Read Achang EZEKIEL 21 Bible Online

EZEKIEL 21 - Achang bible

EZEKIEL 21

¹YHENSAIN ngos lyis jis.

²Nyang taiq, Lvcang eh, Yerusalem lyis taiq hoeuh aq. Dius jens paiq dah joqyos lyis tsain taiq hoeuh aq. Israel mau lyis zaih nhang aq.

³Ngos YHENSAIN taiq nyeis: ngos gas nah jeswus nghuot. Ngos ngah sham she lha namoq gis bang ma gis bang lyis dvyhangteh sat das.

⁴Ngos ngah sham lhyi mautyi mhayah mautsung pheh yuk khanghmuh lyis tyi lha yhung das.

⁵Ngos YHENSAIN, ngah sham she goeus las ma toh tyamp das zis yuk khanghmuh seq das.

⁶Lvcang eh, nvng nhaiqkuk yomgyau teh noskyingh aq: yuk khanghmuh yoeuh nyeis yvmas shoh zis yah noskyingh aq.

⁷Nyamoq nvng lyis, Nvng chamus noskyingh nyeis, ge nyei lyis, nvng gas, Loeus jweh los nyeis las noskyingh; hauh zis jweh los lyis gyuk cho yah dyingh las nyamoq dah loq dyungh gyoh joq. Nyamoq womh cho ma bos lo das, nyamoq dah phvlukchvp nvn das. Hauh shishenh jweh goeus. Houka heimha jweh joq, oen taiq kyoh aq, ge Yomzains YHENSAIN taiq.

⁸YHENSAIN ngos lyis taiq.

⁹Lvcang eh, pe aq. Ngos YHENSAIN taiq nyeis zis dius jens lyis taiq kyoh aq. Moengsa! Moengsa swih goeus, tang goeus.

¹⁰Houka sat das zis swih, ying ying mus das zis tang. Nyamoq hau gyukphoh moengsa yah joeng yvlyis ma yoh pyo das. Khasoeh ge lyis ngah dius jens gas hau joeng cho yahge taiq kyingh cho khanghmuh lyis chaxwe ma nhang kuot goeus.[7]

¹¹Moengsa ka tang lha yhung das xiklyis cicont kuot toh goeus. Houka sat soeu loq mas dyei das zis swih las tang toh goeus;

¹²Lvcang eh, kuk zis yah kaiq ngaus aq: khasoeh ge lyis hauh sham ka ngah dius jens yahge Israel uhshe bang dvnganh xiklyis nghuot. Nyamoq gas ngah dius nyet shih bang dvnganh lyis sat das. Yomgyau zis yah nah sainhkhonh lyis bat aq.

¹³Ngos ngah dius jens lyis shi yoeuh nyeis. Nyamoq nhaiqlom thaiq das zis ngoek lyis gas, nyamoq mas hai dvnganh bweh los das.[8]

¹⁴Lvcang eh, gvshih pe aq, loq tyuk aq, hauh moengsa ka doms zan doms zan kuot das. Hau moengsa ka gyukphoh sat soeu nghuot. [9]

¹⁵Houka ngah dius jens lyis gyuk las thungh lains nhang. Ngos nyamoq dah wus lyis maunyoq soeh bvng dah moengsa yah kyuk tant nyeis las hauh zis sat das zis cicont nghuot.

¹⁶Zuk dah moengsa eh, loqwi loqyos hwe aq. Nvng khapheh xoeu khapheh hwe aq. [10]

¹⁷Ngos eq loq tyuk las ngah nhaiqyo cho bi das. Ngos YHENSAIN taiq goeus, ge.

¹⁸YHENSAIN ngos lyis jis.

¹⁹Nyang taiq, Lvcang eh, nvng Babilon hwankti yahge nyah sham chank los das cho aiq khvt comh toh aq; hauh cho aiq khvt gas dvmau masyah thuq das: chotsom mha vlho zains dvkoeuq cuk toh aq.[11]

²⁰Dvcho ka hwankti lhyi Amon lo jens dah Raba wus pheh cho, gohtoeu dvcho ka Yuda mau, ciankci wus Yerusalem pheh loh cho chixoeuq das.

²¹Loh gis cho seq das xiklyis nyo lyis nhont, nyah phvra lyis nyei yoeuh, phudyei gaunyhauq dah sainh lyis yoeuh las xo nyeis.

²²Gvshih nyah loqyos loq mas Yerusalem lyis comh dah nyo chi toh. Houka nyang lyis loh las thungh thyi dom[12] toh das cho, jeszan das xiklyis kaiq hoeu cho, wus khomh tsain thyoq das dom[13] toh, wusciank thoq mas cho kuot, gvduk doeu das cho tsain taiq kyoh.

²³Yerusalem dius jens gas nyamoq buisnoms kuot toh gvng mas haih yvlyis ma jingh das. Nghuot laus eq haih pe cho ka nyamoq dah yaunos lyis soh nhang zis yahge nyamoq nyhik loh zis xauh das cho lhyi taiq kyingh.

²⁴Housoeh las heika ngos Yomzains YHENSAIN taiq nyeis. Namoq dah yaunos gas phant thuq kat goeus. Namoq yobos kha iq thoeu zis yuk khanghmuh seq. Nvng nah yaunos lyis nah wotwu khanghmuh masyah chixoeuq. Namoq gas dangthang thyet yvmas jweh joq, ngos namoq lyis namoq dah jeswus loq mas kyauh das.

²⁵Lhung lha ma gyingshang dah Israel guon bang namoq eh, namoq dah buisnyeis, namoq dah thang thank joeng cho buisnyeis jweh los.

²⁶Ngos Yomzains YHENSAIN taiq goeus. Nah buismuk yahge nah uhthop khyuot tyamp aq. Cha eq dvyhangteh ma doms nghuot lo das. Shohjyen bang lyis yomsoq mas toqh kat geh, guon nyeis bang lyis lang khyoq geh.

²⁷Dyoq gyoh goeus! Dyoq gyoh goeus! Nghuot goeus! Ngos hauh wus lyis mhuk das. Nghuot laus eq hauh wus lyis joeng das zis ngos khyen toh soeu ma jweh los dvchank hauh zis ma bweh das. Hauh wus ngos hauh soeu lhyi kyauh das.

²⁸Lvcang eh, pe aq. Ngos Yomzains YHENSAIN ka Israel jens lyis laihwangh dah Amon jens lyis cha taiq nyeis zis taiq hoeuh aq. Nyamoq lyis taiq aq: Moengsa ka thyoqpi das zis cicont nghuot. Houka sat das zis tang goeus, maunyoq nyik teh ying ying nghuot.

²⁹Namoq nyvng dah nyoqnyvng gas ma ying, namoq pe cho eq dvhwah. Namoq gas lhung lha ma gis, namoq dah buisnyeis jweh los nyeis, namoq dah thang thank joeng cho buisnyeis nghuot. Moengsa ka namoq dah lainzain mas gyoh bah ge.

³⁰Hauh moengsa dyvng mas cank toh aq; nvng gvnkhanh zis xauh dah joqyos, nvng khoeu los mau mas ngos nvng lyis soetuon das.

³¹Ngos ngah nhaiqyo zis nah thoq mas nyi ngeh teh huot khyoq lyis nvng xauh kham zis soh das; ngos nvng lyis thyoqpi cho mha lyes las lhoeng bang loq mas kyauh das.

³²Namoq gas nyi yah dyoqbis das. Nah suih gas nvnyang mau mas huot das las, hank eq nvng lyi ma soh lo das, ge YHENSAIN taiq goeus.