Read Achang YEREMIA 7 Bible Online

YEREMIA 7 - Achang bible

YEREMIA 7

¹YHENSAIN ngos lyis, Yuda jens wvng las paiq dah Yhenmuh khyam khomh mas nhang. Nyang ngos lyis houmha yap las Israel dah Mangso, Maukhung Jesphung YHENSAIN cha taiq zis nyamoq lyis taiq chah zis taiq hoeuh aq ge taiq. Namoq kang dwis cho yahge namoq kuot nyeis cho thaiq geh. Housoeh lyis ngos namoq lyis heimha tsoq nyeis loh nhang das.

⁴Haih zis YHENSAIN dah Yhenmuh, Haih zis YHENSAIN dah Yhenmuh, Haih zis YHENSAIN dah Yhenmuh nghuot, yang jesluiq ge hau mhuih dang lyis vloms goh.

⁵Namoq kang dwis cho thaiq, namoq kuot nyeis cho no toh geh. Dvyuk yah dvyuk zomh cho mha lyi jus khyvlyis kuot geh.

⁶Lvbaus, chauhmuh chauhlo lyis zaiq cho no, haih mau mas tswi ma bos bang lyis sat cho no toh geh. Gohtoeu mangso lhyi paiq cho no toh geh. Hauh zis namoq lyis thyoqpi das.

⁷Namoq thaiq lyis gas ngos namoq dah phauh thyeih moq lyis vcaiq vto sain nhang toh dah haih mau mas tsoq nyeis loh nhang das.

⁸Yoeuh aq, namoq gas, mhuih dang mas loms toh.

⁹Namoq gas khauh, dius sat, nyi lvng shuot, kyamptang yvmas hwah, Bala lyis phudyei, namoq xikpheh namoq ma seq ku dah mangso jens lyis paiq.

¹⁰Namoq hai ngos hoeng zis tsain kuot lho lha, ngah Yhenmuh khau, ngah xikkhonh mas los yap las, Ngamoq jesluiq ge sang.

¹¹Nvng ngah Yhenmuh gas khyanktau khyung nghuot oen nghamh lhyeh? Nvng cha kuot yvlyis ngos nyvng.

¹²Paiq das xiklyis ngos khyen dah cangxeih joqyos Shilo[1] mas loh aq. Ngah dius Israel jens dah yaunos gvng mas ngos hauh yvlyis cha kuot khoq zis nvng nyvng das.

¹³Namoq haih yaunos dvnganh kuot cu goeus. Ngos namoq lyis doms taiq doms taiq laus eq namoq gyo das zis ngoek. Ngos lui lyis nvng ma toeuh.

¹⁴Housoeh las ngos Shilo wus lyis kuot teh, hai namoq loms toh, ngah Yhenmuh lyis ngos housoeh kuot das. Ngos namoq yahge namoq dah phauh thyeih moq lyis dyei dah haih joqyos lyis eq ngos Shilo wus mas kuot khoq zis yah dvyhangteh kuot das.

¹⁵Ngos namoq dah buisnoms Israel jens lyis khat tyamp teh, namoq lyis ngah nyoqlvtjvng masyah khat tyamp das. Ngos YHENSAIN taiq goeus.

¹⁶YHENSAIN taiq: Yeremia eh, haih dius jens xiklyis shvmanh vdung. Nyamoq gungsthaiq vngaus, vdung. Ngos ma gyo dyei das las ngos lyis vkhyoeuq dung.

¹⁷Nyamoq Yuda wus jens yahge Yerusalem talhoeu mha cha kuot zis nvng ma nyvng lhyeh?

¹⁸Ngos lyis nos nhang das ge, nyamoq Maukhung hwankti Nyhiq ge lui dah gywes nyhiq xiklyis ohlhyoq piq das ge loshang jens thangh kui, yukgis jens nyi khat, vmesbih jens ohlhyoq tsain nis. Nyamoq gohtoeu mangso jens lyis zvbiq jyungshuk tsain huot.

¹⁹Nghuot laus eq ngos gas nyamoq nos nhang nyeis soeu nghuot jyoeng lhyeh? Ma nghuot, nyamoq gas nyamoq nyang dvnos zo, nyamoq mas xoqphuh cho dvshe los.

²⁰Housoeh las ngos Yomzains YHENSAIN ngah gyukphoh nhaiqyo zis haih Yhenmuh thoq mas huot khyoq das. Ngos hauh yvlyis dius yahge gaunyhauq thoq mas eq dvyih huot khyoq das, saiqzains yahge jyo thoq mas yangh huot khyoq das. Ngos nhaiqyo zis gas nyi teh nghuot las hank ma yoh sat.

²¹Ngah dius jens, namoq lomhxangh dvkhamh lyis phon mha tyeihsop ngheq dyei. Dvkhamh lyis namoq zo das zis tung toh. Nghuot laus eq ngos YHENSAIN taiq zis gas, Namoq dvnganh gis zo.

²²Ngos namoq dah phauh thyeih moq lyis Egutu masyah shwih los uhlyis, ngheq dyei jyungshuk cho, nghuot ya gohtoeu lomhxangh cho tying toh zis cha ma bos.

²³Nghuot laus eq nyamoq ngah domsyos gyo das zis tying toh. Housoeh ngos nyamoq dah Mangso duot las, nyamoq ngah dius duot das. Ngos nyamoq lyis tying toh cho chank zis yah kang dwis lyis nyamoq nyeisgis yaplhoq das, oen taiq toh.

²⁴Nghuot laus eq nyamoq domsyos ma gyo, ma kamp gyo. Hauh gungsthaiq nyamoq ehnyet than lha nyamoq dah ma gis ehnyet taiq khyvlyis kuot. Housoeh las nyamoq zes gis los das gungsthaiq zes chah loh.

²⁵Namoq dah phauh thyeih moq Egutu masyah thuq los nyeih masyah khvnyhik jweh shoq, ngos ngah jyeidwis jens, lvpe jens lyis namoq jyank nhang nyeis.

²⁶Nghuot laus eq hank ma gyo, ma kamp gyo. Hauh gungsthaiq, namoq nhaiqlom zes than lha namoq dah phauh thyeih moq thoq lyis gomloeus zes toq.

²⁷Housoeh las Yeremia eh, nvng ngah dius jens lyis haih dang dvnganh taiq aq, nghuot laus eq nyamoq nvng lyis ma gyo dyei das. Nvng nyamoq lyis lui das laus eq nyamoq ma toeuh das.

²⁸Nvng nyamoq lyis taiq das zis gas, Nyamoq dah dius nyau gas ngos YHENSAIN, nyamoq dah Mangso domsyos ma gyo, joeng cho mhayah eq ma xuq. Lomluk cho ka shei goeus. Hauh cho taiq yangh ma taiq lo.

²⁹Yerusalem bang eh, kuk geh. Namoq cam thyet las doeuh tyamp geh. Jing thyoh mas mvng lyangh geh: khasoeh ge lyis ngos, YHENSAIN nhaiqyo las ngah dius jens lyis peq goeus.

³⁰Yuda jens gas ma gis zis kuot goeus. Nyamoq gas ngos hoeng dah phvra lyis ngah Yhenmuh mas toh las hauh yvlyis vwot v-oeu kuot.

³¹Nyamoq gas Hinom Langhkhau mha Tophet ge dah phon dvkoeuq ci lha houmha nyamoq dah loloeu lonyi jens lyis nyi yah ngheq phudyei. Hauh zis ngos ma tying, ngah nhaiq mas yangh ma nghamh.

³²Housoeh las hauh yvlyis Tophet, nghuot ya Hinom Langhkhau ge ma lui lo, Sat Langhkhau ge lui das shishenh jweh los das. Nyamoq houmha dius nyhop das: khasoeh ge lyis nyamoq lyis nyhop das joqyos khamha eq ma bos lo das.

³³Mvng gas nghoq yahge yewus xiklyis zos tsain duot das. Nyamoq lyis hank eq ma kyuk ma tant das.

³⁴Hauh mau gas jyamhjyuklhyuk mus das. Yuda wus jens mas, Yerusalem talhoeu mha gauslaus thwe, yis thwe, nyihwank pwe pyo thwe thank loh nhang das, ge.