Read Achang EZEKIEL 18 Bible Online

EZEKIEL 18 - Achang bible

EZEKIEL 18

¹YHENSAIN ngos lyis jis las taiq:

²Israel mau mas, Nyhiphoq jens zvbiq shih jyen zo las lo jens zwis gyen, ge dah sangkhyangh dvsoq soq lyis taiq zis gas cha ge mes lah?

³Yomzains YHENSAIN taiq: Ngos gas jyoengh dwis nyeis Mangso nghuot zis yah dvyhangteh thang pheh Israel mau mas hauh sodang ma taiq lo das.

⁴Nyhiphoq dah kang eq lo jens dah kang, yuk khanghmuh dah kang ka ngos yah sen. Yaunos kuot soeu ka nyang shei das.

⁵Dan las koptoq dah dius gis nyeis oen goh,

⁶nyang gas Israel dah phvra lyis ma paiq, tung toh yius kauh shoh ma zo. Soeu nyi lyis ma mhuih thyoq, nghuot ya mesmus vmesbih yah ma yhetgoh.

⁷Hank lyis eq ma mhuih, ma thyoq zo. Tank toh kyahsoe doms dyei, yuot bang lyis tsoh, shohchen nghuot bang lyis dyimis dyei.

⁸Nyang gas vmyat xiklyis ngwis ma jyeih, ma gis cho kuot das zis ngoek, phyen-goh cho mha topkoq dah nghamh thyet cho kuot dyei.

⁹Housoeh teh soeu ka ngos tying dang lyis domsyos gyo las ngah lyi lyis vlhomuh chank kuot. Nyang gas dan soeu nghuot las dwis nyeis das, ge Yomzains YHENSAIN taiq.

¹⁰Haih soeu mha loloeu dvyuk bos las nyang gas nyah vbah khanhamp eq ma kuot ku dah thyoq zo cho, dius sat cho, hai taiq loh zis dvja ja kuot oen goh. Nyang gas tung toh dah yius kauh shoh zo, soeu nyi lyis mhuih thyoq.

¹²Shohjyen bang lyis mhuihzo, thyoqzo, jyeih soeu tank toh dah kyahsoe anzo. Vchoqh vlhauq phvra lyis paiq, svsoh hoeng phoh zis kuot.

¹³Vmyat xiklyis ngwis jyeih. Nyang dwis nyeis das lah? Nyang ma dwis nyeis das. Nyang vchoqh vlhauq kuot goeus yvmvyah nyang shei das. Nyang shei zis gas nyah yobos gvng mas nghuot.

¹⁴Gvshih haih dius aiq vyuk mas eq loloeu dvyuk bos oen goh. Nyang gas, nyah uwus kuot dah yaunos dvnganh lyis nyvng laus eq nyah uwus dah yikhyoh ma chank.

¹⁵Nyang Israel jens dah phvra lyis ma paiq, nghuot ya tung toh dah yius kauh shoh ma zo. Soeu nyi lyis eq ma mhuih thyoq.

¹⁶Hank lyis eq ma zaiq, ma thyoqzo. Jyeih soeu tank toh kyahsoe doms dyei, yuot soeu lhyi tsoh, shohchen nghuot soeu lhyi eq dyimis dyei.

¹⁷Nyang ma gis zis ma kuot, ngwis jyeih lyis vmyat ma yoeus. Nyang ngah lyi chank, ngos tying toh yvlyis domsyos gyo yvmvyah nyang nyah uwus dah yaunos gvng mas ma shei das. Nyang jyoengh dwis nyeis das.

¹⁸Nghuot laus eq nyah uwus gas mopzo, thyoqzo las yuk khanghmuh lyis vjangh yah ma gis zis kuot. Housoeh las nyang gas nyang kuot goeus dah yaunos gvng mas shei.

¹⁹Namoq gas, Lo gas uwus dah yaunos lyis chamus ma kham das lah, ge nyei. Phuk dang gas, Vlo gas jus cho yahge gis zis kuot. Nyang gas ngah lyi chank, hauh yvlyis vlhomuh chank las, nyang jyoengh dwis nyeis das.

²⁰Yaunos kuot soeu ka shei das. Vlo gas nyah uwus dah yaunos lyis ma kham noh. Uwus eq nyah lo dah yaunos lyis ma kham noh. Dius gis jens gas gis zis kuot nyhenshang phauh shangh zis xauh das. Ma gis zis kuot bang eq nyamoq nyang kuot dah ma gis zis xauh kham das.

²¹Ma gis soeu ka yaunos lyis tyamp las ngah lyi chank, jus cho yahge gis cho kuot lyis, nyang ma shei; nyang jyoengh dwis nyeis das.

²²Nyang jus zis kuot yvmvyah dwis nyeis das. Nyah yaunos dvnganh lyis khyuot dyei das.

²³Ngos gas ma gis bang shei zis lyis yoeuh las gaus das oen nvng nghamh lhyeh, ge Yomzains YHENSAIN nyei. Nyamoq nhaiqlom thaiq las dwis nyeis das zis nyvng mes.

²⁴Nghuot laus eq, dan soeu nungsdoms las ma gis bang kuot dah vchoqh vlhauq muh, ma gis cho dvnganh kuot xi lhyi nyang tsoq dwis nyeis das lah? Ma dwis nyeis, nyang kuot ku dah gis muhzoh cha eq ma soh dyei lo. Nyang lom ma luk cho yahge nyah yaunos gvng mas nyang shei das.

²⁵Nghuot laus eq namoq gas, YHENSAIN kuot zis ma jus, tsain ge. Israel jens eh, gyo geh. Namoq nghamh lyis ngos kuot zis ma jus oen lhyeh? Ma jus zis gas namoq dah cho dvnghuot.

²⁶Dan soeu dvyuk gis zis kuot das zis no las ma gis zis kuot xi loh thang lhyi nyang shei lhyi, nyang kuot dah ma gis cho gvng mas nyang shei.

²⁷Dvyuk yuk ma gis dah yaunos kuot cho no las jus las gis zis kuot loh lyis, nyang nyah kang lhyi khyuot yoeus.

²⁸Nyang cha kuot nyeis zis soh zis yah yaunos lyis toh khoq lyis nyang jyoengh ma shei, kang dwis loh das.

²⁹Namoq Israel jens taiq lyis, YHENSAIN kuot zis ma jus, ge sang. Nvng nghamh lyis ngah cho ma jus ge vnghuot lah? Ma jus zis gas nah cho dvnghuot.

³⁰Gvshih ngos Yomzains YHENSAIN ka namoq Israel jens lyis taiq kyoh nyeis. Houka ngos namoq dvyuk dvyuk kuot vgus soetuon das. Namoq kuot nyeis, ma gis cho dvnganh masyah tauh los geh, nah yaunos yah nvng lyis vmhont nhang.

³¹Namoq kuot nyeis dah ma gis cho dvnganh toh tyamp las ehnyet vsaiq, nhaiqlom vsaiq kat toh geh. Israel jens eh, namoq chamus shei mes goh?

³²Hank shei loh das zis eq ngos ma o, ge Yomzains YHENSAIN taiq. Namoq dah yaunos masyah lhain los las kang dwis geh, ge.