Read Achang EZEKIEL 14 Bible Online

EZEKIEL 14 - Achang bible

EZEKIEL 14

¹Israel uhshe bang dvyhamh ngah jyank mas YHENSAIN dah ehnyet cho los nyei gyo.

²Hauh uhlyis YHENSAIN ngos lyis taiq.

³Lvcang eh, haih bang gas nyamoq nhaiqlom, phvra lyis dyei toh las, hau phvra gas nyamoq lyis yaunos shwih kuot loh nhang. Nyamoq gas ngos nyamoq lyis phuk taiq das ge nghamh lhyeh?

⁴Gvshih nyamoq lyis, ngos Yomzains YHENSAIN taiq nyeis zis taiq kyoh aq. Namoq Israel jens dvyuk dvyuk namoq dah nhaiqlom, phvra lyis dyei las nyamoq lyis yaunos shwih kuot nhang thang lhyi lvpe yah los nyei gyo! Nyamoq ngah jyank masyah phuk dang yoh das. Nyamoq phvra lyis paiq yvmvyah ngos nyamoq lyis nyamoq xauh kham vvng cho yoh nhang das.

⁵Hauh phvra jens gas namoq Israel jens lyis ngah jyank masyah we loh nhang. Nghuot laus eq ngos phuk dah dang gvng mas ngos namoq dah wontang cho doms xauh yoeus das oen nghamhloms.

⁶Housoeh gvshih ngos, Yomzains YHENSAIN taiq nyeis yvlyis Israel jens lyis taiq kyoh aq. Namoq dah vchoqh vlhauq phvra lyis toh khoq las tauh los geh.

⁷Khanhamp laus eq namoq Israel dvyuk yuk, nghuot ya Israel phung mha nyeis dah lvbaus dvyuk yuk ngah jyank masyah nungs phuk las phvra lyis paiq loh thang lhyi lvpe yah nyei gyo lyis, ngos YHENSAIN nyang lyis phuk taiq das.

⁸Ngos nvng lyis loqyom tyonh zis yah nvng lyis yikhyoh kuot das. Ngos nvng lyis ngah dius phung mhayah yoeus tyamp das. Housoeh namoq dvnganh gas ngos YHENSAIN nghuot yvlyis seq das.

⁹Lvpe jens gas ma ying dah phuk dang dyei das cho mhuih zis xauh lyis, houka ngos YHENSAIN nyamoq lyis mhuih yvmvyah nghuot. Ngos nyamoq lyis Israel jens masyah thyuk tyamp das.

¹⁰Lvpe jens yahge nyamoq yah nyeigyo goh bang dvyhangteh dah joeng zis xauh das.

¹¹Housoeh Israel jens gas ngos lyis ma tyamp lo das. Nyamoq gungs lyis nyamoq yaunos yah vwot v-oeu ma kuot lo das. Nyamoq gas ngah dius jens duot las ngos gas nyamoq Mangso duot das. Yomzains YHENSAIN taiq goeus, ge.

¹²YHENSAIN ngos lyis jis.

¹³Nyang taiq, Lvcang eh, mau dvkoeuq gas yaunos kuot las ngos lyis lom maluk lyis ngos houmha jweh las nyamoq dah zonoms mhont tyamp dyei das. Ngos phanghkhauq nhang lha dius eq gaunyhauq eq dvyhangteh sat das.

¹⁴Noa, Daniel yahge Yoba hai somh yuk houmha nyeis lyis yangh nyamoq dah gis cho yah nyamoq nyang kang lhyi kyingh dvyoh khyuot yoeus das, ge Yomzains YHENSAIN taiq goeus.

¹⁵Nghuot ya, ngos hauh mau mas yewus lyis yah dius lyis sat nhang lha hauh zis gyukphoh kuot las houcho hank eq ma yoh suh lai.

¹⁶Hauh somh yuk houmha nyeis lyis yangh, ngos Yomzains YHENSAIN nyang nyeis zis yah dvyhangteh, nyamoq gas nyamoq nyang dah loloeu lonyi lyis yangh ma yoh khyuot yoeus, nyamoq nyang kang lhyi kyingh yoh khyuot yoeus las mau gas mhanhdyvp bweh tyamp.

¹⁷Nghuot ya, ngos hauh mau mas jeszan cho she los las, thyoqpi dah kyonhkhyi ka dius yahge gaunyhauq lyis dvyih shang tyamp nhang das.

¹⁸Hauh somh yuk houmha nyeis lyis yangh ngos Yomzains YHENSAIN nyang nyeis zis yah dvyhangteh nyamoq dah loloeu lonyi lyis yangh ma yoh khyuot yoeus, nyamoq nyang kang lhyi kyingh dvyoh khyuot yoeus das.

¹⁹Ngos hauh mau mas yomh nhang lha, ngos nhaiqyo zis yah dius yahge gaunyhauq kang nyoshoq sat lyis,

²⁰Noa, Daniel yahge Yoba houmha nyeis lyis yangh ngos, Yomzains YHENSAIN jyoengh dwis nyeis zis yah dvyhangteh, nyamoq loloeu lonyi lyis yangh ma yoh khyuot yoeus. Nyamoq dah gis cho ka nyamoq nyang kang lhyi kyingh dvyoh khyuot yoeus.

²¹Heika Yomzains YHENSAIN taiq zis nghuot. Ngos Yerusalem thoq mas jeszan cho, phanghkhauq, yewus yahge yomh ge ngah dah loh thank joeng cho nyei ja nhang lha dius yahge gaunyhauq lyis dvyih mhont tyamp das.

²²Dvyhamh doeng nyeis las loloeu lonyi jens shwih thuq los. Nyamoq namoq jyank mas jweh las, nyamoq dah wotwu yahge nyamoq kuot cho nyvng lyis ngos Yerusalem thoq mas jweh nhang dah joeng cho ka lyi jus ge zis seqgyo los das.

²³Housoeh ngos kuot cho dvnganh gas gis cho nghuot yvlyis namoq seq das. Ngos Yomzains YHENSAIN taiq goeus.