Read Achang YEREMIA 48 Bible Online

YEREMIA 48 - Achang bible

YEREMIA 48

¹Heika Maukhung Jesphung YHENSAIN, Israel Mangso Moab cho taiq zis nghuot. Nebo dius jens gas mvtanhzoe nghuot. Nyamoq dah wus jens gas dyoqbis goeus! Kiriathaim ka nyhik loh goeus. Nyah yomzains thoenkgus jesdvp gas thyoq khyoq goeus las nyah dius jens gas xoqphuh goeus.

²Moab mau dah yungh cho thank goeus. Jeswus gas Heshbon wus lyis yoeus las Moab dius nyau lyis mhont das zis tsain lhaink. Madmen wus gas samlo joq das; jesphung jens gas houyah tyi lha jens loh das.

³Horonaim wus gas thyoqpi lha dyoqbis goeus las nyamoq dah ngaus thwe thuq los.

⁴Moab mau gas dyoqbis goeus; lo jens ngaus thwe Zoar hweq xauhgyo.

⁵Nyamoq gas oek oek ge ngaus zoh lyis Luhit pheh doq loh. Horonaim pheh gyoh loh cho mha eq shanghsenh ngaus thwe lhyi yoh xauhgyo.

⁶Nyamoq taiq, Kang luiq shoq lvnyap phang geh. Sihyos mas dah ye mauhlyihzoe teh wuih geh, ge.[14]

⁷Moab eh, nvng gas nah yom yahge nah dis cho lhyi loms toh laus eq gvshih nvng lyis ung tyamp zis xauh goeus. Nah Khemosh mangso ka nyah phudyei bang, nyah zaulo jens yah dvgeh jonsdoeus loh das.

⁸Dyoqbis cho dvwus eq ma luiq das; langhkhau eq janggyon eq dyoq gyoh das. Ngos, YHENSAIN taiq goeus.

⁹Moab xiklyis lop kuot toh geh, hauh zis dyoqbis bah ge. Nyah dah wus jens gas dyoq gyoh joq das, houmha hank eq ma doms nyeis lo das.[15]

¹⁰YHENSAIN dah muh lyis nyamoq dah nhaiqlom dvnganh yah ma kuot bang gas nhoengh zis xauh. Ma jap sat bang gas nhoengh zis xauh.

¹¹YHENSAIN taiq, Moab gas vjangh yah jesluiq nyeis, khanhamp eq jons loh zis ma xauh. Moab gas dvyam masyah dvyam thot lvng zis ma bos, ma thungh nhont doengs joq las nyah whitau ma dyoq, nyah shom eq ma thaiq loh las vjangh gis joq dah zvbiq teh nghuot.

¹²Housoeh las gvshih ngos dius nhang lha Moab lyis zvbiq teh huot tyamp das shishenh jweh los. Nyamoq gas hau zvbiq yam jens lyis nghat lho lha yam lyis tsain khwih tyamp das, ge.

¹³Israel jens gas nyamoq loms dah Bethel mangso mha xoqphuh teh, Moab jens gas Khemosh mangso mas xoqphuh das.

¹⁴Moab dius jens eh, namoq thoeuqzoe jens nghuot, jeszan yvmas kyink goeus, womh dah jeslo nghuot oen chamus sang?

¹⁵Moab mau yahge nyah wus jens gas dyoqbis goeus, nyah lyes thank loyvm jens sat xauh goeus. Ngos hwankti, Maukhung Jesphung YHENSAIN nghuot las, taiq goeus.

¹⁶Moab jom das cho jweh los goeus. Nyah dah dyoq gyoh cho jweh los bah ge.

¹⁷Nyah nvm mas nyeis las nyah nyings hoeuh cho seq bang dvnganh, hauh dius nyau xiklyis kuk geh. Nyah dah yomsoq bos lyi gas dyoq loh goeus. Nyah dah nyoqnho ngelang yahge duot cho ma bos lo, oen geh.

¹⁸Dibon mas nyeis soeu eh, nah nyoqnho ngelang bos dah joqyos masyah gyoh las nyeisjvng tsohmop mas tsung aq. Moab lyis thyoq das soeu ka heimha nghuot goeus las nah thoenkgus jesdvp lyis thyoq khyoq goeus.

¹⁹Aroer wus mas nyeis soeu eh, choyvm mas yap las langh aq. Houmha phang loh vbusbih yahge phang luiq vmesbih lyis, Chamus goh, oen nyei aq.

²⁰Nyamoq phuk das zis gas, Moab gas gyoh goeus! Hauh xiklyis ngaus geh; houka xoqphuh cho nghuot. Moab gas dyoqbis goeus oen Arnon lvng chank yah taiq hoeuh geh.

²¹Janggyon wus jens mas soetuon cho jweh los. Holon, Yaza, Mephat,

²²Dibon, Nebo, Bet Diblathaim,

²³Kiriathaim, Betgamu, Betmeon,

²⁴Keriot yahge Bozra. Soetuon cho ka Moab mau, ni mas we mas dah wus jens dvnganh mas jweh los.

²⁵Moab dah duot cho lhyi thungh thyi goeus. Nyah yomsoq eq dyoqbis goeus. Ngos, YHENSAIN taiq goeus, ge.

²⁶YHENSAIN taiq, Moab gas ngos lyis tyi lha gomloeus toq yvmvyah nyang lyis yet nhang geh. Moab gas nyang duk toh yvmas lains wvng das las dius jens yis das.

²⁷Moab, nvng Israel jens lyis khasoeh yis zis soh aq. Nvng nyamoq lyis khyanktau dvphung yah dvgeh xauh nyhik teh kuot.

²⁸Moab mau mas nyeis bang eh, namoq wus jens masyah thuq geh. Luktyoq mas loh nyeis geh. Lukmhung mha sot sot dah khotjyauh teh kuot geh.

²⁹Moab gas svsoh khwank! Nyah dius jens kha iq khwank, lhoq lhoq teh, ehnyet nyhang cho nyamoq nghamh kuh zo cho lhyi ngos xauhgyo ku.

³⁰Nyamoq dah lhoq lhoq teh kuot cho lhyi ngos YHENSAIN seq. Nyamoq dah moengs cho ma yoh yhung, nyamoq kuot dah vyhang eq ma doengs das.

³¹Housoeh las ngos Moab mas nyeis bang yuk khanghmuh xiklyis ngaus das. Kir Here bang xiklyis kuk das.

³²Ngos Sibma dius jens xiklyis ngaus das, Yazer xiklyis ngaus thoq lyis ngos nah xiklyis ngaus das. Sibma wus eh, nvng gas zvbiq nwis teh nghuot. Hauh vko ka Coh Thomh lai las Yazer jweh shoq duons. Nghuot laus eq gvshih nah zvn wvng zoh lyis vshih yahge nah zvbiq lyis mhont tyamp.

³³Jenh bos dah Moab mau masyah gauslaus cho yahge pyo cho yoeus tyamp goeus. Ngos zvbiq nyhet zwvng masyah zvbiq jeis ma yaus nhang lo. Gauslaus las kaiq zis yah zvbiq hank ma nyhet lo.

³⁴Heshbon yahge Eleale wus mas bang ngaus las, nyamoq dah ngaus zis Yahaz hweq xauhgyo; hauh zis Zoar wus mas bang yoh xauhgyo, Horonaim yahge Eglat Shelishiya jweh shoq xauhgyo. Nimrim jeislo lvng yangh kanh goeus.

³⁵Moab dius jens nyamoq paiq joqyos mas jyungshuk ngheq dyei zis yahge nyamoq dah mangso jens lyis lomhxangh lainh cho lhyi doms nhang das. Ngos, YHENSAIN taiq goeus, ge.

³⁶Housoeh las ngah nhaiqlom gas Moab mau yahge Kir Here dius xiklyis, khvlhank yah kuk nyingh lvkhyank kat teh kuk: khasoeh ge lyis nyamoq sain zis dvnganh dyuk goeus.

³⁷Nyamoq dvnganh gas nyamoq dah uhyuk, nhuotmi tsain yuk. Nyamoq dah loq lyis vkhyamh khyamh tsain kuot las, yuk khanghmuh yanghthung dyimis wuot toh.

³⁸Ngos Moab lyis hank ma o lo dah yam lyis khwih teh khwih tyamp yvmvyah, Moab mau yhenkhung thoq khanghmuh mas yahge wus talhoeu mha kukxi ngaus cho kyingh dvnghuot.

³⁹Moab gas dungsshih lvnggang nghuot! Ngaus goeus! Moab gas xoqphuh goeus. Houka dyoq gyoh joq goeus las nyah vyvm vwi mas dah dius nyau jens nyang lyis nyhap. Ngos, YHENSAIN taiq goeus, ge.

⁴⁰YHENSAIN ka dius dvnyau lyis, Moab mau thoq mas zonsmuh teh dang gyoh los las nyah dungs yah nghop das zis, dangthoengh toh goeus.

⁴¹Wus jens yahge thoenkgus jesdvp jens yoeus loh lo das. Hauh nyeih lyis Moab jeslo jens gas lokhoeu nos nos vmesbih teh gyuk dvn das.

⁴²Moab gas dyoqbis las dius dvnyau ma bweh lo das: khasoeh ge lyis houka ngos lyis tyi lha gomloeus toq goeus.

⁴³Gyuk cho, dwang jens, lhyik jens gas Moab dius jens lyis langh nyeis, ge YHENSAIN taiq goeus.

⁴⁴Gyuk cho mhayah tungh phang luiq soeu hank eq dwang mas gyoh das, dwang masyah yoh doq thuq los soeu hank eq lhyik mas nyih das: khasoeh ge lyis YHENSAIN ka Moab dah dyoqbis cho shishenh toh toh.

⁴⁵Mvshohjyen jesphang bang gas gohlhain hwankti Sihon guon khoq dah Heshbon wus mas khaugus tungh xo. Nghuot laus eq hauh zis gas nyilhyam duk nyeis. Jeszan mes bang Moab dius jens dvnganh nyi ngeh tyamp.

⁴⁶Moab jens vshoh vjyen! Khemosh lyis paiq bang dyoqbis goeus. Nyamoq dah loloeu lonyi jens eq jonsdoeus loh goeus.

⁴⁷Nghuot laus eq thang buisnyeis lyis YHENSAIN ka Moab lyis nyeisgis yaplhoq cho doms kuot dyei das. Hai dvnganh gas Moab mas bweh das cho Yhensain taiq zis nghuot.