Read Achang YEREMIA 49 Bible Online

YEREMIA 49 - Achang bible

YEREMIA 49

¹Heika YHENSAIN Amon jens cho taiq zis nghuot. Israel yukgis jens khalhye nghuot? Nyamoq dah mau lyis khomp das yukgis hank ma bos lo lhyeh? Nyamoq Molek lyis paiq bang lyis chamus Gad Vkoq dah maunyeis yoeus nhang lha houmha tsain nyeis?

²Nghuot laus eq ngos Raba wusmuh mas bang lyis jeszan thwe xauhgyo nhang das shishenh jweh los. Hauh wus gas dyoq gyoh joq las nyah wukhau jens gas ngheq khyoq goeus. Hauh thang lhyi Israel jens gas nyamoq mau yoeus loh bang jyank masyah doms yoeus das.

³Heshbon dius jens eh, ngaus geh! Ai wus gas dyoqbis goeus. Raba vmesbih jens eh, kuk ngaus geh! Yanghthung dyi wuot las kuk geh. Khamkhvv zis yah e los wuih geh. Namoq dah Molek mangso ka nyah phudyei bang yahge zaulo jens yah dvgeh jonsdoeus loh goeus.

⁴Namoq lom ma luk dius jens chamus moengs? Nah yom gas thank goeus. Nah yomsoq lyis loms las nvng lyis hank ma womh zan das ge chamus sang?

⁵Ngos namoq thoq mas namoq dah shot khanghmuh masyah gyukphoh zis she los das. Namoq dvnganh phang loh das. Namoq hank eq hank kang xiklyis phang das. Namoq phung lyis dvgeh doms xwih tsainh das zis hank ma bos das.

⁶Nghuot laus eq ngos thang pheh Amon jens lyis nyeisgis yaplhoq cho doms kuot dyei das. Ngos, YHENSAIN taiq goeus.

⁷Heika Maukhung Jesphung YHENSAIN Edom cho taiq zis nghuot. Edom mas joeui thank goeus lhyeh? Edom mas joeui dyei bang nyamoq cha kuot das zis ma yoh taiq lo lhyeh? Nyamoq dah joeui dvnganh dyuk goeus lhyeh?

⁸Dedan dius jens eh, tauh las phang geh. Tamh geh, ngos Esau dah vnyau vshih jens lyis mhont bah: khasoeh ge lyis ngos nyamoq lyis joeng das shishenh jweh los.

⁹Dius jens zvbiq thyoq lyis nyamoq vgyoh nyhet toh khoq; nyenh lyis khyanktau los lyis eq nyamoq o zis dvyoeus loh.

¹⁰Nghuot laus eq ngos Esau dah vnyau vshih lyis shank shoq shang goeus; nyamoq tamh joqyos lyis eq phank thuq kat goeus las nyamoq ma yoh tamh lo. Edom dius jens dvnganh dyoqbis goeus. Dvyuk eq ma nyet lo.

¹¹Namoq dah chauhlo jens ngos yah toh khoq geh, ngos loqzamh zwi das. Namoq dah chauhmuh jens gas ngos lyis yoh khaunges das.

¹²Ma joeng vvng bang yangh, hau joeng dah kom mha zis shuk chah. Nvng joeng zis ma xauh yoh lai das oen nghamh lhyeh? Ma nghuot, nvng hauh kom mha zis shuk nyang shuk chah.

¹³Bozra wus gas gyukphoh zis, yahge sihyos duot das; dius jens hauh yvlyis jwangh das, nyah nyings yoeus las nhoengh das oen ngvnyang maukhi goeus. Hauh vyvm vwi wukhau jens vcaiq vto dyoq gyoh joq das. Ngos YHENSAIN taiq goeus, ge.

¹⁴Ngos Edom lyis taiq, Ngos YHENSAIN jyank masyah loeus xauh yoeus: Nyang loeuskyoh soeu lhyi yah taiq nhang. Dius nyau jens lyis nyamoq dah jesphung tsainh zis yah nvng lyis zan das zis cicont kuot nhang.

¹⁵YHENSAIN ka nvng lyis yomnhuk nhang das las hank eq nvng ma phauh nyang das.

¹⁶Nvng khwank cho ka nvng lyis mhuih goeus. Nyamoq nvng nghamh nyhoq nvng lyis hank eq ma gyuk. Nvng gas boms nyhang thoq luktyoq mas nyeis. Nvng gas zonsmuh teh nyhang yvmas nyeis laus eq YHENSAIN nvng lyis she khyoq das, ge YHENSAIN taiq goeus.

¹⁷YHENSAIN taiq, Edom thoq mas jweh das dah dyoqbis cho ka svsoh gyukphoh nghuot Das las houcho lai loh soeu khanghmuh dvn las gyuk das.

¹⁸Edom wus gas Sodom Gomora yahge nyamoq dah vyvm vwi wus jens mas dyoqbis teh, bweh das. Houmha hank khanhamp eq ma doms nyeis lo das. Ngos,YHENSAIN, taiq goeus.

¹⁹Khangkhyi ka Yodan lvng yvm mhanh thoeu masyah thuq los las chungh noeuh yos katjang mas doq loh teh, ngos Edom jens lyis nyamoq mau masyah nyetlos nyettant phang loh shoq los kuot das. Hauh thang lhyi ngos khyen dah choshe soeu dius nyau lyis guon das. Ngos yah hank yoh byi das? Ngos lyis loqyom hank womh tyonh das? Khah guon soeu ngos lyis yoh tyi das?

²⁰Housoeh las ngos Edom dius jens lyis tyi lha joeui da cho lhyi gyo geh. Teman wus mas bang lyis tyi lha kuot das cvvq yvlyis gyo geh. Nyamoq dah loshang jens lyis yangh lang she loh das las yuk khanghmuh gyukphoh nghuot das.

²¹Edom lains lyis thwe nyings das las nyeisjvng gonh nonh das. Nyamoq kaiq ngaus thwe ka Thomh Nes hweq xauhgyo.

²²Jeswus jens gas Bozra lyis zonsmuh dungs lhywa lha dang gyoh los teh zan das. Hauh nyeih lyis Edom jeslo jens gas lokhoeu nos nos dah vmesbih gyuk dvn nyeis teh nghuot das.

²³Heika YHENSAIN Damasku cho taiq zis nghuot. Hamat yahge Arpad wus mas bang gas loeus gang xauhgyo yvmvyah chiqh las yau cho bos. Chiqjyen cho ka nyamoq mas thomh soeh toeu khuk los las nyamoq ma nyens mus.

²⁴Damasku bang gas Yomnhuk las gyuk zis yah phang loh goeus. Nyamoq gas lokhoeu nos nos dah vmesbih teh khih nos zis yah nhaiqngis nyeis.

²⁵Nyings hoeuh zis yah gyangh pyo[16] dah wus gas jyamhjyuklhyuk nghuot goeus.

²⁶Hauh nyeih lyis nyah loyvm jens gas wus talhoeu mha sat xauh das; nyah jeslo jens dvnganh dyoqbis das.

²⁷Ngos Damasku wusciank lyis nyi ngheq das, hwankti Benhada dah hwankti yhen lhyi ngheq khyoq das. Ngos, Maukhung Jesphung YHENSAIN taiq goeus.

²⁸Heika YHENSAIN Keda vkoq yahge Hazo joeu dah wuxom, Babilon hwankti Nebukhaneza zan ung dah wus cho taiq zis nghuot. Keda mas bang lyis zan geh, lho lha buisthuq shot pheh vkoq jens lyis mhont geh.

²⁹Nyamoq zvng, nyamoq yvng phung jens, nyamoq dah zvng gosseh, yahge nyamoq zvng khau mha zis dvnganh nyhik geh. Nyamoq dah gola-u jens lyis yoeus tyamp las, dius jens lyis, Dvkhauyah gyukluk lvsonh nghuot, oen taiq kyoh geh.

³⁰Hazo bang eh, ngos, YHENSAIN namoq lyis, we we phang tamh geh oen zaih nhang. Babilon hwankti Nebukhaneza gas namoq lyis tyi lha lhaink goeus. Heika nyang taiq zis nghuot.

³¹Los geh, yang hau jesluiq shohluiq gau joq ge nghamh dah dius jens lyis zan das! Nyamoq dah wus gas khyam khomh ma bos, vkyank ma bos, gos toh cho cha eq ma bos zis nghuot.

³²Nyamoq dah gola-u yahge nyamoq dah gaunyhauq dvnganh yoeus geh. Ngos nyamoq dah cam lyung lyung thyet bang lyis shot khanghmuh sanh tyo kat das. Ngos nyamoq thoq mas shot khanghmuh masyah dyoqbis zainsmuh she kat das.

³³Hazo wus gas vcaiq vto sihyos kuot zis xauh das las womkhuih jens dvnyeis joqyos kuot das. Houmha hank khanhamp eq ma doms nyeis lo das. Ngos, YHENSAIN taiq goeus.

³⁴Zedekia Yuda hwankti bweh thang lhyi ma nyangh lyis Maukhung Jesphung YHENSAIN ka ngos lyis Elam mau cho taiq.

³⁵Nyang taiq, Ngos Elam lyis yomsoq bos shoq kuot dah lyei baiq bang dvnganh lyis sat das.

³⁶Ngos Elam mau lyis tyi lha shot khanghmuh mas dah lyeis lyis muot los nhang das. Ngos nyah dius jens lyis dvkhauyah sanh tyo tyamp das. Nyah jesphang bang ma loh dah mau ma bos lo shoq sanh kat das.

³⁷Ngos Elam dius jens lyis, nyamoq lyis sat mes dah jeswus jens xik mas gyuk nhang das. Ngah nhaiqlom tsoeu lha, ngos nyamoq lyis yoh thyuk tyamp shoq nyamoq lyis tyi dah jesphung nhang lha nyamoq lyis mhont das.

³⁸Ngos nyamoq dah hwankti jens yahge uhshe bang lyis mhont das las houmha ngah hwankti tank toh das.

³⁹Nghuot laus eq thang pheh ngos Elam dius jens lyis nyeisgis yap doms lhoq nhang das. Ngos, YHENSAIN taiq goeus.