Read Achang EZEKIEL 12 Bible Online

EZEKIEL 12 - Achang bible

EZEKIEL 12

¹YHENSAIN ngos lyis jis.

²Nyang taiq, Lvcang eh, nvng gas gomloeus toq bang mas nyeis. Nyamoq nyoqjeih dap laus eq cha ma nyvng; nyamoq no dap laus eq cha ma xauhgyo. Khasoeh ge lyis nyamoq gas gomloeus toq bang nghuot.

³Lvcang eh, gvshih loh phang khau das soeu teh dyens sont las mau ma chuot shih lyis thuq aq. Nvng gohyos loh das zis thuq loh yvlyis yuk khanghmuh lyis nyvng nhang aq. Hau gomloeus toq bang seq yoeuh comh mvbeh.

⁴Jonsdoeus loh das xiklyis buis bos shih lyis nah yvwons zwis aq. Housoeh nyamoq nvng lyis yoh nyvng das. Nvng jonsdoeus loh teh nyenhthang lhyi thuq loh zis nyamoq lyis zungh yoeuh nhang aq.

⁵Nyamoq zungh yoeuh nyeis lyis, nah yhen tyoyvm dwang phank las nah yvwons houcho yah chi thuq aq.

⁶Nvng nah yvwons kvtoq mas kih las nah nyoqjeih nghop zis yah mauchuotdwang mas loh zis nyamoq lyis zungh yoeuh nhang aq. Housoeh nvng khalhye loh nyeis zis nvng ma nyvng. Hau nvng kuot zis gas Israel jens lyis zaih nhang zis nghuot das.

⁷Ngos gas YHENSAIN ngos lyis taiq toh zis kuot. Hauh nyeih lyis ngos phang khau soeu teh yvwons zwis las mauchuot los lyis, ngos ngah loq yah tyoyvm dwang doeu phank las yuk khanghmuh zungh yoeuh nyeis lyis ngah kvtoq mas yvwons toeu wuq las thuq khoq.

⁸Nungsnvp YHENSAIN ngos lyis taiq.

⁹Nyang taiq, Lvcang eh, gvshih gomloeus toq dah Israel jens gas nvng lyis, Cha kuot nyeis, ge nyei.

¹⁰Ngos Yomzains YHENSAIN nyamoq lyis taiq yvlyis nyamoq lyis taiq kyoh aq. Haih loeus gas Yerusalem lyis guon bang zaulo yahge houmha nyeis bang dvnganhmoq xiklyis nghuot.

¹¹Nvng kuot goeus zis gas nyamoq mas bweh los das dah vlho nghuot yvlyis taiq kyoh aq. Nyamoq phang khau bang yahge nyamoq jonsdoeus loh das.

¹²Nyamoq lyis guon dah zau gas, nyah yvwons kvtoq mas wuq las chuot uhlyis, nyah xiklyis nyamoq ciank mas doeu phank yvcho phang thuq das. Nyah nyoqjeih nghop toh das las nyang khapheh loh nyeis zis ma nyvng.

¹³Nghuot laus eq ngos ngah nyho doeuh las nyang lyis nghop das. Hauh thang lhyi ngos nyang lyis Babilon wus pheh shwih loh das las nyang houmha nyoq ma nyvng zis shei das.

¹⁴Nyah khyam mha nyeis bang, nyang lyis joeui dyei bang yahge nyah gungs zungh soeu dvnganh lyis dvkhau yah sanh tyamp das, dius jens gas nyamoq lyis sat das zis tsain xo das.

¹⁵Ngos nyamoq lyis gohtoeu dius nyau jens mas, lvbaus mau mas sanh tyamp lyis nyamoq gas ngos YHENSAIN nghuot zis seq das.

¹⁶Ngos nyamoq nainlo lyis jeszan masyah, phanghkhauq yahge yomh masyah doeng los nhang. Housoeh dius nyau jens mas jweh nyeis bang gas nyamoq kuot khoq dah wotwu kha iq vchoqh vlhauq nghuot yvlyis seqgyo das las ngos YHENSAIN nghuot zis eq nyamoq seq das, ge.

¹⁷YHENSAIN ngos lyis jis.

¹⁸Nyang taiq zis gas, Lvcang eh, Nvng wom zo lyis nvn aq. Nvng jeis shuk lyis gyuk zis yah nvn aq.

¹⁹Dius dvnyau gonh lyis taiq aq. Hai Yomzains YHENSAIN dah loeus gas nyamoq dah mau mas nyeis khoq bang, Yerusalem bang lyis taiq zis nghuot. Nyamoq zo lyis nvn das, nyamoq shuk lyis gyuk zis yah nvn das. Nyamoq dah mau mas nyeis bang lyi ma chi yvmvyah shank shoq tomh das.

²⁰Gvshih dius dyingh dah wus jens gas dyoqbis das. Hauh mau gas mhanhdyvp kuot das. Housoeh lyis ngos YHENSAIN nghuot yvlyis nyamoq seq das, ge.

²¹YHENSAIN ngos lyis jis.

²²Nyang taiq, Lvcang eh, Israel dius jens chamus hai sodang doms taiq. Shishenh lai loh goeus, pe toh cho cha eq ma bweh los?

²³Gvshih ngos Yomzains YHENSAIN hauh cho taiq chah oen nyamoq lyis taiq aq. Ngos hauh sodang lyis thank loh nhang goeus. Hauh zis Israel mas ma taiq lo das. Hauh gungsthaiq: Shishenh jweh los goeus, hauh pe cho jens gas nyuk los das oen nyamoq lyis taiq aq.

²⁴Israel dius jens mas ma jus dah nyoqnyvng, mhuih dah pe cho ma bos lo das.

²⁵Ngos YHENSAIN nyamoq lyis taiq das las ngos taiq zis nyuk los das. Ma sheq toh lo. Gomloeus toq bang eh, namoq caiq mas, ngos kuot das oen zaih nhang toh zis yah dvyhangteh kuot das. Ngos taiq goeus ge Yomzains YHENSAIN taiq.

²⁶YHENSAIN ngos lyis taiq.

²⁷Lvcang eh, Israel jens nghamh zis gas, nah nyoqnyvng yahge pe zis gas jweh los das shishenh we shih, ge.

²⁸Housoeh las Ngos Yomzains YHENSAIN taiq nyeis oen nyamoq lyis taiq aq. Ngos taiq goeus zis ma sheq nyeis lo nyuk los das. Ngos Yomzains YHENSAIN taiq goeus.