Read Achang YEREMIA 38 Bible Online

YEREMIA 38 - Achang bible

YEREMIA 38

¹Matan lo Shephatia, Pashur lo Gedalia, Shelemia lo Yukha yahge Malkhia lo Pashur moq gas ngos dius jens lyis taiq zis xauhgyo.

²Houka, YHENSAIN taiq: Wus mas nyeis bang gas moeng zan yvmas shei das, phanghkhauq yah, yomh yah shei das. Nghuot laus eq Babilon jyank pheh thuq las kyauh bang gas sat zis ma xauh das, nyamoq dah kang khvlangh phang luiq das.

³Ngos nyamoq lyis taiq shih zis gas, YHENSAIN heisoeh ge: Ngos haih wus lyis jyoengh Babilon jesphung lhyi dyei das las nyamoq hauh yvlyis yoeus tyamp das.

⁴Hauh thang lhyi zau jens hwankti lhyi loh taiq, Haih soeu lhyi sat chah. Nyang heiteh taiq gvng mas nyang haih wus mas dah jeslo jens lyis yomgyau nhang. Nyang wus mas nyet shih bang yuk khanghmuh lyis eq houyah dvyhangteh kuot. Nyang dius jens lyis ma pangh, nyang hauh bang lyis dvnos nhang mes, ge.

⁵Hwankti Zedekia toeuh zis gas, Gis, nyang lyis namoq kuot mes zis kuot geh; ngos namoq lyis ma yoh tomp, ge.

⁶Housoeh nyamoq ngos lyis shwih yoeus las, thung khyam khau, hwankti lo Malkhia dah dwanglungh mas twih yah xot khyoq kat toh. Hauh dwang gas jeis ma bos, thomhbop bos las ngos gas thomhbop mas nauh joq.

⁷Nghuot laus eq, hau hwankti yhen mha muh zwi, yhaugyen zau Unuk, Ethiopia dius Ebed Melek gas nyamoq ngos lyis dwanglungh mas khyoq toh cho xauhgyo. Hauh uhlyis hwankti ka Benyamin khyam khomh mas tsung toh.

⁸Housoeh Ebed Melek gas houmha loh las hwankti lhyi taiq.

⁹Ngah yhensain hwankti eh, haih dius jens kuot zis cu. Nyamoq Yeremia lyis dwanglungh mas khyoq kat toh goeus. Wus mas zonoms thank goeus las, nyang hauh dwang mas jyoengh yuot shei das, ge.

¹⁰Hauh thang lhyi Ebed Melek lyis hwankti vmingh dyei zis gas, Nyang yah vbusbih somh yuk shwih las ngos ma shei shih lyis ngos lyis dwang masyah toq yoeus aq, ge.

¹¹Housoeh las Ebed Melek gas vbusbih somh yuk yah hwankti yhen jyi mas mistyang seh loh yoeus las twih masyah ngah jyank mas khyoq kat dyei.

¹²Ebed Melek gas ngos lyis hauh mistyang seh ngah loqsanpom mha toh nhang, housoeh hauh twih gas ngos lyis ma nos nhang das, ge. Ngos eq housoeh kuot.

¹³Nyamoq ngos lyis dwanglungh masyah lang she thuq kat. Hauh thang lhyi ngos lyis khyam khau mha toh.

¹⁴Hauh thang lhyi hwankti Zedekia gas ngos lyis Yhenmuh vkhau somh vkhomh mas shwih los nhang lha taiq. Ngos nvng lyis dvja nyei bah, jyoeng zis taiq nhang mes, ge.

¹⁵Ngos phuk taiq zis gas, Ngos jyoeng zis taiq lyis nvng ngos lyis sat das, ngos nvng lyis joeui dyei lyis nvng ngah dang ma gyo das, ge.

¹⁶Housoeh las hwankti Zedekia ngos lyis dangthoengh gauh dyei. Ngos nvng lyis ma sat, nvng lyis sat mes bang loq mas eq ma kyauh das, oen yang lyis kang dyei Mangso, dwis nyeis Mangso mha maukhi.

¹⁷Housoeh las ngos Zedekia lyis Maukhung Jesphung YHENSAIN, Israel Mangso taiq zis taiq kyoh. Nvng Babilon zau jens lyis vsomh kham lhyi ka nah kang luiq das. Haih wus lyis eq ma ngheq das, nvng eq nah yhenbang eq kang luiq das.

¹⁸Nghuot laus eq nvng vsomh ma kham lhyi ka, haih wus Babilon jens lyis dyei tyamp das, nyamoq haih wus lyis nyi ngheq das, nvng eq nyamoq loq masyah ma dyons das, ge.

¹⁹Nghuot laus eq hwankti phuk taiq zis gas, Ngos Babilon jens shot pheh dap loh dah Yuda jens lyis gyuk. Ngos lyis nyamoq loq mas kyauh las ngos lyis shoeuhshih das mvbeh ge.

²⁰Ngos taiq, Nvng lyis nyamoq loq mas ma kyauh das, Mangso dah loeus lyis domsyos jenh gyo aq oen shangphu. Housoeh lyis nah xiklyis dvnganh gis das, nah kang eq luiq das.

²¹Nvng vsomh kham das zis ngoek lyis cha bweh das zis YHENSAIN ngos lyis nyoqnyvng mas chixoeuq.

²²Houmha Yuda hwankti yhen mha nyet shih dah vmesbih jens dvnganh lyis Babilon hwankti dah zau jens jyank mas shwih loh zis ngos nyvng. Nyamoq loh zoh lyis cha taiq yvlyis gyo geh. Hwankti dah dyenschangh kau jens nyang lyis cho shwih shuot. Nyamoq gas nyang lyis guon loh. Gvshih nyah khyei thomhbop mas nauh loh, nyah dyenschangh jens nyang lyis toh khoq goeus, ge.

²³Hauh thang lhyi ngos taiq lhungh shih zis gas, nah vmesbih jens yahge loshang jens dvnganh eq Babilon jens jyank mas shwih loh zis xauh das. Nvng eq nyamoq loq masyah ma dyons das. Nvng lyis Babilon hwankti yah jons loh das. Haih wus lyis nyi ngheq tyamp das, ge.

²⁴Zedekia phuk taiq zis gas, Haih taiqgoh cho hank lyis eq vseq nhang, nah kang eq jes ma bos das.

²⁵Ngos nvng yah jisgoh zis zau jens xauhgyo lyis, nyamoq yang cha taiqgoh zis nah jyank mas los nyei das. Nvng nyamoq lyis dvnganh taiq kyoh lyis nyamoq nvng lyis ma sat das ge dangthoengh toh das.

²⁶Nvng nyamoq lyis, Yonathan dah yhen thung mha vloh jenh shei nhang, oen ngos lyis dung dv oen aq, ge.

²⁷Hauh thang lhyi zau jens dvnganh gas ngos lyis los tsain nyei. Ngos eq nyamoq lyis hwankti taiq nhang vgus top taiq. Nyamoq cha ma yoh kuot lo: khasoeh ge lyis hau taiqgoh cho lhyi hank ma xauhgyo loh.

²⁸Ngos gas Yerusalem wus lyis zan yoeus loh buisnyeis jweh shoq hwankti yhen khyam thung mha toh zis xauh.