Read Achang EZEKIEL 11 Bible Online

EZEKIEL 11 - Achang bible

EZEKIEL 11

¹Mangso dah Dyos ngos lyis toq kat las, Yhenmuh buisthuq khyam khomh pheh shwih loh. Ngos hau khyam khomh nvm mas yukgis aiqci oeng yuk nyvng. Houmha Azur lo Yazania yahge Benaia lo Pelatia bos. Hauh aiq yuk gas hau dius nyau dah uhshe bang nghuot.

²Mangso ngos lyis taiq, Lvcang eh, hauh bang gas ma gis dah nghamh toeuq cho kuot las haih wus mas ma gis dah joeui dyei.

³Nyamoq taiq zis gas, Ma nyangh lyis ngamoq xiklyis yhen tsuk das shishenh nghuot goeus. Haih wus gas jyauq auh teh, ngamoq gas hau auh khau mha dah shoh teh nghuot, ge.

⁴Housoeh las Lvcang eh, nyamoq lyis tyi lha pe aq, bvng bvng taiq aq, ge.

⁵YHENSAIN dah Dyos ngos lyis joeu las, YHENSAIN ngos lyis taiq, Haih loeus dius jens lyis dyei aq. Israel dius jens eh, namoq cha taiq zis yahge namoq cha nghamhtoeuq zis ngos seq.

⁶Namoq haih wus mas dius nyoshoq sat goeus las talhoeu ka mvng yah tsain dyingh joq.

⁷Housoeh las heika ngos Yomzains YHENSAIN namoq lyis taiq zis nghuot. Haih wus gas jyauq auh nghuot laus eq shoh gas cha nghuot? Namoq sat goeus dah mvng tsain nghuot! Namoq heimha ma nyeis das. Ngos namoq lyis haih wus masyah doeuh tyamp das.

⁸Namoq gas moengsa lhyi gyuk vnghuot lah? Namoq lyis zan das zis ngos moengsa chi bang lyis shwih los das.

⁹Ngos namoq lyis wus nghe pheh shwih thuq las lvbaus loq mas kyauh das. Ngos namoq lyis shei das zaudang khyoq goeus.

¹⁰Namoq gas namoq nyang mau mas jes mas gyoh das. Housoeh lyis ngos YHENSAIN nghuot yvlyis yuk khanghmuh seq das.

¹¹Haih wus gas namoq lyis, auh gas hau vkhau mha dah shoh lyis gos teh, ma gos das. Namoq Israel mau khamha nyeis laus eq ngos namoq lyis joeng das.

¹²Housoeh ngos YHENSAIN nghuot yvlyis namoq seq das: namoq ngah lyi thyoq, ngos taiq toh dang domsyos ma gyo, namoq dah yhenkyoh dius nyau dah lyi tsain chank, ge.

¹³Ngos hau lvpe pe nyeis lyis Pelatia shei loh. Ngos tsoh mas dupaiq, kaiq las, Yomzains YHENSAIN eh, Israel mas nyet shih bang yuk khanghmuh lyis sat lo das lah, oen.

¹⁴YHENSAIN ngos lyis jis.

¹⁵Nyang taiq, Lvcang eh, Yerusalem mas nyeis bang gas, nvng yahge jonsdoeus loh dah nah boekyis cho taiq. Nyamoq taiq, Jonsdoeus loh bang gas YHENSAIN lhyi paiq das cho nyo we loh goeus. Nyang gas yang lyis sain das mau dyei toh, ge.

¹⁶Gvshih nah jonsdoeus changh jens lyis ngos taiq zis taiq kyoh aq. Nyamoq lyis gohmau mas sanh tyo lha, mauwe mas dah dius nyau jyank mas nyeis nhang zis gas ngos nghuot. Nghuot laus eq hauh shishenh lyis nyamoq loh dah mau mas ngos nyamoq yah nyeis das.

¹⁷Housoeh las ngos Yomzains YHENSAIN taiq zis nyamoq lyis taiq kyoh aq. Ngos nyamoq lyis sanh tyamp dah mau masyah doms tsainh los las Israel dah maunyeis nyamoq lyis doms dyei das.

¹⁸Nyamoq tauh los lyis, ma lhoq cho eq, nyamoq xo nyvng dah vchoqh vlhauq phvra dvnganh eq shang tyamp das.

¹⁹Ngos nyamoq lyis nhaiqlom vsaiq, ehnyet vsaiq kat dyei das. Ngos nyamoq dah than luk nhaiqlom lyis yoeus tyamp las domsyos gyo dah nhaiqlom lyis kat dyei das.

²⁰Housoeh nyamoq gas ngah lyi chank las ngos tyingtoh dang dvnganh lyis lomluk luk chank kuot das las, nyamoq ngah dius duot das, ngos eq nyamoq Mangso duot das.

²¹Nghuot laus eq ma lhoq, vchoqh vlhauq phvra lyis paiq das zis ngwis bang lyis ngos joeng das. Nyamoq kuot zis yah dvyhangteh ngos nyamoq lyis joeng das. Yomzains YHENSAIN taiq goeus.

²²Kherubim dang lyis, lhyinghchvp eq tsain bos loh. Israel Mangso dah punk eq nyamoq thoq mas nghuot.

²³YHENSAIN phunk gas wus masyah thuq las, wus dah buisthuq shot boms pheh ywi loh.

²⁴Nyoqnyvng mas Mangso dah dyos gas ngos lyis toq kat las Babilon mau jonsdoeus bang jyank mas doms shwih los. Hauh thang lhyi hau nyoqnyvng shen loh.

²⁵Housoeh YHENSAIN ngos lyis chixoeuq cho dvnganh jonsdoeus bang lyis taiq kyoh.