Read Achang YEREMIA 40 Bible Online

YEREMIA 40 - Achang bible

YEREMIA 40

¹Zungh bang dah zau Nebuzaradan gas Babilon pheh shwih jons loh vvng dah Yerusalem wus yahge Yuda mau mas bang yah dvgeh ngos lyis shamjvng yah twih las Rama wus mas ngos lyis phui kat thang lhyi YHENSAIN ngos lyis taiq.

²Zungh bang dah zau ngos lyis khi lha taiq, YHENSAIN, nah Mangso ka haih mau lyis thyoqpi das ge kyuk toh.

³Nyang kuot das ge taiq toh zis gvshih kuot goeus. Namoq dius jens gas YHENSAIN lhyi tyi lha yaunos kuot, nyah domsyos ma gyo yvmvyah haih zis bweh goeus.

⁴Gvshih ngos nah loq mas dah shamjvng phui lha lhuiq kat dyei. Nvng ngos yah dvgeh Babilon pheh loh mes lyis chank los aq, ngos nvng lyis vlhomuh yoeuh das. Ngos yah ma mes chank lyis eq ma chank noh. Dvmau gonh mas nvng yoh khyen, nvng loh mes yvmas yoh loh, ge.

⁵Ngos ma phuk taiq shih lyis, Nebuzaradan taiq, Babilon hwankti yah Yuda wus jens mas mungh zau kuot nhang toh, Ahikam lo, Shaphan nyeilo, Ahikam lo Gedalia jyank mas tauh loh aq. Nvng nyang yah dvgeh dius jens mas nyeis aq. Nghuot ya, nvng nyeis chah oen nghamh yvmas khalhye laus eq dvnyeis noh. Hauh thang lhyi nyang ngos lyis jyungshuk yahge zonoms dvkhamh dyei las loh nhang.

⁶Ngos gas Mizpa wus mas Gedalia yah loh nyeis las hauh mau mas nyet shih bang mas nyeis.

⁷Yuda Zau jens dvyhamh yahge jeslo jens gas vsomh ma kham. Nyamoq gas Babilon hwankti ka Gedalia lyis mungh zau toh las Babilon pheh jons loh zis ma xauh bang ge, hauh mau mas dah nyungs thank bang dvnganh lyis yoeuh nhang toh cho xauhgyo.

⁸Housoeh las Nethania lo Ishmael, Karea lo Yohanan, Tanhumet lo Seraia, Netopha mas dah Ephai lo jens, yahge Makha mha dah Yezania moq gas nyamoq dius jens yah dvgeh Gedalia nyeis dah Mizpa wus mas loh.

⁹Gedalia nyamoq lyis taiq, Ngos namoq lyis dangthoengh dyei, Babilon jens lyis vsomh kham das zis ma chiq noh. Haih mau mas nyeis las Babilon hwankti lhyi phuqsoe geh. Housoeh lyis namoq nyeisgis das.

¹⁰Babilon bang heimha los lyis namoq gungsthaiq ngos nyang Mizpa mha nyeis das. Nghuot laus eq namoq gas namoq wvng nyeis goeus dah wukhau mha nyeis las zvbiq, shih, yahge tsanlun coeu lhyi tsainh las yung toh geh, ge.

¹¹Hauh uhlyis Moab, Amon, Edom mau yahge gohmau mas nyeis dah Israel jens gas Babilon hwankti ka Israel jens dvyhamh lyis Yuda mau mas nyeis nhang lha, Gedalia lyis mungh zau toh cho xauhgyo.

¹²Housoeh las nyamoq gas nyamoq dyos loh dah joqyos toh khoq las Yuda mau mas tauh loh. Nyamoq Gedalia nyeis dah Mizpa mha los, houmha nyamoq zvbiq yahge shih nyoshoq tsainh toh.

¹³Haih zis dye thang lhyi vsomh ma kham dah Yohanan yahge jeslo jens dah uhshe bang gas Mizpa mha nyeis Gedalia jyank mas jweh los las,

¹⁴nyang lyis taiq zis gas, Amon hwankti Bali gas, nvng lyis sat das zis Ishmael lyis nhang kat cho, nvng ma seq lah, ge. Nghuot laus eq Gedalia gas hauh yvlyis ma jingh.

¹⁵Hauh thang lhyi Yohanan gas, Gedalia nyang kyingh lyis taiq zis gas, Ishmael lyis ngos loh sat bah, hank sat zis hank eq ma seq das. Nyang nvng lyis sat das toeuh chamus dyei das? Houka nah jyank mas huom nyeis dah Yuda jens dyos loh las Yuda mau mas nyet shih bang mas dyoqbis cho she los das, ge.

¹⁶Nghuot laus eq Gedalia phuk taiq zis gas, Vsat, Ishmael cho nvng taiq zis ma jus, ge.