Read Achang YEREMIA 6 Bible Online

YEREMIA 6 - Achang bible

YEREMIA 6

¹Benyamin jens eh, luiq das xiklyis phang geh. Yerusalem masyah phang luiq geh. Tekoa mas lvbuh muot geh, Bet Hakerem mas vlho nyiduk tuk geh: dyoqbis zainsmuh yahge thyoqpi cho ka mautsung pheh yah los bah ge.

²Zion wus gas yungh laus eq monh tyamp lo das.

³Hwankti jens gas nyamoq dah jesphung yah dvgeh houmha tsain thoeng das. Wus yvmlhaink yah hank eq hank nyamoq o yvmas thoeng das zvng tsain kuot.

⁴Nyamoq taiq das zis gas, Yerusalem lyis zan das zis sont geh! Cicont kuot geh, yang nyeihgungs lyis zan das, ge. Nghuot laus eq hauh thang lhyi nyamoq taiq zis gas, Nyeih thank bah ge goeus, thang gyoh goeus mau chuot los las son xing.

⁵Yang nyenh lyis zan das. Yang wus thoenkgus jesdvp lyis tsain mhont das.

⁶Maukhung Jesphung YHENSAIN haih hwankti jens lyis vmingh dyei zis gas, Yerusalem wus lyis lhaink das xiklyis saiqzains thoeuq las gvduk kuot geh. Nyang taiq zis gas, Ngos haih wus lyis joeng das: khasoeh ge lyis houmha zaiq cho yah dyingh joq.

⁷Jeis dwang gas cingh dah jeis thuq teh, Yerusalem gas ma gis zis thuq nyeis. Ngos wus khau mha lhuot zo cho yahge, thyoq sanh thwe xauhgyo. Nosthyoh yahge dvmdap cho nyvng.

⁸Yerusalem bang eh, haih yau cho ka namoq xiklyis zaih nhang zis nghuot bas jungh. Nghuot ya, ngos namoq lyis tyamp das, ngos namoq dah wus lyis hank ma nyeis dah joqyos, sihyos kuot das.

⁹Maukhung Jesphung YHENSAIN ngos lyis taiq: Israel jens lyis shih dvnganh thyoq goeus dah zvbiq khyam teh shank shoq thyoq das. Housoeh las shishenh bos shih lyis namoq yuk khanghmuh lyis duot nyhoq khyuot chah, ge.

¹⁰Ngos toeuh zis gas, Ngos nyamoq lyis taiq las zaih nhang lhyi hank gyo dyei das lah? Nyamoq gas nhaiqlom than lha nah loeus lyis gyo das zis ngoek. Nvng ngos lyis taiq aq ge yvlyis tsain yis.

¹¹YHENSAIN eh, nvng nyamoq lyis tyi nhaiqyo zis gas ngos lyis eq ngeh nhang. Ngos ma yoh jhen toh lo, oen. Hauh thang lhyi YHENSAIN ngos lyis taiq: ngah nhaiqyo cho lhyi cho mha loshang jens lyis eq huom nyei dah loyvm jens thoq mas huot khyoq aq. Yhensain phoq, yhensain nyhiq lyis shwih loh das, svsoh mang goeus bang lyis yangh ma nyhet toh das.

¹²Nyamoq dah yhen, nyamoq maunyeis, nyamoq yhensain nyhiq jens gohyuk lyis dyei tyamp das. Ngos haih mau mas dius jens lyis joeng das.

¹³Kuh bang ngis bang yuk khanghmuh ma jyoeng khyvlyis ngwis tungh xo mes. Lvpe jens yahge phudyei bang yangh dius jens lyis tsain mhuih.

¹⁴Nyamoq gas ngah dius jens dah dvm lyis dvtsiq khyet zis dvnghuot khyvlyis kuot. Dvnganh ma gis nyeis uhlyis, dvnganh gis joq ge tsain taiq.

¹⁵Nyamoq hai hoeng phoh zis kuot goeus yvmvyah vxoq au? Ma xoq, nyamoq khasoeh xoq das zis yangh ma seq. Housoeh las nyamoq gas gohyhamh bang lains teh lains das. Ngos nyamoq lyis joeng uhlyis nyamoq thank tyamp das. Ngos, YHENSAIN taiq goeus.

¹⁶YHENSAIN nyah dius jens lyis taiq. Chokangh mas yap las yoeuh aq. Chocauh yahge gis thank cho khah zis nghuot oen nyei gyo las houchank loh aq, houlhyi nvng nyenstap zis yah xauh nyeis das. Nghuot laus eq nyamoq gas, Ngamoq houcho ma loh das, ge.

¹⁷Hauh thang lhyi YHENSAIN ka taiq nhauh dah lvbuh thwe gyo das xiklyis zungh bang lyis toeuq toh. Nghuot laus eq nyamoq gas, Ngamoq ma gyo das, ge.

¹⁸Housoeh las YHENSAIN taiq, Namoq dius nyau jens eh, gyo geh, ngah dius jens mas cha bweh los das zis xuq geh.

¹⁹Nyeisjvng eh, gyo aq! Nyamoq dah nghamh toeuq cho xiklyis joeng cho khyvlyis ngos haih dius jens thoq mas thyoqpi cho she los nyeis. Khasoeh ge lyis nyamoq ngos jyauh cho lhyi peq tyamp, ngah dang lyis domsyos ma gyo.

²⁰Sheba masyah ngah jyank mas chi los dah loban, mau we mas dah cheih xangh lyis ngos chamus loqzamh zwi das? Ngos nyamoq dah jyungshuk lyis ma lhom yoeus das. Nyamoq dah phudyei lyis nhaiq ma doeus das.

²¹Housoeh yvmvyah ngos haih dius jens lyis thungh lains nhang das. Nyhiphoq yahge lo jens shei das. Yhenkyoh bang eq dyenschangh jens eq shei das, ge.

²²YHENSAIN taiq: dius jens gas mautsung pheh dah mau masyah los nyeis. Mau we mas dah yombos dius dvnyau jeszan das zis sont nyeis.

²³Nyamoq gas lyei yahge moengsa tsain chi toh. Nyamoq gas lhoeng lha nhaiqnyen cho ma bos. Nyamoq nyang ji los zis yah dvyhangteh thwe ka thomh nyings teh nyings huomh toh. Nyamoq gas Yerusalem lyis tyi lha jeszan das xiklyis cicont nghuot, ge.

²⁴Yerusalem bang taiq zis gas, Ngamoq hauh loeus xauhgyo las ngamoq dah loq tsain nvn. Ngamoq gas yaukyenh cho yah zaiq las vmesbih lokhoeu nos changh teh nos nyeis.

²⁵Ngamoq boms mau mas ma womh loh, cho mha ma womh suh: Khasoeh ge lyis ngamoq dah jeswus gas jes gungs yah ngamoq yvmlhaink mas gyukphoh nghuot, ge.

²⁶YHENSAIN nyah dius jens lyis taiq: Yanghthung dyi wuot las nyiyvp mas lhoeuh geh. Loteh xiklyis kukxi teh kuk geh. Khasoeh ge lyis namoq lyis thyoqpi das xiklyis los soeu ka nyetlos nyettant thyoq das.

²⁷Yeremia eh, ngah dius jens lyis ngwis xing lhyi kyink teh kyink las nyamoq cha yah doeus zis xo yoeuh aq.

²⁸Nyamoq dvnganh gas nhaiqlom than dah gomloeus toq bang nghuot, thunk yahge thyeq teh than. Nyamoq dvnganh dyoqbis goeus. Nyamoq dvkhau yah khyangh pu yenh.

²⁹Thyeq nyikhyomp gas gyukphoh ngeh nyeis. Nghuot laus eq thyeq nyop gas ma yaus. Ngah dius jens lyis kyink loh zis gas vkyuh ma bos, ma gis zis kuot bang lyis ma yoh phe tyamp.

³⁰Hauh yvlyis gas phauh ma dap dah nyop ge dvlui. Khasoeh ge lyis Ngos YHENSAIN nyamoq lyis peq tyamp, ge.