Read Achang YEREMIA 39 Bible Online

YEREMIA 39 - Achang bible

YEREMIA 39

¹Zedekia Yuda hwankti bweh zis gau vzvn, dvci vkhyvp lyis Babilon hwankti Nebukhaneza yahge nyah jesphung dvnganh gas Yerusalem lyis los lhaink toh.

²Zedekia hwankti guon zis dvci dvzvn, nyei vkhyvp, gau vnyeih lyis hauh wusciank lyis thyoq phank tyamp.

³Yerusalem lyis yoeus goeus ya Babilon hwankti dah zau zains jens gas, Vgungs khyam khomh mas joqyos los tsain yoeus. Houmha bos bang gas, Nergal Sharezer, Samgar Nebo, Sarsekhim yahge gohtoeu Nergal Sharezer tsain nghuot.[10]

⁴Cha bweh loh cho hwankti Zedekia yahge nyah jeslo jens nyvng lyis, nyamoq nyenh lyis wus masyah phang luiq shoq tsain yomkat. Nyamoq hwankti ban khyam chank wusciank aiq koeuq tsoq toh yvcho thuq las Yodan Langhkhau pheh phang loh.

⁵Nghuot laus eq Babilon jesphung nyamoq lyis chank khat las Zedekia lyis Yerikho nvm, pazoe mas xauh nyhik. Nyang lyis Hamat mau Ribla wus mas nyeis, hwankti Nebukhaneza jyank mas shwih loh. Nebukhaneza gas nyang lyis houmha soetuon.

⁶Nyang Ribla wus mas Zedekia loloeu jens lyis Zedekia yoeuh nyeis lyis sat. Yuda zau jens lyis eq sat.

⁷Hauh thang lhyi nyang Zedekia dah nyoqjeih chet tyamp dyei las shamjvng yah Babilon pheh twih she loh.

⁸Hauh gyo lyis Babilon jens gas hwankti yhen eq dius jens yhen eq ngheq, Yerusalem wusciank lyis thyoq khyoq.

⁹Thang thank lyis zungh bang dah zau Nebuzaradan gas wus mas nyet shih bang, nyah shot dap los goeus bang lyis Babilon pheh shwih jons loh.

¹⁰Nyang gas, Yuda mau mas zisyos ma yoh, nyungs thank bang dvyhamh lyis nyhet toh khoq. Nyang nyamoq lyis zvbiq khyam yahge yos dyei khoq.

¹¹Nghuot laus eq hwankti Nebukhaneza gas zungh bang dah zau Nebuzaradan lyis o mha dah vmingh dyei.

¹²Yeremia lyis loh xo lha nyang lyis vlhomuh yoeuh aq, nyang lyis vnos nhang, nyang o zis kuot dyei aq, ge.

¹³Housoeh las Nebuzaradan yah dvgeh zau zains Nebushazban, Nergal Sharezer yahge gohtoeu Babilon hwankti dah zau jens dvnganh gas,

¹⁴nyamoq ngos lyis hwankti yhen khyam mhayah shwih yoeus las, Ahikam lo, Shaphan dah nyeilo Gedalia loq mas kyauh toh. Nyang gas ngos yhen mha jesluiq shohluiq jweh los zis nyvng soeu nghuot. Housoeh ngos houmha dius jens yah dvgeh nyeis.

¹⁵Ngos hwankti yhen khyam mha lhunk toh zis xauh uhlyis YHENSAIN ngos lyis taiq.

¹⁶Ethiopia dius Ebed Melek lyis Maukhung Jesphung YHENSAIN, Israel Mangso heisoeh ge oen taiq aq. Ngos kuot das oen taiq goeus zis yah dvyhangteh haih wus mas gis cho ma kuot, dyoqbis cho she los das. Haih zis bweh uhlyis nvng houmha nyeis las nyvng das.

¹⁷Nghuot laus eq ngos YHENSAIN nvng lyis gos toh das. Nvng gyuk nyeis bang loq mas nvng lyis ma kyauh das.

¹⁸Ngos nvng lyis jesluiq nhang das las nvng sat zis ma xauh das. Nvng ngos lyis loms toh goeus yvmvyah, nah kang luiq das, Ngos YHENSAIN taiq goeus, ge.