Read Achang EZEKIEL 24 Bible Online

EZEKIEL 24 - Achang bible

EZEKIEL 24

¹Ngamoq jonsdoeus loh zis gau vzvn, ci vkhyvp, ci vnyeih lyis YHENSAIN ngos lyis jis.

²Nyang taiq, Lvcang eh, khvnyhik dah buisnyeis lhaih toh aq: khasoeh ge lyis heika Babilon hwankti Yerusalem lyis lhaink xi dah buisnyeis nghuot.

³Gomloeus seq toq dah ngah dius jens lyis ngos Yomzains YHENSAIN nyamoq xiklyis joq dah haih dangtoeuq taiq kyoh aq. Auh nyi mas cuk aq, Houmha jeis tyink aq.

⁴Gis thank shohtomp tsain kat aq, kvbauh shoh yahge bungs shoh, gis thank shohyau yah eq tyink aq.

⁵Gis thank yvng shoh yhung aq; auhchuk mas thangh[17] zungs aq. Shoh yahge shohyau bu das xiklyis jeis tsoeu nhang aq.

⁶Heika Yomzains YHENSAIN taiq nyeis zis nghuot. Dius sat bang dah wus gas jom goeus. Houka yuszo las khanhamp eq ma shank dah auh teh nghuot. Shoh dvtomp thang lhyi dvtomp yoeus thuq las dvkoeuq eq ma nyet lo.

⁷Wus mas sat cho bos, nghuot laus eq suih lyis tsoh yah yoh nghop dah nyeisjvng mas ma huot, cha ma joq dah luk-uk thoq mas huot toh.

⁸Ngos hauh suih lyis hau ma yoh nghop shung yvmas toh toh. Ngos houmha nhaiqyo las lvto phuk cho sang das.

⁹Heika Yomzains YHENSAIN taiq nyeis zis nghuot. Dius sat dah wus gas jom goeus. Thanghzungs ngvnyang zungs toh das.

¹⁰Thangh chi los shih aq, nyi muot tuk aq, shoh puh aq, shohjeis xet aq, shohyau ngheq tyamp aq.[18]

¹¹Gvshih hau thunk auh vkom lhyi nyi gywe thoq mas kih las ngeh nes nhang aq. Housoeh hau auh gas yus ngeh yaus thang lhyi doms lhoq los das.

¹²Nghuot laus eq nyilhyam mha hauh yus ma dyuk loh das.[19]

¹³Yerusalem eh, nah wotwu dyoq cho ka nvng lyis vwot v-oeu kuot goeus. Ngos nvng lyis tungh cheihshang dyei laus eq nvng vwot v-oeu dvnghuot joq. Mangso nvng lyis joeng thang lhyi nvng gyingshang los das.

¹⁴Ngos YHENSAIN taiq goeus: Ngos kuot das shishenh jweh goeus. Ngos nah yaunos lyis ma yoeuh lhaiq toh das, nhaiqnyen cho ma chixoeuq das, nhaiq ma nyen das. Nvng kuot goeus nyhenshang joeng zis xauh das. Yomzains Yhensain taiq goeus.

¹⁵YHENSAIN ngos lyis jis.

¹⁶Nyang taiq, Lvcang eh, ngos nvng jyet thank soeu lhyi nyetlos nyettant yoeus tyamp das. Nvng vlop, vngaus, nyoqdyeis vthuq.

¹⁷Nvng kuk ngaus zis vxauhgyo nhang. Kuk dah vlho teh uhchen vloh, khyeichen vloh. Nah nyoqnho lhyi vnghop, kuk bang zo dah zonoms vzo, ge.

¹⁸Nvpsangh noq yah ngos dius jens yah jis goh nyeis. Hauh nyenhthang lhyi ngah yhensain nyhiq shei loh las, nungs nyeih ngos lyis taiq toh vgus kuot.

¹⁹Dius jens gas ngos lyis, Nvng chamus heisoeh kuot, ge nyei.

²⁰Housoeh las ngos nyamoq lyis taiq. YHENSAIN ngos lyis jis las taiq kyoh.

²¹Israel jens lyis haih loeus dyei aq. Namoq gas Yhenmuh dah yom lyis khwank nyeis. Namoq hauh yvlyis yoeuh mes, loh kwang mes laus eq YHENSAIN hauh yvlyis lhoq lhoeuh das. Yerusalem mas nyet joq khoq dah ngis shih yhen dius jens jes mas shei das.

²²Namoq eq ngos kuot teh kuot das. Namoq nyoqnho ma nghop das, kuk bang zo dah zonoms ma zo das.

²³Namoq uhchen ma loh das, khyeichen ma loh das, ma kuk das, ma ngaus das. Namoq gas namoq nyang yaunos gvng mas gyih las nyang changh nyang no tsain kyingh goh das.

²⁴Housoeh ngos gas namoq xiklyis vlho nghuot; ngos kuot goeus zis dvnganh namoq kuot das. Haih zis bweh los uhlyis nyang Yomzains YHENSAIN nghuot yvlyis namoq seq das, ge YHENSAIN taiq.

²⁵YHENSAIN taiq, Gvshih Lvcang eh, nyamoq yoeuh mes komh mes las nyamoq khwank gaus nyeis, yombos Yhenmuh lyis ngos nyamoq jyank masyah yoeus tyamp das. Nyamoq dah loloeu lonyi jens lyis eq yoeus tyamp das.

²⁶Ngos haih zis kuot nyeih lyis, thyoqpi cho lhyi phang lhuiq los bang dvyhamh nvng lyis haih cho los taiq kyoh das.

²⁷Hauh nyeih lyis nvng chithyuk tyamp dah dang taiq yomsoq doms xauh yoeus das las nyamoq yah jis goh das. Heisoeh nvng gas dius jens xiklyis vlho duot las ngos YHENSAIN nghuot yvlyis nyamoq seq das, ge.