Read Achang KUK 2 Bible Online

KUK 2 - Achang bible

KUK 2

¹Yhensain ka nhaiqyo las Zion lhyi mauchuotdwang yah nghop tyamp. Nyah Maukhung mha dah yunghshop cho lhyi thyoqpi yvpheh lhaiq kat. Nyang nhaiqyo buisnyeis lyis nyah Yhenmuh lyis yangh doeuh tyamp.

²YHENSAIN ka Yuda mau mas dah wukhau khanghmuh lyis nhaiq ma nyen lo mhont. Hauh mau lyis khomp toh dah thoenkgus jesdvp jens lyis thyoq khyoq. Nyang hau munghdan yahge nyah guon bang thoq mas nyoqnho ngelang gyoh cho she los.

³Nyang phot phot tsoeu lha Israel dah yom lyis dvyos dvsanh kuot. Jeswus jens los lyis nyang ngamoq lyis pangh das zis ngoek. Nyang ngamoq lyis nyi soeh ngeh las dvnganh mhont tyamp.

⁴Jeswus teh nyang nyah nyo-uh ngamoq jyank pheh yings toh. Ngamoq jyetdap las nhaiq twih toh bang dvnganh lyis sat. Haih Yerusalem mas ngamoq nyah dah nhaiqyo nyi ngeh nyhink.

⁵Yhensain ka Israel jens lyis nyah jeswus lyis teh mhont. Yhensain ka nyah thoenkgus jesdvp yahge hwankti yhen jens lyis thyoq khyoq toh. Nyang gas Yuda dius jens thoq mas ma thank lo dah kuk cho she los goeus.

⁶Nyang gas ngamoq nyang lyis paiq dah Yhenmuh lyis gyik thyi tyamp. Nyang gas gyingshang nyeih yahge no nyeih lyis thank tyamp nhang. Nyang nhaiqlom tsoeu zis yah hwankti yahge phudyei soeu lhyi peq tyamp.

⁷Yhensain ka nyah phon lhyi peq tyamp, nyah Yhenmuh lyis eq doeuh tyamp goeus. Jeswus lyis hau wusciank thyoq das toeuh dyei goeus. Xik pheh ngamoq gauslaus zis yah paiq yvmas nyamoq ung cho kaiq goeus.

⁸YHENSAIN ka Zion wusciank gyoh chah ge nghamh thyet goeus. Mhont chah zis dvnganh monh shoq nyang mvvs lang zis yah keq goeus. Gvshih tyoeuq zvm jens yahge wusciank jens dvgeh dyoq gyoh joq goeus.

⁹Wus khomh jens gas nyeis mas nyop joq nyamoq dah khomh kyank jens lyis thungh thyi tyamp. Gvshih hwankti yahge nyah zau jens gas jonsdoeus loh goeus. Lyi ma jyauh lo. Lvpe jens gas YHENSAIN jyank masyah nyoqnyvng ma xauh yoeus.

¹⁰Yerusalem mas dah uhshe bang dius cauh jens gas nyeisjvng mas samlo tsung toh. Nyamoq gas nyamoq dah uhloms mas tsohmop lhyauq, gungs mas yanghthung dyi wuot toh. Lonyi jens gas nyamoq dah uhloms nyeisjvng mas gop joq.

¹¹Ngos ngaus las ngah nyoqjeih thop, ngah dyos shanghsenh nyeis. Ngos gas ngah dius jens dyoqbis las kuk zis yah daus nyeis. Loshang jens yahge nauh noeuh jens gas wus talhoeu mha chuot loh.

¹²Lo jens gas zosyuot jeis shet las nyamoq dah ungwes moq jyank mas ngaus. Nyamoq gas wus talhoeu mha dvmdap bang teh lains loh las, zoh yah nyamoq ungwes moq sainhkhonh mas shei.

¹³Yerusalem eh, Jyet dah Yerusalem eh, ngos cha yoh taiq? Ngos nvng lyis nhaiq khasoeh yoh taink das! Hank khanhamp eq heisoeh ma xauh kham ku. Nvng xauh dah dyoqbis zainsmuh gas vkyo ma bos dah thomh teh nghuot. Houmha gis bweh dah nghamhloms cho ma bos.

¹⁴Nah lvpe jens gas, nvng lyis hwah dang kyingh dvtaiq dyei. Nyamoq dah taiq dyei cho ka nvng lyis mhuih las nah yaunos khanhamp eq ma phant thuq dyei. Nyamoq gas nvng lyis nhaiqlom ma thaiq noh ge nghamh nhang.

¹⁵Hauh wus cho suh lai bang dvnganh gas nvng lyis jwangh nyhap zis yah yoeuh. Nyamoq gas uh tyi zis yah dyoq gyoh joq dah Yerusalem lyis yis las, Haih wus gas yungh dah wus ma nghuot lhyeh? Haih zis mungkvn dah khwank joqyos ma nghuot lhyeh, ge.

¹⁶Nah jeswus dvnganh gas nvng lyis jwangh, hoeng zis yah yoeuh. Nyamoq nhuot yhont las, Ngamoq hauh yvlyis mhont goeus. Haih zis ngamoq langh nyeis dah buisnyeis nghuot, ge.

¹⁷YHENSAIN ka nyang kuot das ge taiq toh zis thang thank lyis kuot goeus. Gohlhain yah zaih nhang toh zis yah dvyhangteh nyang nhaiq ma nyen lo mhont goeus. Nyang gas ngamoq dah jeswus lyis ung cho dyei, ngamoq mhonh loh cho mha nyamoq lyis gauslaus cho dyei.

¹⁸Dius jens dah nhaiqlom gas Yhensain lhyi ngaus. Yerusalem eh, nah wusciank gas YHENSAIN lhyi ngaus bas jungh. Nah nyoqdyeis gas nyeih nyenh jeislvng soeh yaus bas jungh. Nah nyoqjeih ngaus las kuk zis lyis vno toh.

¹⁹Nyenh lyis doms toq doms toq las YHENSAIN lhyi ngaus aq. Nah nhaiqlom nyah jyank mas jeis soeh huot kat las nah loshang jens lyis nhaiqnyen das xiklyis dung aq. Loshang jens gas yuot shet las cho thunk khanghmuh mas shei loh nyeis.

²⁰YHENSAIN eh, yoeuh aq, nvng ngamoq lyis heisoeh chamus joeng? Vmesbih jens gas nyamoq jyet dah lo jens shoh gis zo lhyeh? Phudyei bang yahge lvpe jens lyis eq Yhenmuh mas gis sat lhyeh?

²¹Ngislo kuhlo talhoeu mas dvyhangteh shei joq. Loloeu lonyi jens gas jeswus sham yah sat zis xauh. Nvng nah nhaiqyo buisnyeis lyis nyamoq lyis nhaiq ma nyen lo sat goeus.

²²Pwe nyeih lyis dius khi teh nvng ngah jeswus lyis ngah yvmlhaink gyukphoh zis khi toh. Nvng nhaiqyo nyeih lyis hank eq ma yoh phang luiq. Nyamoq gas ngos nyhoeu bes las jyet dah ngah lo jens lyis tsain sat.