Read Achang YEREMIA 9 Bible Online

YEREMIA 9 - Achang bible

YEREMIA 9

¹Ngah uhloms gas jeis dwang, ngah nyoqjeih gas nyoqdyeis thuq dah jeis lvng nghuot phoh ya, sat xauh dah ngah dius jens xiklyis ngos nyeih nyenh yoh ngaus das.

²Sihyos mas ngos loh nyeis das joqyos bos phoh ya, ngos ngah dius jens masyah phang loh das. Khasoeh ge lyis nyamoq dvnganh gas lom ma luk, dang ma jings dah dius phung nghuot.

³Nyamoq gas vjangh yah hwah das zis cicont nghuot. Jyoeng dah gungsthaiq dang ma jings zis yah mau lyis guon. YHENSAIN taiq, Ngah dius jens gas ma gis cho dvkoeuq thang lhyi dvkoeuq kuot. Nyamoq ngos lyis nyamoq dah Mangso khyvlyis ma rhen, ge.

⁴Yuk khanghmuh nyamoq dyenschangh lyis zaih chah, hank eq nyamoq buisnoms lyis ma yoh loms. Khasoeh ge lyis buisnoms dvnganh gas Yakop teh mhuih bang nghuot. Yuk khanghmuh gas nyamoq dyenschangh jens lyis loeusmus khyangh sang bang nghuot.

⁵Nyamoq dvnganh gas nyamoq dah dyenschangh lyis cho shwih shuot, hank eq jus zis ma taiq; nyamoq gas nyamoq lhyo lhyi hwah das zis jyauh las nyamoq dah yaunos kuot cho ma toh tyamp das. Nyamoq gas thyoqzo cho dvkoeuq thang lhyi dvkoeuq kuot las mhuih zo cho dvkoeuq thang lhyi dvkoeuq chank los. YHENSAIN taiq, Nyah dius jens gas nyang lyis peq, ge.

⁷Haih gvng mas Maukhung Jesphung YHENSAIN taiq, Ngos nyamoq lyis ngwis xing lhyi nyi mas ngheq shauq las kyink teh kyink das. Ngah dius jens ma gis zis kuot goeus, ngos nyamoq lyis cha yoh kuot shih das lah?

⁸Nyamoq dah lhyo ka zuk dah nyo teh nghuot. Nyamoq vjangh hwah dang taiq. Yuk khanghmuh nyah yhenkyoh lyis dang gis taiq, nghuot laus eq nyah nhaiqlom mas gas nyamoq xiklyis lhyik thung nyeis.

⁹Haih nyhenshang ngos nyamoq lyis ma joeng das lah? Heisoeh teh dius nyau lyis ngos lvto ma phuk das lah? Ngos, YHENSAIN taiq goeus.

¹⁰Ngos taiq, Ngos boms xiklyis kuk das, katjang xiklyis ngaus das: khasoeh ge lyis hauh zis dye kyuk goeus, hank eq ma suh lai lo. Nyhoeu toh gaunyhauq thwe ma xauhgyo lo. Nghoq jens yahge yewus jens eq phang dyuk goeus.

¹¹YHENSAIN taiq, Ngos Yerusalem lyis mhotkhyot zungs, cauhpau jens nyeis joqyos kuot das. Yuda wus jens eq dius ma nyeis joqyos, sihyos bweh das.

¹²Ngos nyei zis gas, YHENSAIN eh, chamus haih mau gas dyoqbis las sihyos teh kyuk loh? Houcho hank eq ma suh lai loh lo. Haih yvlyis seqgyo shoq joeui bos soeu hank nghuot lah? Nyamoq gohyuk lyis yoh taiq kyoh shoq nvng hank lyis phui kyoh goeus lah?

¹³YHENSAIN taiq, Ngos ngah dius jens lyis dyei dah jyauh cho lhyi nyamoq tyamp yvmvyah haih cho bweh los. Ngah domsyos ma gyo, ngos taiq zis ma kuot.

¹⁴Hauh gungsthaiq nyamoq nhaiqlom than lha nyamoq dah phauh thyeih moq kuot das zis jyauh vgus Bala phvra lyis tsain paiq.

¹⁵Housoeh las Ngos, Maukhung Jesphung YHENSAIN, Israel dah Mangso cha kuot das zis gyo aq. Ngos ngah dius jens lyis khoh dah vzains zo nhang das, nyonoq jeis shuk nhang das.

¹⁶Ngos nyamoq lyis nyamoq eq nyamoq phauh thyeih moq eq ma xauhgyo ku dah dius nyau jens mas sanh tyo tyamp das. Ngos nyamoq lyis tyi dah jesphung lhyi nhang lha nyamoq lyis shank shoq mhont das, ge.

¹⁷Maukhung Jesphung YHENSAIN taiq: Cha mus nyeis yvlyis nghamh yoeuh geh, kukngaus das bang los das zis khi geh. Mvng lyangh das vmesbih jens lyis khi geh.

¹⁸Dius jens taiq, Yah nyoqjeih mas nyoqdyeis yah dyingh las yah nyoqkuk jyweq shoq ngaus das zis nyamoq lyis lvnyap kuot las yah xiklyis mvng lyangh geh oen taiq geh.

¹⁹Zion mha ngaus thwe gyo geh. Ngamoq thyoqpi zis xauh goeus! Ngamoq loh thank shoq nyoqnho ngelang gyoh goeus! Ngamoq gas ngamoq mau masyah thuq chah goeus. Ngamoq yhen ka thyoq khyoq goeus.

²⁰Ngos taiq, Vmesbih jens eh, YHENSAIN dang gyo yoeus geh, nyah dang lyis kamp gyo geh. Namoq lonyi jens lyis khasoeh kuk das zis yahge namoq dah dyenschangh jens lyis mvng khasoeh lyangh das cho jyauh geh.

²¹Shei cho ka ngamoq dah khomhbaiq chank yah los las ngamoq dah hwankti yhen mha wvng los. Houka loshang jens lyis talhoeu mha jap khyoq las, loyvm jens lyis kaih jang mas jap khyoq.

²²Shei mvng gas nyang tsainh toh joqyos mas jenh zungs teh, guk yet bang thang mha gyoh joq las hank ma tsainh dah jyo teh dvkhauyah dyos sanh joq. Heika YHENSAIN ngos lyis taiq aq ge zis nghuot.

²³YHENSAIN taiq, Joeui bos bang gas nyamoq dah joeui mha ma gis khwank, yombos bang eq nyamoq yom mas ma gis khwank, dis bang eq nyamoq yohkhuiq cho mha ma gis khwank.

²⁴Dvyuk yuk khwank mes lyis, ngos lyis seq cho yahge ngos lyis seqgyo dyei cho mha dvkhwank chah. Khasoeh ge lyis ngah jyetdap cho ka doengs joq, ngos gas jyoeng cho yahge dan cho lhyi kuot. Heika ngos lyis nhaiqdoeus nhang zis tsain nghuot. Ngos, YHENSAIN taiq goeus.

²⁵YHENSAIN taiq, Cam lyung lyung thyet bang[3] ge Egutu dius, Yuda dius, Edom dius, Amon dius, Moab dius yahge sihyos mas bang lyis ngos joeng das shishenh jweh los. Haih bang dvnganh gas vthyoh tyomh bang nghuot. Nghuot laus eq nyamoq gas hauh vlho thanghchvp lyis ma chank. Haih dius jens mas hank eq, Israel dius jens mas hank eq ngah thanghchvp lyis ma chank, ge.