Read Achang YEREMIA 52 Bible Online

YEREMIA 52 - Achang bible

YEREMIA 52

¹Zedekia gas nyang guon xi uhlyis aiqci dvzvn nghuot. Nyang Yerusalem mas dvci dvzvn guon khoq. Nyah ungwes gas Libna wus mas Yeremia dah lonyi Hamutal nghuot.

²Nyang gas Yehoiakim kuot khoq vgus, YHENSAIN dah nyoqlvtjvng mas ma gis zis kuot.

³YHENSAIN ka Yerusalem yahge Yuda mau lyis svsoh nhaiqyo las nyang nyamoq lyis nyah xikkhonh masyah khat thuq tyamp. Zedekia gas Babilon hwankti lhyi gomloeus toq.

⁴Housoeh las Zedekia guon zis gau vzvn, dvci vkhyvp, dvci vnyeih lyis Nebukhaneza gas nyah jesphung dvnganh yah Yerusalem wus lyis los zan. Nyamoq gas wus nghe pheh thoenggus kuot las ciank yvmlhaink yah gvduk doeu toh.

⁵Housoeh hauh wus lyis Zedekia guon zis dvci das vzvn jweh shoq lhaink toh.

⁶Hauh zvn nyei vkhyvp, gau vnyeih lyis wus vkhau mha phanghkhauq changh los las dius jens zo das zis cha ma joq lo lyis,

⁷wusciank gas tsain kyungh phank goeus. Babilon bang wus lyis lhaink toh laus eq jeslo jens dvnganh gas nyenh lyis phang luiq loh. Nyamoq gas hwankti ban khyam cho, wusciank aiq puk tsoq dah vjo khomh chank yah phang thuq las Yodan Langhkhau pheh loh.

⁸Nghuot laus eq Babilon jeslo jens gas hwankti Zedekia lyis chank khat loh las Yerikho vnvm pa mha nyang lyis xauh nyhik. Nyah jeslo jens eq nyang lyis tyamp khoq.

⁹Nyamoq gas Zedekia lyis Hamat mau, Ribla wus mas nyeis dah hwankti Nebukhaneza jyank mas shwih loh las nyang houmha Zedekia lyis dang thang thyet.

¹⁰Ribla mas nyang Zedekia dah yukgis lo jens lyis Zedekia yoeuh nyeis lyis sat, Yuda zau jens lyis eq sat.

¹¹Hauh thang lhyi nyang Zedekia dah nyoq eq tsain chet dyei las shamjvng twih zis yah Babilon pheh shwih loh. Zedekia gas shei buisnyeis jweh shoq Babilon thung mha nyeis.

¹²Babilon hwankti Nebukhaneza guon zis dvci gau vzvn, oeng vkhyvp, dvci vnyeih lyis Babilon hwankti lhyi phuqsoe soeu, gungs zungh zau Nebuzaradan gas Yerusalem mas wvng los.

¹³Nyang gas Yhenmuh, hwankti yhen, Yerusalem mas yhen dvnganh, yhen zainsmuh khanghmuh lyis ngheq.

¹⁴Nyah jesphung dvnganh gas Yerusalem lyis lhaink toh dah wusciank dvnganh tsain thyoq khyoq.

¹⁵Gungs zungh zau Nebuzaradan gas nyungs thank bang dvyhamh, wus mas nyet shih bang, nyet shih loqmuh dap bang yahge Babilon hwankti shot pheh dap loh goeus bang lyis shwih jons loh.

¹⁶Nghuot laus eq gungs zungh zau Nebuzaradan gas hauh mau mas, nyungs thank bang dvyhamh lyis zvbiq khyam dyangh das zis yahge yos zwi das zis nyhet toh khoq.

¹⁷Babilon bang gas Yhenmuh mas dah thunk zains jens, lang tyen dah tank jens yah dvgeh thunk thomh lyis tsain bat khyop las hauh thunk dvnganh Babilon pheh yoeus loh.

¹⁸Nyamoq gas phon shang yvmas yhung dah tsoh thauh, nyiyvp kham zis, nyitoengh tuonh yvmas yhung dah vyhang, lomhxangh suih kham khuq jens, xangh ngheq yvmas yhung dah khuq jens yahge Yhenmuh muhzoh mas yhung dah thunk kyahsoe dvnganh eq tsain yoeus loh.

¹⁹Nyamoq gas ngwis, xing yah kuot dah kyahsoe khuqlo, nyibvn, lomhxangh suih kat khuq, nyiyvp kham zis, nyituonh gus, xangh kat ngheq khuq yahge zvbiq jyungshuk huot yvmas yhung dah khuq dvnganh tsain yoeus loh.

²⁰Yhenmuh xiklyis hwankti Solomon kuot toh dah thunk vyhang ka: zains aiq lom, lang tyen tank jens, thomh kuh dvkoeuq, hauh yvlyis thuk toh dah noeulu dvci aiq doeu nghuot. Hauh zis ma yoh thoq laiq lo.

²¹Zains aiq lom gas dvyhangteh nghuot las dvlom gas 27 pe nyhang lha, lomlhaink gas 18 pe nghuot. Houka vkhau tsain khungh las loq 3 shih thoeu. Zains dvlom dvlom dah vthyoh mas 7 pe dvkhyamh nyhang lha, yvmlhaink mas tvleh chvp yah khyamtyet teh shunk toh dah zains tsungh tsain bos. Hau dvnganh lyis thunk yah kuot toh.

²³Dvzains dah khyamtyet thoq mas tvleh chvp dvnganh lyis dvxo xo nghuot. Gauci khyuk chvp lyis gas nyeisjvng masyah nyvng.[18]

²⁴Hauh thoq lyis zau zains Nebuzaradan gas phudyei zainsmuh Seraia, nyah o lhyi gyet, phudyei soeu Zephania, gohtoeu Yhenmuh mas yhaugyen dah zau jens somh yuk moq lyis thung dius khyvlyis shwih jons loh.

²⁵Wus masyah jeslo jens lyis vmingh dyei dah zau dvyuk, wus vkhau mha nyeis shih dah hwankti xam changh nyhet yuk, jeszau dah loqpangh nghuot las jesdvp mas lhaih comh soeu, wus vkhau mha xo nyvng dah hauh mau mas bang khyukci yuk lyis shwih loh.

²⁶Zungh zau Nebuzaradan gas nyamoq lyis nyhik las, Hamat mau Ribla wus mas nyeis dah Babilon hwankti jyank mas shwih loh.

²⁷Babilon hwankti ka nyamoq lyis Hamat mau Ribla wus mas bat sat. Housoeh Yuda dius jens gas nyamoq mau masyah jonsdoeus loh.

²⁸Heika Nebukhaneza thung dius khyvlyis shwih loh dah Jew jens lyis lhaih comh toh cho nghuot. Nyang hwankti doq zis nyhet vzvn lyis somh khyoengh aiqci somh yuk;

²⁹dvci xet vzvn lyis Yerusalem masyah xetxo somhci aiq yuk;

³⁰aiqci somh vzvn lyis Nebuzaradan yah Jew nyhetxo nyeici oeng yuk shwih jons loh. Dvnganh lyis nyei khyoengh khyukxo yuk shwih jons loh.

³¹Babilon mas Ewil Merodak hwankti bweh los zvn lyis, nyang Yuda hwankti Yehoiakhin lhyi thung mhayah phank kat zis yah nyang lyis nhaiqnyen cho chixoeuq. Haih zis bweh zis gas Yehoiakhin jons loh thang lhyi somhci nyhet vzvn, dvci aiq vkhyvp, aiqci oeng vnyeih lyis nghuot.

³²Ewil Merodak gas nyang lyis dang gis jis las Babilon mas nyang yah nyeis dah hwankti jens thoq lyis zes dah joqyos dyei.

³³Housoeh Yehoiakhin lyis nyah thung dyimis thaiq tyamp nhang. Nyang kang dwis nyeis dvchank hwankti zojus mas zo shuk nhang.

³⁴Babilon hwankti ka Yehoiakhin kang dwis nyeis dvchank, nyang shei shoq dvnyeih dvnyeih nyang chah dah zokho lhyi top top dyei.