Read Achang EZEKIEL 23 Bible Online

EZEKIEL 23 - Achang bible

EZEKIEL 23

²Nyang taiq, Lvcang eh, gohlhain vbi vnoeuh aiq yuk nyeis.

³Nyah zomh gas lonyi yoq lyis, Egutu mas nyeis. Nyamoq lonyi bon chithyuk las nghe nyhiq tsain bweh loh.

⁴Vbi yuk dah nyings gas Ohola,[15] Vnoeuh nyings gas Oholiba[16] nghuot. Ngos nyah aiq yuk gonh lyis nyihwank las nyah aiq yuk ngos lyis loshang tsain bos dyei.

⁵Ohola gas ngah zis nghuot laus eq nghe nyhiq tsoq duot las Asiria mas dah nyah hwank jens lyis nyetnau cho dyingh dyingh bos.

⁶Nyamoq gas nesnoq gungs shunk dah jeslo jens, xamchangh jens, vkeq nyhang dah zau jens nghuot. Hau dvnganhmoq gas yungh las nyang dvp mas dah zau loloeu jens tsain nghuot.

⁷Ohola gas Asiria zau jens dvnganh dah nghe nyhiq nghuot. Nyah nyetnau cho ka Asiria phvra lyis shwih paiq zis yah nyah gungs lyis vwot v-oeu kuot.

⁸Nyang gas Egutu mas nyeis yoq lyis yah nghe nyhiq kuot teh tsoq kuot nyeis. Nyang houmha nyah lonyi bon chithyuk. Nyang lonyi nghuot shih yoq lyis vbusbih jens nyang yah yhetgoh las nghe nyhiq teh tsain kuot.

⁹Housoeh las ngos nyang lyis nyang svsoh ngwis nyeis, nyah Asiria hwank jens loq mas kyauh tyamp.

¹⁰Nyamoq gas nyang lyis shohchen shang tyamp. Nyah loloeu lonyi jens lyis nyhik loh, hauh thang lhyi nyang lyis moengsa yah sat. Dvkhauyah dah vmesbih jens gas nyah uhpui loqkyoq cho lhyi tsain taiq goh.

¹¹Hauh yvlyis vnoeuh Oholiba nyvng lyis, nyang gas nyah vbi thoq lyis zes obos zis yah, vbi Ohola thoq lyis zes las nghe nyhiq kuot nyeis.

¹²Nyang eq Asiria xamchangh jens, zau jens, bvng dah dyimis gungs shunk dah jeslo jens, nyang ji bang zau jens lyis nyetnau cho dyingh dyingh bos. Nyamoq dvnganh gas yungh dah loloeu jens tsain nghuot.

¹³Nyang wotwu dyoq yvlyis ngos nyvng. Aiq yuk yah dvyhangteh nghuot.

¹⁴Yerusalem gas wotwu dyoq yvmas zes nyop wvng loh. Nyang gas tyoyvm mas thwang tap las zoek zoek nes zis yah cauh, thyikdom mas dyichih chih, uhloms mas uhthop thop toh, nyhang dah Babilon zau jens dah gungslho lhyi yoeuh ngwis.

¹⁵

¹⁶Nyang hauh gungslho jens lyis nyvng yah dvyih, nyang nyetnau zis yah dyingh las Babilon mas lvgyo jens lyis nhang.

¹⁷Babilon jens eq nyang yah los yhetgoh. Nyamoq gas nyang lyis yhung lha nyang lyis vwot v-oeu kuot las thang thank lyis nyang nyamoq yah vchoqh vlhauq bweh loh.

¹⁸Nyang gas moeng mas phank xoeuq las yuk khanghmuh lyis nyang gas ma daq xoq dah nghe nyhiq nghuot yvlyis seq nhang. Ngos nyah vbi lyis choqh zis yah dvyhangteh nyang lyis eq choqh.

¹⁹Nyang gas vjangh thoq lyis zes las nghe nyhiq duot los. Nyang lonyi bon lyis Egutu mas nghe nyhiq duot teh kuot nyeis.

²⁰Nyang mas obos dah Mauhlyihzoe, nghuot ya nyanglus teh, zomhgoh dah yukgis jens lyis ngwis dah nyetnau cho yah dyingh joq.

²¹Oholiba eh, nvng Egutu mas lonyi yoq lyis wotwu dyoq dah yobos lyis doms kuot mes. Houmha yukgis jens nah dyeinauh yah lhoeu lha, nah lonyi bon somh loh.

²²Housoeh yvmvyah Oholiba eh, heika ngos Yomzains YHENSAIN nvng lyis taiq nyeis zis nghuot. Nvng hauh hwank jens lyis nghoengh goeus. Nghuot laus eq ngos nyamoq lyis nvng yah nhaiqyo goh nhang lha nah yvmlhaink mas shwih los das.

²³Ngos Babilon bang, Khalde jens, Pekod, Shoa, Koa mas bang yahge Asiria bang lyis shwih los das. Yungh dah xamchangh loloeu jens, zau jens, yhaugyen dah zau jens dvnganh, vkeq nyhang bang, nyang ji dah zau jens dvnganh tsainh los das.

²⁴Nyamoq gas mautsung pheh yah nvng lyis zan das zis jes lhyingh, thuq lhyingh bos dah jesphung zainsmuh los das. Nyamoq gas gos, jes uhkyop khomp zis yah nvng lyis lhaink toh das. Ngos nvng lyis nyamoq jyank mas kyauh das las, nyamoq gas nvng lyis nyamoq nyang dah lyi yah soetuon das.

²⁵Ngos namoq lyis nhaiqyo yvmvyah namoq lyis nyamoq lyis yah nhaiqyo yo kuot nhang. Nyamoq gas namoq dah nho yahge no lyis tsain thyet das, nyet shih bang lyis sat das. Nghuot goeus namoq dah loloeu lonyi jens lyis shwih yoeus las vdwis nyi ngheq das.

²⁶Nyamoq gas nah dyimis chuiq tyamp dyei las nah shunkzis lyis yoeus loh.

²⁷Nvng Egutu mas nyeis yoq lyis kuot, nyetnau dah yaunos kang dwis cho lhyi ngos tomh tyamp das. Nvng phvra lyis ma yoeuh lo das, nghuot ya Egutu cho ma nghamh lo das.

²⁸Heika Yomzains YHENSAIN taiq zis nghuot. Ngos nvng lyis nvng choqh las hoeng goeus bang loq mas kyauh das.

²⁹Nyamoq gas nvng lyis hoeng yvmvyah nvng zwi khank toh zis dvnganh yoeus loh das las nvng lyis shohchen shang toh khoq, nghe nyhiq teh phant thuq toh. Nah nyetnau cho yahge nghe nyhiq kuot cho ka,

³⁰nah thoq mas haih zis she los. Nvng gas gohnyau bang xiklyis nghe nyhiq kuot las nyamoq dah phvra yah nah gungs lyis vwot v-oeu kuot.

³¹Nvng gas nah vbi dah khyeiyos mas chank nang goeus. Housoeh las ngos nvng lyis dvyhangteh joeng dah kom lhyi shuk nhang das.

³²Yomzains YHENSAIN taiq, Nvng nah vbi dah kom mha zis shuk das. Houka kuh las nauh. Yuk khanghmuh gas nvng lyis jwangh zis yah nyhap. Hauh kom ka dyingh joq.

³³Houka nvng lyis ehnyet nyo nhang, yet nhang das. Houka gyukphoh, thyoq khyoq kom, nah vbi Samari dah kom nghuot.

³⁴Nvng hauh yvlyis kanh shoq shuk las komjvp jens yah nah dyeinauh lyis langchuiq tyamp das. Ngos Yomzains YHENSAIN taiq goeus, ge.

³⁵Gvshih haih zis gas Yomzains YHENSAIN taiq nyeis zis nghuot. Nvng ngos lyis tohnyhik las, nungs phuk loh yvmvyah, nvng nah nyetnau cho yahge nah nghe nyhiq muh dah yobos xiklyis xauh kham das, ge.

³⁶YHENSAIN ngos lyis taiq. Lvcang eh, Ohola yahge Oholiba lyis soetuon das zis cicont vnghuot shih lah? Nyah zomh kuot goeus dah vchoqh vlhauq muh lyis kauq aq.

³⁷Nyah zomh lvng shuot goeus, dius sat goeus. Phvra yah lvng tsain shuot las, ngos lyis khoeu dyei dah lo jens lyis sat. Nyamoq dah phvra lyis ngah lo jens ngheq phudyei.

³⁸Nyamoq kuot zis hauh zis dvnganh ma nghuot shih. Nyamoq ngah Yhenmuh lyis lhoq lhoeuh thang lhyi ngos toh toh dah No Nyeih lyis thyoq.

³⁹Hauh nyeih lyis nyamoq gas ngah lo jens lyis sat las phvra lyis phudyei khyvlyis ngheq phudyei lho lha nyamoq ngah Yhenmuh mas los zis yah hauh yvlyis lhoq lhoeuh.

⁴⁰Nyamoq gas dvsoq soq lyis lvgyo jens lyis nhang lha, svsoh we masyah yukgis jens los das xiklyis tsain yus las hauh yukgis jens jweh los. Vbi vnoeuh aiq yuk gas gungs cheih, nyoqjeih cauh las shunk zis yah shuk toh.

⁴¹Nyah zomh gas jung yungh mas tsung lha hauh xik mas gas gis dah vyhang yah dyingh dah kihgus dvkoeuq joq. Houmha ngos nyamoq lyis dyei dah xangh yahge tsanlun coeu tsain bos.

⁴²Zogaus shukyis pyo dah dius phung thwe xauhgyo. Houmha sihyos mas dah yukgis dvphung shwih wvng los. Nyamoq gas hau vmesbih jens dah loqyom mas thoengh tsain huot, las uhloms mas buismuk yungh tsain tsungh dyei.

⁴³Ngos ngvnyang taiq zo zis gas, Nyamoq hai lvng shuot las mang goeus dah vmesbih yah vshuotgoh das au, oen.

⁴⁴Nyamoq gas haih nghe nyhiq tang jyank mas dvsoq soq lyis doms wvng. Nyamoq gas hau wotwu dyoq dah vmesbih Ohola yahge Oholiba jyank mas doms tsain wvng.

⁴⁵Dan bang gas nyah zomh lvng shuot, dius sat gvng mas dang thang thyet das. Khasoeh ge lyis nyah zomh gas lvng shuot cho kuot las nyamoq loq mas suih lhoeuh goeus.

⁴⁶Heika Yomzains YHENSAIN taiq zis nghuot. Ngos nyah zomh jyank mas gomloeus phung shwih los las kyuk tant lhuot zo nhang das.

⁴⁷Hauh gomloeus phung ka nyah zomh lyis luk yah doeuh, moengsa yah zan, nyamoq lo jens lyis sat, nyamoq yhen lhyi ngheq tyamp nhang das.

⁴⁸Vmesbih yuk khanghmuh gas nyamoq kuot goeus zis yah dvyhangteh lvng shuot cho ma kuot das zis zaih nhang khyvlyis ngos dvmau gonh mas wotwu dyoq cho tomh tyamp das.

⁴⁹Nah zomh dah wotwu dyoq cho yahge phvra lyis paiq cho xiklyis ngos nah zomh lyis joeng das. Housoeh lyis ngos Yomzains YHENSAIN nghuot yvlyis nah zomh yoh seq das.