Read Achang YEREMIA 36 Bible Online

YEREMIA 36 - Achang bible

YEREMIA 36

¹Yosia lo Yehoiakim Yuda hwankti kuot zis nyei vzvn lyis YHENSAIN ngos lyis taiq.

²Sauhdain dvkoeuq yoeus las, ngos nvng lyis taiq goeus dah Yuda, Israel yahge dius nyau jens dvnganh dah cho lhaih toh aq. Yosia hwankti kuot.uhlyis ngos nvng lyis cangxeih taiq shishenh masyah gvshih jweh shoq zis dvnganh lhaih toh aq.

³Ngos Yuda dius jens thoq mas she los das oen toeuq dah dyoqbis cho nyamoq xauhgyo lyis nyamoq ma gis cho mhayah tauh los mvbeh. Housoeh lyis nyamoq dah lhung cho yahge nyamoq dah yaunos lyis khyuot dyei das, ge.

⁴Housoeh las ngos Neria lo Baruk lyis khi lha, YHENSAIN ngos lyis taiq zis dvnganh taiq. Baruk gas hauh zis dvnganh sauhdain mas lhaih toh.

⁵Hauh thang lhyi ngos Baruk lyis o mha dah taiq shet cho dyei. Ngos lyis Yhenmuh khau mha ma wvng nhang lo das.

⁶Nghuot laus eq thang lhain dius jens womkyi lhyi ngos nvng lyis houmha loh nhang mes. Nvng hauh sauhdain lyis than than nghap kyoh aq. Housoeh YHENSAIN ngos lyis taiq las ngos nvng lyis lhaih nhang zis dvnganh nyamoq xauhgyo das. Wus jens masyah los dah Yuda jens bos las yuk khanghmuh xauhgyo das yvmas nghap kyoh aq.

⁷Nyamoq YHENSAIN lhyi shvmanh dung las nyamoq dah ma gis cho mhayah tauh los mvbeh. Khasoeh ge lyis YHENSAIN ka haih dius jens lyis gyukphoh nhaiqyo, phot phot tsoeu zis yah kyuk goeus.

⁸Housoeh las Neria lo Baruk gas Yhenmuh mas YHENSAIN dang lyis ngos nyang lyis taiq vgus top nghap kyoh.

⁹Yehoiakim Yuda hwankti kuot zis oeng vzvn, gau vkhyvp lyis dius jens gas YHENSAIN nyoqzons doeus das xiklyis wom tsain kyi. Hau womkyi cho ka Yerusalem mas nyeis bang dvnganh, Yuda wus jens masyah los bang dvnganh nghuot.

¹⁰Housoeh dius jens dvnganh gyo nyeis lyis Baruk gas, ngos taiq toh zis dvnganh hau sauh dain masyah nghap kyoh. Nyang hauh yvlyis Yhenmuh khyam khau mha nghap kyoh. Nyang gas Shaphan lo Gemaria yvp mas nyeis. Gemaria gas hau yhen khyam mha dah lhaih comh soeu nghuot. Nyah yvp gas Yhenmuh khyam khau goq pheh Khomh Saiq nvm mas joq.

¹¹Gemaria lo, Shaphan nyeilo Mikhaia ka hauh sauhdain masyah Baruk nghap dah YHENSAIN taiq dang xauhgyo.

¹²Nyang hwankti yhen khau, lhaih soeu yvp mas wvng loh. Houmha hwankti dah lhaih comh soeu Elishama, Shemaia lo Delaia, Akbor lo Elnathan, Shaphan lo Gemaria, Hanania lo Zedekia yahge gohtoeu zau jens dvnganh nyeis.

¹³Mikhaia gas, dius jens lyis Baruk nghap kyoh dang nyang xauhgyo zis dvnganh zau jens lyis taiq kyoh.

¹⁴Housoeh zau jens gas, Nethania lo, Shelemia nyeilo, Khushi dah nyet Yehudi lyis yah Neria lo Baruk nyang dius jens lyis nghap kyoh dah sauhdain chi los aq ge taiq nhang. Housoeh las Baruk gas nyamoq jyank mas sauhdain chi los dyei.

¹⁵Nyamoq gas nyang lyis, Tsung lha, hauh sauhdain ngamoq lyis nghap kyoh aq, ge. Housoeh las Baruk nyamoq lyis nghap kyoh.

¹⁶Hauh zis dye nghap thang lyis nyamoq dvn zis yah dvyuk yah dvyuk yoeuh goh las Baruk lyis, Yang haih zis hwankti lhyi taiq kyoh chah, ge.

¹⁷Nyamoq Baruk lyis nyei zis gas, Gvshih nvng haih zis khasoeh lhaih los zis ngamoq lyis taiq kyoh aq. Yeremia nvng lyis lhaih nhang lhyeh, ge.

¹⁸Baruk phuk taiq zis gas, Yeremia nyang dang khonh khanghmuh taiq las ngos haih sauhdain mas lhaih cheih yah lhaih toh, ge.

¹⁹Zau jens Baruk lyis taiq zis gas, Nvng yahge Yeremia loh tamh chah. Nah aiq yuk khalhye nghuot zis hank lyis eq vseq nhang, ge.

²⁰Zau jens gas hauh sauhdain lyis lhaih soeu Elishama dah yvp mas kat toh lho lha hwankti yhen khyam mha loh las hwankti lhyi dvnganh taiq kyoh.

²¹Hwankti ka Yehudi lyis hau sauhdain yoeus los nhang. Nyang gas Elishama yvp masyah hauh zis yoeus las hwankti yahge nyah vyvm mas yap joq dah zau jens lyis nghap kyoh.

²²Houka cungh nghuot las hwankti ka cungh lyis nyeis yvp, nyikhyomp xik mas tsung toh.

²³Yehudi somh nyei kyoq dye nghap yah dvyih, hwankti ka hauh yvlyis shamthoh yah lhyamh las nyi mas doeuh kat, sauhdain jom shoq ngheq.

²⁴Nghuot laus eq hwankti eq hauh dang xauhgyo bang eq, nyah zau jens hank eq ma gyuk, kuk cho vlho eq ma chixoeuq.

²⁵Nghuot laus eq Elnathan, Delaia yahge Gemaria moq gas hwankti lhyi haih sauhdain ma ngheq das xiklyis shangphu laus eq nyamoq lyis ma kamp gyo dyei.

²⁶Housoeh hwankti ka, hwankti lo Yerame, Azriel lo Seraia yahge Abde lo Shelemia moq lyis yah ngos eq ngah lhaih soeu Baruk lyis eq nyhik das zis vmingh dyei laus eq YHENSAIN ka ngamoq lyis shung toh.

²⁷Hwankti Yehoiakim ka ngos Baruk lyis lhaih nhang dah sauhdain dye ngheq thang lhyi YHENSAIN ngos lyis taiq.

²⁸Nvng gohtoeu sauhdain yoeus las xik lyis dah sauhdain mas bos dang dvnganh lhaih toh aq.

²⁹YHENSAIN ngos lyis hwankti lhyi taiq aq. Nvng sauhdain ngheq las Yeremia lyis, Babilon hwankti ka haih mau lyis los mhont das. Nyah dius eq nyah gaunyhauq eq sat das oen chamus lhaih, ge nyei.

³⁰Housoeh las gvshih ngos YHENSAIN nvng hwankti Yehoiakim lhyi taiq. Nyah vnyau mas Dawi dah munghdan lyis khanhamp eq ma guon das. Nah mvng gas nyeih lyis buis mas lhap las nyenh lyis jyweh mas doeuh tyamp toh das.

³¹Ngos, nvng, nah vnyau vshih, nah zau jens lyis joeng das: khasoeh ge lyis namoq dvnganhmoq yaunos kuot goeus. Namoq eq, Yerusalem bang, Yuda jens ngos zaih nhang yvlyis ma kamp gyo las ngos namoq dvnganhmoq thoq mas ngos doengs toh dah dyoqbis zainsmuh she los das.

³²Hauh thang lhyi ngos gohtoeu sauhdain yoeus las ngah dah lhaih comh soeu Neria lo Baruk lyis dyei. Nyang eq ngos taiq zis dvnganh lhaih toh. Nyang xik lyis dah sauhdain mas bos dang dvnganh yahge houyah doeusgoh dah loeus ngos nyang lyis taiq kyoh vgus lhaih toh.