Read Achang YEREMIA 5 Bible Online

YEREMIA 5 - Achang bible

YEREMIA 5

¹Yerusalem bang eh, Namoq dah wus cho mha wuih xo yoeuh geh, vyvm vwi mas yoeuh las nghamh geh, kaih jang mas xo yoeuh geh. Nvng dan zis kuot soeu yahge Mangso lhyi lomluk luk kuot das ge soeu hank vxo nyvng lah? Yoh xo nyvng lyis YHENSAIN Yerusalem lyis yobos khyuot dyei das.

²Namoq gas, YHENSAIN nyang nyeis zis yah dvyhangteh ge laus eq, namoq ma jus khyvlyis mau dvkhi.

³Jyoengh YHENSAIN ka lomluk cho lhyi xo. Nyang namoq lyis lyuk laus eq, namoq ma gyo dyei. Nyang namoq lyis bat thyi laus eq namoq gas xuq das zis ngoek. Namoq gas nhaiqlom than lha namoq dah yaunos masyah ma tauh los.

⁴Housoeh las ngos nghamh zis gas, Heika shoh jyen cho yahge ma seq cho dvnghuot. Nyamoq gas koh bang teh kuot. Nyamoq gas nyamoq dah Mangso cha o zis ma seq. YHENSAIN nyamoq lyis cha kuot nhang mes zis ma seq.

⁵Ngos yomsoq bos bang jyank mas loh las nyamoq yah jisgoh das. Jyoengh nyamoq gas nyamoq dah Mangso cha o zis, YHENSAIN nyamoq lyis cha kuot nhang mes zis seq. Nghuot laus eq nyamoq dvnganh gas YHENSAIN dah toeuh peq zis yahge nyah domsyos gyo das yvlyis tsain ngoek.

⁶Housoeh yvmvyah saiqkhyam mha dah khangkhyi nyamoq lyis sat das. Sihyos mas dah cauhpau nyamoq lyis lang chingh tyamp das. Lutyoeuh gas nyamoq dah wus chank gauh lai das. Hauh dius jens wus nghe pheh thuq loh lyis vchingh chingh ngat zo das. Khasoeh ge lyis nyamoq dah yaunos vboms vbeq nghuot. Nyamoq dvlhain thang lhyi dvlhain, Mangso mhayah nungsdoms loh.

⁷YHENSAIN nyei zis gas, Ngos ngah dius jens lyis yaunos chamus khyuot dyei das? Nyamoq gas ngos lyis tyamp las ma gyingh dah mangso lhyi tsain paiq. Ngos ngah dius jens lyis jo shoq tsoh. Nghuot laus eq nyamoq gas nyishuot las nyamoq dah shishenh lyis nghe nyhiq yah zomh yvmas thank nhang.

⁸Nyamoq gas nyhuk toh nyanglus shi chank mes teh, yuk khanghmuh nyah yhenkyoh dah yhensain nyhiq lyis nyetnau nyeis.

⁹Haih cho xiklyis ngos nyamoq lyis ma joeng das lah? Heisoeh teh vnyau lyis ngos lvto ma phuk kuot das lah?.

¹⁰Ngah dius jens dah zvbiq khyam zan khyoq das zis ngos jeswus lyis nhang das. Nghuot laus eq dvnganh ma mhont das. Ngos nyamoq lyis vko choeu das nyhenshang taiq das. Khasoeh ge lyis hauh vko jens gas ngah zis ma nghuot.

¹¹Israel yahge Yuda dius jens ngos lyis svsoh mhuih jyomh goeus. Ngos, YHENSAIN taiq goeus.

¹²YHENSAIN dius jens nyang lyis ngoek las taiq, Nyang jyoengh cha ma kuot das ngamoq mas yaukyenh shishenh ma bos das. Ngamoq mas jeszan cho, phanghkhauq ma bos das, ge.

¹³Nyamoq taiq zis gas, Lvpe jens gas lyeis dvnghuot, nyamoq mas Yhensain jyank masyah loeus ma yoh. Maukhung Jesphung YHENSAIN Mangso ngos lyis taiq, Yeremia eh, haih dius jens housoeh taiq yvmvyah ngos ngah dang lyis nah nhuot masyah nyi teh kuot das. Dius jens gas thangh teh nyamoq ngeh tyamp das. ge.

¹⁵Israel jens eh, YHENSAIN ka nvng lyis zan das xiklyis we mau masyah dius dvnyau lyis shwih los nyeis. Houka yombos las gohlhain dah dius nyau, nyamoq nyingh lyis namoq ma seqgyo dah dius nyau nghuot.

¹⁶Nyamoq dah lyei baiq bang gas thoeuqzoe jeslo jens nghuot las nhaiq ma nyen lo sat bang nghuot.

¹⁷Nyamoq gas namoq dah jyo yahge zonoms lyis nyhau tyamp das. Nyamoq gas namoq dah loloeu lonyi jens lyis sat das. Namoq dah noeu phung yvng phung lhyi sat zo das. Namoq dah zvbiq nwis, maiphang zains lyis mhont das. Nyamoq dah jesphung ka namoq khau dah thoenkgus jesdvp ciankci wus lyis tsain mhont das.

¹⁸YHENSAIN taiq, Hauh shishenh lyis ngos ngah dius jens lyis shank shoq ma mhont das.

¹⁹Nyamoq, ngos chamus haih cho kuot, ge nyei lyis, Yeremia eh, nyamoq lyis taiq aq, Nyamoq ngah jyank masyah nungs phuk loh las nyamoq nyang mau mas lvbaus mangso lhyi phuqsoe teh, nyamoq mau ma nghuot yvmas lvbaus lyis phuqsoe das.

²⁰YHENSAIN taiq, Yakop vnyau vshih lyis taiq aq. Yuda dius jens lyis taiq aq.

²¹Koh las bang dah dius jens eh, nyoqjeih dap las ma yoh nyvng, no dap las ma yoh xauhgyo bang eh, kamp gyo geh.

²²Ngos YHENSAIN nghuot, namoq ngos lyis chamus ma gyuk ma woms? Namoq ngah xik mas chamus ma nvn? Ngos sihsho lhyi thomh vkhomp khyvlyis toh, thomh ma yoh lai loh, vjangh joq dah vkhomp nghuot. Thomh toq los laus eq ma yoh lai loh, jeisphauq toq laus eq hauh zis ma yoh duon phuiq loh.

²³Nghuot laus eq namoq dius jens, namoq gas ehnyet than lha gomloeus toq bang nghuot las, nungs phuk zis yah ngos lyis toh khoq.

²⁴Dvzvn dvzvn ngos namoq lyis mauxeih maunhungh wus nhang lha namoq lyis jyo yhomh yoq dyei laus eq namoq gas ngos lyis chungh das cho khanhamp eq ma nghamh.

²⁵Hauh gungsthaiq namoq dah yaunos gas haih gis cho lhyi namoq masyah gos shung tyamp.

²⁶Ngah dius jens mas ma gis zis kuot bang lungh joq. Nyamoq gas nghoq twih khyoq bang teh gauh lhom lha dius nyih das xiklyis lhyik thung toh.

²⁷Shoh khat soeu ka kyank mas nghoq yah tyink teh, nyamoq gas nyamoq dah yhen mha lvnyhvp yah tyink toh. Housoeh yvmvyah nyamoq gas yomsoq bos las dis nyeis.

²⁸Nyamoq chamus xauh zo las coeu. Nyamoq dah ma gis zis kuot cho ka ma keq toh. Nyamoq gas chauhlo jens lyis nyamoq dah toeuh ma dyei. Zaiq zis xauh bang lyis lyi jus cho ma chixoeuq.

²⁹Nghuot laus eq ngos YHENSAIN ka haih cho xiklyis nyamoq lyis joeng das. Ngos haih vnyau lyis lvto phuk das.

³⁰Mau mas gyukphoh dvn phoh zis bweh goeus.

³¹Lvpe jens gas hwah cho dvpe, phudyei bang eq lvpe jens taiq toh khyvlyis dvguon. Ngah dius jens eq housoeh teh zis lyis ngwis. Nghuot laus eq hau dvnganh dye lyis nyamoq khasoeh kuot das lah?