Read Achang YEREMIA 42 Bible Online

YEREMIA 42 - Achang bible

YEREMIA 42

¹Hauh thang lhyi Karea lo Yohanan, Hoshaia lo Azaria[11] moq bos dah jeszau jens dvnganh yahge dius jens ngislo kuhlo ngah jyank mas tsain los.

²Nyamoq ngos lyis taiq, Ngamoq nvng lyis dung zis jenh kuot dyei las YHENSAIN, ngamoq dah Mangso lhyi dung dyei aq. Yang doeng nyeis bang dvnganhmoq xiklyis dung dyei aq. Yang xikpheh nyoshoq nghuot laus eq gvshih gas nvng nyvng zis yah dvyhangteh nainlo kyingh dvnyet lo.

³YHENSAIN, yah Mangso ka yang loh chah cho, kuot chah muh lyis chixoeuq bas jungh, dung dyei aq, ge.

⁴Ngos phuk taiq, Svsoh gis, housoeh lyis namoq sang vgus ngos yah YHENSAIN Mangso lhyi dung das las, nyang cha taiq zis ngos namoq lyis taiq kyoh das. Ngos cha ma zauh toh das, ge.

⁵Housoeh nyamoq ngos lyis taiq, YHENSAIN, yah Mangso nvng lyis yah taiq zis dvnganh ngamoq kuot das. Ngamoq xiklyis YHENSAIN, yah Mangso nvng lyis dyei dah tyingdang ma chank lyis gas, YHENSAIN ka ngamoq yah tyi cho jyoeng lha wontang kanghjyoeng nghuot bas jungh.

⁶Ngamoq nvng lyis shvmanh dung nhang dah YHENSAIN, ngamoq Mangso dah domsyos gis laus gang laus gyo das. Nyah domsyos gyo lyis ngamoq nyeisgis yaplhoq das, ge.

⁷Dvci nyeih thang lhyi YHENSAIN ngos lyis taiq.

⁸Housoeh las ngos gas Yohanan, nyang yah dvgeh dah jeszau jens dvnganh, gohtoeu dius jens dvnganh lyis khi tsainh las,

⁹nyamoq lyis taiq, Namoq ngos lyis dung nhang dah YHENSAIN, Israel Mangso heisoeh ge:

¹⁰Namoq haih mau mas tsoq nyeis loh mes lyis, ngos namoq lyis toeu tsung lha namoq lyis ma thyoq khyoq das. Ngos namoq lyis tsungh toh las ma khot tyamp das. Ngos namoq mas khyoq dah yaukyenh cho ka ngos lyis svsoh nhaiqkuk nhang.

¹¹Babilon hwankti lhyi vgyuk lo goh. Ngos namoq yah nghuot las nyah yomsoq masyah khyuot yoeus das.

¹²Ngos gas nhaiqnyen soeu nghuot yvmvyah nyang namoq lyis nhaiqnyen zis yah namoq nyang yhen pheh tauh loh nhang shoq ngos kuot das.

¹³Nghuot laus eq namoq gas, Ngamoq Yuda mau mas ma nyeis das ge mvbeh. Namoq housoeh ge lyis YHENSAIN, namoq dah Mangso domsyos ma gyo das.

¹⁴Ngamoq Egutu mas e nyeis das. Houmha ngamoq jes ma xauh das, jes lvbuh thwe eq ma xauhgyo das, ma yuot ma shet das.

¹⁵Namoq housoeh ge lyis gas, YHENSAIN dah loeus gyo geh. Haih zis gas Yuda mau mas kang dwis nyeis shih bang xiklyis nghuot. Maukhung Jesphung YHENSAIN, Israel Mangso heisoeh ge: Namoq Egutu mas e das ehnyet thyet lyis gas haih zis bweh los das.

¹⁶Namoq gyuk dah jeszan cho ka namoq lyis duons das. Namoq gyuk dah phanghkhauq eq namoq thang mha chank los las namoq Egutu mas shei das.

¹⁷Egutu mas e nyeis das ge, nghamh thyet bang dvnganh jes mas, phanghkhauq mas, yomh yah tsain shei das. Ngos namoq thoq mas she kat das dyoqbis zainsmuh masyah hank eq ma phang luiq das, dvyuk eq ma doeng lo das.

¹⁸Maukhung Jesphung YHENSAIN, Israel Mangso taiq, ngos Yerusalem bang thoq mas ngah nhaiqyo cho, nhaiqlom tsoeu zis huot khyoq vgus, Namoq Egutu pheh e lhyi ngah nhaiqlom tsoeu zis namoq thoq mas huot khyoq das. Housoeh namoq gas gyukphoh joqyos, dius jens goessang gus bweh das. Namoq dah nyings lyis nhoengh yvmas yhung das. Namoq haih joqyos lyis khanhamp eq ma doms nyvng lo das.

¹⁹Hauh thang lhyi ngos tsoq shih. Yuda mau mas nyet shih bang lyis, Egutu pheh v-e goh, ge YHENSAIN namoq lyis taiq. Housoeh las gvshih ngos namoq lyis zaih nhang nyeis.

²⁰Namoq gas, shei cho dah shuot zis kuot goeus. Namoq gas YHENSAIN, yah Mangso lhyi namoq xiklyis jenh dung dyei aq, ge ngos lyis sang. Nyang tying zis dvnganh kuot das ge dangthoengh toh.

²¹Ngos gvshih namoq lyis Mangso jyank mas dah loeus taiq kyoh goeus. Nghuot laus eq namoq gas YHENSAIN, yah Mangso ngos lyis taiq nhang zis domsyos ma gyo.

²²Housoeh yvmvyah haih zis comh geh. Namoq loh nyeis mes dah mau mas jeszan cho, phanghkhauq, yomh yah tsain shei das, ge.