Read Achang YEREMIA 41 Bible Online

YEREMIA 41 - Achang bible

YEREMIA 41

¹Hauh zvn, nyhet vkhyvp lyis hwankti yhenbang, hwankti dah zaumuh jens mas soeu eq dvyuk nghuot las, Elishama nyeilo, Nethania lo Ishmael gas dius dvci yuk yah dvgeh Mizpa mha Gedalia yah loh xauhgoh. Hauh uhlyis nyamoq dvnganhmoq dvgeh wom tsain zo nyeis.

²Ishmael yahge nyang yah loh dah dvci yuk moq gas nyamoq dah moengsa she lha Gedalia lyis eq, hauh mau mas Babilon hwankti toeuq toh dah zau jens lyis eq sat.

³Ishmael gas Mizpa wus mas Gedalia yah nyeis dah Israel jens dvnganh, houmha nyeis jus dah Babilon jeslo jens lyis eq sat.

⁴Hauh nungs nyeih, Gedalia lyis sat cho hank ma seq shih lyis,

⁵Shekhem, Shilo yahge Samari wus jens masyah dius xetci jweh los. Nyamoq gas nhuotmi khyik, dyi chuiq, gungs lyis eq zwes nhang lha, Yhenmuh mas jyungshuk dyei das xiklyis jyo yahge xangh tsain chi los.

⁶Housoeh las Ishmael gas hauh bang lyis zes das ge, ngaus zoh lyis Mizpa wus masyah thuq loh. Nyang nyamoq jyank jweh lyis nyang taiq, Gedalia yah xauhgoh das zis jenh wvng los geh, ge.

⁷Nyamoq wus vkhau mha jweh yah dvyih Ishmael yahge nyah dius jens nyamoq lyis sat las nyamoq mvng lyis jeis dwang mas tsain doeuh khyoq.

⁸Nghuot laus eq hou mhayah dvci yuk Ishmael lyis taiq zis gas, Ngamoq lyis vjenh sat. Ngamoq boms mau mas sunghso, oh, tsanlun coeu yahge dyoyhei shung toh, ge. Housoeh nyang nyamoq lyis lhuiq kat.

⁹Ishmael nyang sat dah mvng tsain doeuh khyoq dah dwang gas kuh. Hwankti Asa, Israel hwankti Basha zan los uhlyis doeu dah dwang nghuot. Ishmael gas hauh dwang lyis mvng yah tyink toh.

¹⁰Hauh thang lhyi nyang gas zungh bang dah zau Nebuzaradan Gedalia dah loq mas kyauh toh, hwankti lonyi jens yahge Mizpa mha nyet shih dah dius jens dvnganh lyis thung dius kuot. Ishmael hauh bang dvnganh lyis shwih jons las Amon mau pheh thuq khoq.

¹¹Ishmael kuot dah dius sat cho lhyi Yohanan yahge nyang yah dvgeh dah jesphung uhshe bang dvnganh xauhgyo.

¹²Housoeh las nyamoq gas nyamoq dius jens dvnganh shwih las Ishmael lyis chank khat las Gibeon thomhlo nvm mas chank duons.

¹³Ishmael shwih jons loh bang gas Yohanan yahge nyang yah dvgeh nghuot dah jesphung uhshe bang lyis nyvng lyis nyamoq tsain gaus las,

¹⁴nyamoq jyank pheh phang tauh loh.

¹⁵Nghuot laus eq Ishmael yahge nyah dius xet yuk moq gas Yohanan loq masyah phang luiq las Amon mau pheh loh.

¹⁶Hauh thang lhyi Yohanan yahge nyang yah dvgeh dah jesphung uhshe bang gas, Gedalia lyis sat thang lhyi Mizpa wus masyah Ishmael shwih jons loh bang lyis yvwons yoeus. Nyamoq gas Gibeon masyah shwih tauh los dah jeslo jens, vmesbih jens, loshang jens yahge yhaugyen zau jens tsain nghuot.

¹⁷Babilon hwankti hauh mau mas mungh zau kuot nhang toh dah Gedalia lyis Ishmael yah sat yvmvyah nyamoq gas Babilon jens lyis gyuk nyeis. Housoeh las nyamoq Babilon jens lyis phang das zis Egutu pheh thuq loh. Cho mha Betlehem vnvm, Gerut Kimham mha thoeng nyeis.