Read Achang KUK 1 Bible Online

KUK 1 - Achang bible

KUK 1

¹Gohlhain dius dyingh dah Yerusalem wus gas khasoeh nyang kyingh joq joq! Gohlhain Mungkvn yah chungh zis xauh dah wus gvshih gas chauhmuh teh nghuot joq. Yunghshop thank dah wus jens gas jonsdoeus loh goeus.

²Nyang dvnyens gonh ngaus las nyah bvlot mas nyoqdyeis yaus gyoh. Nyang lyis nhaiqtaink das zis nyah dyenschangh cauh jens dvyuk eq ma nyet lo. Nyang yah buisnoms kuot toh bang eq nyang lyis phanhlyen las gvshih dvnganh nyang lyis tyi loh goeus.

³Yuda dius jens gas mvshohjyen jons tsain nghuot, nyamoq lyis yhen mhayah tsoengh shwih loh. Nyamoq gas nyamoq nyang zis oen lui das joqyos ma bos dah gohmau mas nyeis. Jeswus jens yah tsain lhaink toh las phang luiq das cho ma bos.

⁴Gvshih gyingshang buisnyeis lyis paiq das nyhenshang Yhenmuh mas hank eq ma los. Houmha chunghthwe kat dah lonyi jens shanghsenh nyeis, phudyei bang eq nos dvyoh kyingh lo. Wus khomh jens gas vkom dvjoq las Zion ka loh thank shoq nos nyeis.

⁵Nyah jeswus jens nyang lyis ung loh; nyamoq dah yomsoq khau mha nyang lyis zwi toh. Nyah yaunos nyoshoq gvng mas YHENSAIN ka nyang lyis nos nhang. Nyah lo jens lyis nyhik las shwih jons loh.

⁶Yerusalem dah yunghshop nyings hoeuh cho ka lai loh goeus. Nyah uhshe bang gas yuot shet las yomnhuk dah cvtzains teh nghuot. Hauh cvt jens gas shoh khat bang masyah phang lha yom vluk thank goeus.

⁷Gvshih Yerusalem gas dyoq gyoh las mvshoh jyen nhaiqngis nyeis. Nyang xikpheh yoh dah yunghshop cho dvnganh lyis soh nyeis. Nyah dius jens lyis jeswus yah ung loh uhlyis pangh soeu ma bos yvlyis soh nyeis. Nyah jeswus jens nyang dyoqbis yvlyis nyvng las tsain nyhap.

⁸Yerusalem gas gyukphoh yaunos kuot goeus las nyang ma lhoq ma shang. Housoeh las nyang nyoqnho ngelang ma bos lo. Nyang gas shohchen nghuot las xoqphuh goeus. Nyang gas noskyingh las xoq zis yah nyah nyoqnho shung tyamp.

⁹Nyah ma lhoq cho dede dwvng laus eq nyah uhpui loqkyoq lyis ma sen teh dvchixoeuq. Nyang gyoh cho ka gyukphoh nghuot. Nyang lyis nhaiq hank ma yoh taink lo. Nyah jeswus jens nyang lyis ung goeus las nyang YHENSAIN lhyi Nhaiqnyen aq, ge ngaus.

¹⁰Jeswus gas nyah zisyos dvnganh lhuot loh. Nyamoq gas YHENSAIN gohnyau bang lyis ma wvng nhang dah Yhenmuh mas wvng loh yvlyis nyang nyvng.

¹¹Nyah dius jens gas zo das zis dvja ja xo uhjyangh noskyingh. Nyamoq gas nyamoq kang dwis das nyhenshang phauhdap zisyos yah zonoms thaiq. Hauh wus gas, YHENSAIN eh, ngos lyis yoeuh dyei aq, ngos nhaiqngis yvlyis nyvng dyei aq, ge ngaus.

¹²Houchank suh lai loh bang yuk khanghmuh lyis, Ngos lyis yoeuh geh. Houka YHENSAIN nhaiqyo uhlyis ngah thoq mas she los dah nos teh hank nos ku lah, ge kaiq ngaus.

¹³Nyang nyhang mhayah nyi khyoq las hauh zis gas ngah vkhau mha ngeh loh. Nyang ngos lyis lhyik thung lha nyeisjvng mas she khyoq. Hauh thang lhyi nyang ngos lyis tyamp las ngos lyis vjangh nos nhang toh.

¹⁴Nyang ngah yaunos dvnganh lyis comh las dvgeh twih dain zis yah ngah lainzain mas lhangh dyei. Ngos gas hauh yvwons vkhyei mas yomnhuk loh. YHENSAIN ka ngos lyis ngah jeswus lyis kyauh las ngos mvshohjyen ma yoh thoenk yap.

¹⁵Yhensain ka ngah jes thoeuqzoe jens dvnganh lyis yis. Nyang ngah loyvm jens lyis mhont das zis jes dvphung nhang. Nyang ngah dius jens lyis zvbiq nyhet zwvng mas zvbiq lyis teh gyik thyi tyamp.

¹⁶Housoeh yvmvyah ngah nyoqjeih mas nyoqdyeis shuon. Ngos lyis nhaiq hank ma yoh taink. Ngos lyis yom hank ma yoh dyei. Jeswus jens ngos lyis ung loh las ngah dius jens mas cha ma nyet lo.

¹⁷Ngos ngah loq yhonh kat laus eq ngos lyis hank ma pangh das. YHENSAIN ka ngos lyis tyi lha shot khanghmuh masyah jeswus jens lyis khi toh. Nyamoq ngos lyis ma lhoq dah vyhang lhyi teh tsain kuot.

¹⁸Ngos nyah domsyos ma gyo dah nyhenshang YHENSAIN kuot zis lyi jus. Dius jens dvkhauyah bang eh, gyo geh, ngos nos cho lhyi yoeuh geh. Ngah loloeu lonyi jens gas jonsdoeus loh goeus.

¹⁹Ngos ngah buisnoms kuot toh bang lyis lui laus eq nyamoq ngos lyis pangh das zis ngoek. Phudyei bang yahge uhshe bang gas nyamoq kang dwis das zis zonoms xo uhlyis wus talhoeu mha tsain shei.

²⁰YHENSAIN eh, ngos chiqjyen yvlyis yoeuh dyei aq. Ngah dyos shanghsenh nyeis. Ngah yaunos gvng mas ngos kuk las nhaiqlom thank. Wus talhoeu mha dius sat, yhen khau mha yangh shei cho bos.

²¹Ngos noskyingh zis nyamoq xauhgyo laus eq ngos lyis nhaiqtaink das soeu hank ma bos. Nvng ngah thoq mas she kat dah dyoqbis zainsmuh lyis ngah jeswus jens gas gaus. Nvng ngah jeswus jens lyis ngos xauh teh xauh nhang das ge dangthoengh toh dah buisnyeis she kat aq.

²²Nyamoq dah lhung cho dvnganh xiklyis dang thang thyet aq. Nvng ngah yaunos gvng mas ngos lyis joeng teh nyamoq lyis joeng aq. Ngos gas nhaiqngis zis yah noskyingh las ngah nhaiqlom mas nos nyeis.