Read Achang YEREMIA 43 Bible Online

YEREMIA 43 - Achang bible

YEREMIA 43

¹YHENSAIN, nyamoq dah Mangso ka ngos lyis yah taiq nhang dang dvnganh, dius jens lyis dye taiq lyis,

²Hoshaia lo Azaria, Karea lo Yohanan yahge gohtoeu lhoq lhoq teh bang dvnganh ngos lyis taiq. Nvng hwah nyeis. YHENSAIN, ngamoq dah Mangso ka nvng lyis yah Egutu mas v-e nyeis ge ma taiq nhang.

³Babilon jens gas ngamoq thoq mas yomsoq yoh las ngamoq lyis yoh sat, nghuot ya Babilon pheh shwih jons loh shoq, Neria lo Baruk gas ngamoq cho tyi lha nvng lyis lhoeu nhunk jyamh kat nyeis, ge.

⁴Housoeh las Yohanan eq, jeszau jens dvyuk eq, dius jens dvyuk eq Yuda mau mas nyeis geh, ge dah Yhensain tyingdang domsyos ma gyo.

⁵Hauh thang lhyi Yohanan yahge jeszau jens dvnganh gas Yuda mau mas nyet shih bang yuk khanghmuh lyis shwih las Egutu pheh e. Hauh bang gas sanh tyamp zis xauh dah gohnyau bang masyah tauh los bang,

⁶Vbusbih, vmesbih, loshang jens, hwankti lonyi jens tsain nghuot. Nyamoq gas vmingh dyei zau Nebuzaradan yah Gedalia lyis kyauh toh bang dvnganh lyis shwih loh, Neria lo Baruk yahge ngos eq bos.

⁷Nyamoq gas YHENSAIN tying dang domsyos ma gyo, Egutu pheh Tapanhe wus hweq e loh.

⁸Houmha YHENSAIN ngos lyis taiq,

⁹Luk kuh dvkhamh yoeus las jyenhchvp nyhoeuh toh vkhau thomhbop mas nyhop toh aq. Houka vtsuya yhen mha wvng dah khomh xik mas nghuot. Nvng hauh zis kuot uhlyis Israel jens dvyhamh lyis yoeuh nhang aq.

¹⁰Hauh thang lhyi nvng nyamoq lyis taiq aq, Ngos, Maukhung Jesphung YHENSAIN, Israel Mangso ka ngah jyeidwis Babilon hwankti Nebukhaneza lyis haih joqyos mas shwih los das lha, nyang[12] nyah hwankti tank lyis hai nvng[13] nyhop dah luk thoq mas toh las hauh yvlyis hwankti zvng yah lhywa nghop toh das.

¹¹Nebukhaneza Egutu lyis los zan ung das, yomh yah shei vvng bang gas yomh yah shei das. Jonsdoeus loh vvng bang gas shwih jons loh das. Jes mas gyoh vvng bang gas jes mas sat zis xauh das.

¹²Ngos Egutu jens dah mangso yhenmuh jens lyis ngheq das. Babilon hwankti eq nyamoq dah mangso jens lyis ngheq, nghuot ya tsain tyungh loh das. Yvng yoeuh bang gas nyamoq gungs lyis dyimis yah thop toh teh, Nebukhaneza eq Egutu mau lyis nyah gungs mas thop las nyang hou mhayah jesluiq shohluiq thuq loh das.

¹³Nyang gas Egutu mau mas dah buis mangso dah yhenmuh mas luk yah kuot toh zains jens lyis mhont das. Egutu mangso jens dah yhenmuh jens lyis ngheq tyamp das, ge.