Read Achang EZEKIEL 10 Bible Online

EZEKIEL 10 - Achang bible

EZEKIEL 10

¹Ngos yoeuh lyis, Kherubim uhloms dah vtoeu, maukhung kyo mha nila yah kuot dah hwankti tank teh zis dvkoeuq thuq joq.

²Mangso ka hau dyiyhwiq wuot soeu lhyi, Kherubim vjeis, lhyinghchvp jo mas loh aq; houmha joq dah nyigywe lyis loq yah gap las wus thoq mas sanh kat aq, ge. Ngos gas nyang loh yvlyis zungh yoeuh nyeis.

³Nyang wvng loh lyis hau Kherubim gas Yhenmuh dah mautyi pheh tsain yap joq las, ganthoq khau mha jyommauh dyingh joq.

⁴YHENSAIN dah phunk gas, hau Kherubim thoq masyah toq las Yhenmuh khomh pheh ywi loh. Hauh thang lhyi Yhenmuh mas jyommauh yah dyingh las khyam mha phunk bvng joq.

⁵Kherubim dah dungs nyings zis gas nghe khyam mha yangh xauhgyo. Hauh thwe ka Maukhung Jesphung Mangso dah thwe teh nghuot.

⁶YHENSAIN ka dyiyhwiq wuot soeu lhyi, Kherubim dah vjeis mas lhyinghchvp jo mas dah nyi dvkhamh loh yoeus aq ge, vmingh dyei lyis, nyang loh las lhyinghchvp dvkoeuq nvm mas wvng yap joq.

⁷Hauh uhlyis Kherub dvdoeu gas, houmha nyamoq mas joq dah nyi mas nyah loq kat las nyigywe dvkhamh kui lha dyiyhwiq wuot soeu loq mas kat dyei. Nyang gas hau nyigywe yoeus las loh.

⁸Kherub dvdoeu dvdoeu dah dungs o mha, dius loq teh zis tsain bos zis ngos nyvng.

⁹Kherub dvdoeu yvm mas lhyinghchvp dvkoeuq mulas lhyinghchvp dvyhangteh teh zis nyei chvp eq nyvng. Hauh lhyinghchvp jens gas phauhdap luk teh tsain bvng. Hauh lhyinghchvp dvkoeuq dvkoeuq mas gohtoeu lhyinghchvp dvkoeuq los kyank tsoq las vthunk zungh zungh tsain tap toh.

¹¹Hau Kherubim tsain loh lyis, nyamoq khashot pheh eq ma tauh noh, yoh loh. Nyamoq loh mes shot pheh ma tauh tauh dvgeh geh tsain loh.

¹²Nyamoq dah gungs, gvnungh, loq, dungs yahge lhyinghchvp mas nyoqjeih yah kyingh dyingh joq.

¹³Lhyingh Lhain, ge lui kat dah thwe ngos xauhgyo.

¹⁴Kherub dvdoeu dvdoeu mas nyoqnho nyei koeuq koeuq bos. Cangxeih nyoqnho ka noeulu nyoqnho, aiq vkoeuq gas dius nyoqnho, somh gas khangkhyi, nyei gas zonsmuh nyoqnho nghuot.

¹⁵Hau Kherubim gas ngos Kheba lvng yvm mas nyvng dah yewus jens yah dvyhangteh zis tsain nghuot. Hau Kherubim lyeis mas doq loh lyis,

¹⁶lhyinghchvp jens eq dvgeh bos loh. Nyamoq dang das zis dungs tyo khanghmuh lhyinghchvp eq bos loh.

¹⁷Kherubim no lyis lhyinghchvp jens eq no joq. Kherubim dang lyis lhyinghchvp jens eq dvgeh dap loh: khasoeh ge lyis Kherubim tsain joeu toh.

¹⁸YHENSAIN dah phunk gas Yhenmuh khomh cho thuq las Kherubim thoq mas yap joq.

¹⁹Ngos yoeuh nyeis lyis Kherubim gas dungs lhywa lha nyeisjvng masyah gang doq loh lyis lhyinghchvp bos loh. Nyamoq gas Yhenmuh buisthuq khyam khomh mas no las phunk gas nyamoq thoq mas bvng joq.

²⁰Haih Kherubim gas Kheba lvng yvm, Israel Mangso dah khyeiyang mas ngos nyvng dah yewus yah dvyhangteh tsain nghuot zis seq.

²¹Dvdoeu dvdoeu mas nyoqnho nyei koeuq, dungs nyei koeuq dap, dungs dvkoeuq o mha dius loq teh zis dvkoeuq koeuq dap.

²²Nyamoq nyoqnho ka ngos Kheba lvng yvm mas nyvng ku dah nyoqnho yah top doeusgoh. Dvdoeu dvdoeu loh lyis nyah xikpheh dan dan loh.