⁹Ngamoq nyeis das yhen eq ma kuot, zvng mas dvnyeis. Ngamoq zvbiq khyam, yos, jyo ma sain. Ngamoq gas ngamoq dah phauh thyeih Yonadab tyingtoh zis dvnganh domsyos dyingh dyingh gyo.

¹¹Nghuot laus eq hwankti Nebukhaneza haih mau mas nyhenh wvng los uhlyis ngamoq gas Babilon yahge Siria jesphung lhyi phang das zis Yerusalem pheh loh das zis nghamh thyet goeus. Housoeh las ngamoq Yerusalem mas nyeis.

¹²Hauh thang lhyi Maukhung Jesphung YHENSAIN, Israel Mangso ngos lyis Yuda yahge Yerusalem bang jyank mas loh taiq aq. Ngos YHENSAIN, namoq lyis nyei, namoq ngah dang gyo das zis yahge ngos shet cho domsyos gyo das zis chamus ngoek.

¹⁴Yonadab dah vnyau vshih gas zvbiq vshuk ge tyingtoh yvlyis domsyos gyo las khvnyhik jweh shoq nyamoq hank eq zvbiq ma shuk. Nghuot laus eq ngos tsoq taiq nyeis yvlyis namoq ngah domsyos ma gyo.

¹⁵Ngos ngah jyeidwis dangcoq dvnganh lyis tsoq nhang kat las nyamoq gas namoq lyis namoq dah ma gis cho lhyi tyamp zis yah jus cho kuot das xiklyis taiq goeus. Nyamoq gas namoq lyis gohtoeu mangso jens lyis vpaiq phuqsoe goh. Housoeh lyis ngos namoq yahge namoq dah phauh thyeih moq lyis dyei toh mau mas xauh nyeis loh das ge zaih nhang. Nghuot laus eq namoq ma gyo, ma kamp gyo.

¹⁶Yonadab dah vnyau vshih jens gas nyamoq dah phauh thyeih moq nyamoq lyis dyei dah tyingtoh dang lyis domsyos gyo goeus. Nghuot laus eq namoq gas ngah domsyos ma gyo.

¹⁷Housoeh las gvshih ngos, Maukhung Jesphung YHENSAIN, Israel Mangso ka namoq Yuda mau bang yahge Yerusalem bang thoq mas ngos dangthoengh toh dah dyoqbis zainsmuh she kat das. Ngos namoq lyis taiq lyis namoq ma gyo, namoq lyis lui laus eq ma toeuh yvmvyah ngos haih zis kuot das.

¹⁸Hauh thang lhyi ngos Rekhab vhuh lyis Maukhung Jesphung YHENSAIN, Israel Mangso taiq zis taiq kyoh. Namoq gas namoq phauh thyeih Yonadab dyei toh tyingtoh dang domsyos gyo goeus. Nyang shet cho lhyi namoq chank las nyang tying toh cho dvnganh kuot goeus.

¹⁹Housoeh las ngos, Maukhung Jesphung YHENSAIN, Israel Mangso dangthoengh toh zis gas, Heisoeh Rekhab lo Yonadab vnyau vshih mas ngos lyis phuqsoe das vbusbih vjangh bos das, ge.