Read Achang EZEKIEL 19 Bible Online

EZEKIEL 19 - Achang bible

EZEKIEL 19

¹YHENSAIN ngos lyis Israel zaulo aiq yuk xiklyis hai nhaiqkuk lvkhyank kat aq, ge.

²Nah ungwes gas khangkhyi zains nghuot khoq! Nyang gas gyukphoh khangkhyi lus jens mas nyah khangkhyi lo jens lyis nyhoeu tsoh kat.

³Nyang lo dvdoeu nyhoeu lha shoh khat das zis jyauh. Hauh lo gas dius lyis zo das zis xuq.

⁴Dius nyau jens nyah cho xauhgyo las dwang doeu zis yah nyang lyis nyhik. Nyamoq gas nyang lyis nghweh yah Egutu pheh she e.

⁵Ungwes gas nghamhloms chank ma bos zis seq shoq langh. Hauh thang lhyi nyang lo jens mas gohtoeu dvdoeu lyis doms nyhoeu las nyang gyukphoh khangkhyi kuh los.

⁶Nyang kuh los lyis gohtoeu khangkhyi jens yah zomh. Nyang shoh khat das zis, dius zo das zis eq xuq.

⁷Nyang thoenkgus jesdvp lyis thyoq, wus jens lyis tsain thyoq khyoq. Hauh mau mas bang gas nyang nyings los khanghmuh tsain gyuk dvn.[6]

⁸Dius nyau jens gas, nyang lyis zan das zis joqyos khyiq khanghmuh mas bang zain los. Nyamoq gas nyamoq dah shoh twih tsain khyoq las nyang lyis nyhik yoeus.

⁹Nyang lyis nghweh yah zungs mas kat las Babilon hwankti jyank mas yoeus loh. Thang pheh Israel boms mas nyang nyings thwe khanhamp eq ma doms xauhgyo lo shoq tsain zungh las lhunk toh.

¹⁰Nah ungwes gas jeislo lvng yvm mas tsungh dah zvbiq nwis teh nghuot. Houmha jeis nyoshoq yoh yvmvyah zvbiq nwis gas vhuq yahge vshih yah dyingh joq.

¹¹Nyah vko jens gas yangh las zau lhamloq kuot phoh kuh los. Hau zvbiq nwis gas jyommauh lyis duons bah ge shoq nyhang. Hauh zis kha iq nyhang lha vhuq yungh joq yvlyis yuk khanghmuh nyvng.

¹²Nghuot laus eq, nhaiqyo dah loq gas hauh yvlyis vnyet masyah khuot las nyeisjvng mas doeuh tyamp toh. Nyah vshih lyis buisthuq lyeis yah muot kyuk tyamp. Nyah vko jens lyis eq khyauh zis xauh las kyuk zis yah ngheq zis xauh goeus.

¹³Gvshih heika jeis ma joq mau, kyuk dah sihyos mas tsungh toh zis nghuot.

¹⁴Zvbiq zains vpom mha nyi ngeh las nyah vko yahge shih ngeh tyamp. Nyah vko jens khanhamp eq ma doms yangh los lo. Zau lhamloq khanhamp eq ma bweh lo das. Heika kuk dah lvkhyank nghuot. Hauh yvlyis puk las puk las yhang.