Read Achang KUK 3 Bible Online

KUK 3 - Achang bible

KUK 3

¹Ngos gas Mangso yah joeng chah zis cha nghuot yvlyis seq soeu nghuot.

²Nyang ngos lyis zes zes noq yvmas khat kat.

³Ngos lyis nhaiq ma nyen lo chwiq zis yah doms bat doms bat kuot.

⁴Nyang ngah shoh yahge shohyeis lyis cwe lha shohyau lyis khyauh dyei.

⁵Nyang ngos lyis nhaiq ngis zis yahge shanghsenh dah thung mha lhunk toh.

⁶Nyang ngos lyis gohlhain yah shei goeus bang nyeis dah soeng soeng noq yvmas tsoengh nyeis nhang.

⁷Nyang ngos lyis shamjvng yah twih toh. Ngos gas phang luiq das zis nghamhloms cho ma bos dah thung dius nghuot.

⁸Ngos lyis pangh das zis kaiq ngaus laus eq Mangso ka ma gyo dyei.

⁹Ngos khalhye lhain loh khalhye lukciank ci toh las vtyi vkamh suh.

¹⁰Nyang ngos lyis woms teh lhom nyeis; Nyang ngos lyis khangkhyi teh dyvmdap los.

¹¹Nyang ngos lyis cho mha nyhik las langchingh toh khoq.

¹²Nyang nyah lyei thung lha ngos lyis nyo baiq toeuqkhom kuot.

¹³Nyang nyah nyo yah ngah gungs mas baiq tsuk kat.

¹⁴Dius jens dvnyeih gonh ngos lyis yis. Nyamoq ngos lyis jwangh dah lvkhyank tsain kat.

¹⁵Zonoms shukphoh xiklyis nyang ngos lyis khoh dah khamzo cho kyingh dyei.

¹⁶Nyang ngah nyoqnho lhyi nyeisjvng mas buot las luk mas ngah zwis gyweh.

¹⁷Ngos gas yanghzan cho, nyenstap cho yahge pyo cho cha nghuot yvlyis tohnyhik tyamp.

¹⁸YHENSAIN mha ngos nghamhloms cho thank goeus. Ngos nyangh shoq ma xauh nyeis lo.

¹⁹Ngos nos cho, yhen ma bos cho nghamh zis gas khoh dah nyonoq nghuot.

²⁰Ngos hauh yvlyis vlhomuh soh nyeis. Ngah dyos nhaiqngis nyeis.

²¹Nghuot laus eq ngos haih zis nghamh lyis nghamhloms cho yoh.

²²YHENSAIN dah mathank magons jyetdap cho yahge nhaiqnyen cho tsoq las,

²³nvp khanghmuh nhaiqnyen cho vsaiq xauh kham yoeus. Nah wontang cho ka kuhxing.

²⁴YHENSAIN ka ngos yoh zis dvnganh nghuot las ngos nyang lyis nghamhloms toh.

²⁵YHENSAIN ka nyang lyis loms soeu khanghmuh xiklyis gis.

²⁶Housoeh las YHENSAIN yang lyis khyuot yoeus das cho lhyi ehnyet xing xing langh nyeis zis gas yah xiklyis gis thank nghuot.

²⁷Yang loyvm yoq lyis yah hai ehnyet xing cho xuq das zis gis thank nghuot.

²⁸Yang khamzo lyis dvyuk kyingh tsoek yah ehnyet xing xing tsung langh chah.

²⁹Nghamhloms joqyos bos shih mvbeh yang o mha gyoh las gop chah.

³⁰Bat zis yah ma phauh gis kuot laus eq yang dvnganh lhom yoeus chah.

³¹YHENSAIN ka nhaiqnyen soeu nghuot las yang lyis vcaiq vto ma peq tyamp das.

³²Nyang yang lyis nhaiqkuk cho she kat dyei mvbeh, nghuot laus eq nyang yang lyis jyetdap sainhnos cho ka jyoengh kuhxing.

³³YHENSAIN ka dius lyis nos nhang mes, nghuot ya kuk nhang mes zis ma nghuot.

³⁴Yhensain ka thung khau mha, yah dyos lyis gyik thyi lhyi seq.

³⁵Nyhang Thank Mangso xikkhonh mas yang lyis ma jus khyvlyis kuot zis xauh lyis nyang seq.

³⁶Soetuon jang mas lyi jus cho nungsdoms loh lyis nyang seq.

³⁷YHENSAIN ma taiq toh lyis, hank eq taiq las hauh zis ma yoh bweh los nhang.

³⁸Nyhang thank Mangso taiq toh las, gis cho yahge yaukyenh cho bweh los.

³⁹Yang yah yaunos gvng mas joeng zis xauh lyis kang dwis dius chamus lop nyeis chah lah?

⁴⁰Yang gas yah cho lhyi kyink las YHENSAIN jyank pheh tauh loh goh.

⁴¹Maukhung mha Mangso lhyi yah nhaiqlom khomh phank las shvmanh dung goh.

⁴²YHENSAIN eh, ngamoq yaunos kuot zis yah gomloeus toq goeus las nvng ngamoq lyis ma khyuot dyei.

⁴³Nah nhaiqnyen cho lhyi nah nhaiqyo cho yah nghop shung tyamp las nvng ngamoq lyis chank khat las sat.

⁴⁴Nhaiqlom dyis dah jyommauh nyo thoeu lha ngamoq shvmanh dung zis nah jyank mas ma bangh loh.

⁴⁵Nvng ngamoq lyis gohtoeu dius nyau jens mas mhotkhyot teh kuot tyamp.

⁴⁶Ngamoq gas ngamoq dah jeswus dvnganh yah ma phauhgis jwangh zis xauh.

⁴⁷Ngamoq gas dyoqbis zainsmuh yahge dyoqgyoh cho xauh los. Ngamoq gas gyukphoh dvnphoh yvmas nyeis.

⁴⁸Ngah dius jens dyoqbis yvmas ngah nyoqjeih mas nyoqdyeis lvng yaus nyeis.

⁴⁹Ngah nyoqdyeis gas malyenlo shuon nyeis.

⁵⁰YHENSAIN ka ngamoq lyis maukhung mhayah yoeuh las nyvng shoq,

⁵¹Wus mas dah vmesbih jens cha mus loh zis nyvng lyis ngah nhaiqlom mas kuk nyeis.

⁵²Shohyos gungs mas ngos gas ngah jeswus lhyik mas nghoq nyih teh nyih.

⁵³Nyamoq ngos lyis dwang mas vdwis doeuh khyoq las lukzains yah cheiq toh.

⁵⁴Jeis gas ngah thoq mas nghop los las ngos gas shei lo das, oen nghamh.

⁵⁵YHENSAIN eh, dwang theh masyah ngos nvng lyis lui.

⁵⁶Ngah thwe gyo dyei das zis dung lyis, nvng xauhgyo.

⁵⁷Nvng ngos lyis toeuh las ngos ma gyuk das xiklyis taiq.

⁵⁸Nvng ngos lyis taiq gos dyei das zis los las ngah kang lhyi khyuot yoeus.

⁵⁹Nyamoq ngos lyis tyi lha cu cho lhyi nvng seq; ngos lyis ngah soe tuon dyei aq.

⁶⁰Ngah jeswus jens ngos lyis khasoeh hoeng lha, ngos lyis tyi lha khasoeh lhaink zis nvng seq.

⁶¹YHENSAIN eh, nyamoq ngos lyis ma phauhgis kuot zis nvng xauhgyo goeus; nyamoq dah lhaink cho dvnganh nvng seq.

⁶²Nyamoq dvnyeih gonh ngah cho taiq las cvvq cho kuot.

⁶³Nvpsangh masyah nyenhthang jweh shoq ngos lyis jwangh dah lvkhyank kat.

⁶⁴YHENSAIN eh, nyamoq kuot goeus zis lyis nyamoq lyis joeng aq.

⁶⁵Nyamoq lyis nhoengh las nhaiqlom thank nhang aq.

⁶⁶Nyamoq lyis shoh soeh khat khyoq las nyeisjvng thoq masyah buot tyamp aq.