Read Achang EZEKIEL 26 Bible Online

EZEKIEL 26 - Achang bible

EZEKIEL 26

¹Ngamoq jonsdoeus loh zis dvci das vzvn cangxeih vnyeih lyis YHENSAIN ngos lyis jis.

²Nyang taiq, Lvcang eh, heika Taire wus mas dius jens yomdyei nyeis cho nghuot. Nyamoq kaiq zis gas, Yerusalem gas dyoq gyoh goeus. Nyah soenghi yomsoq gas thank goeus. Nyang gas yang yah khyank goh das soeu ma nghuot lo das, ge.

³Housoeh las gvshih haih zis gas Ngos Yomzains YHENSAIN taiq nyeis zis nghuot. Ngos gas nvng Taire wus dah jeswus nghuot. Ngos nvng lyis zan das zis dius nyau nyoshoq shwih los das las nyamoq gas thomh mas jeisphauq toq teh los das.

⁴Nyamoq gas nah wusciank lyis mhont las, tyoeuqzvm lyis tsain thyoq das. Housoeh ngos gas nah tsohmop dvnganh shenh loh las tyeihgesles luk kyingh dvnyhet toh das.

⁵Oeng nhoh bang nyamoq dah nyho lhyi hauh thomh mas dah goeujo mas lhap das. Ngos, Yomzains YHENSAIN taiq goeus. Dius nyau jens Taire lyis lvnyhvp yoeus das.

⁶Nyamoq moengsa yah hauh janggyon mas tsain joq dah wus mas nyeis bang lyis sat das. Housoeh lyis Taire gas, ngos YHENSAIN nghuot yvlyis seq das, ge.

⁷Yomzains YHENSAIN taiq, Taire lyis zan das zis ngos kuhxing thank hwankti ge Babilon mas dah Hwankti Nebukhaneza lyis shwih los das. Nyang gas mautsung pheh yah nyang jens, jeslhyingh jens, nyang ji bang bos dah, jesphung zainsmuh yah los das.

⁸Janggyon wus mas nyeis bang jeszan yvmas shei das. Jeswus gas gvduk doeu, ciank thoq mas jweh shoq tsoh cho ci, nvng yah tyi lha gos lhangh toh das.

⁹Nyamoq gas nah wusciank lyis saiqdom yah thungh thyi das, nah tyoeuqzvm lyis thyeq shamkoeng yah tsain thyoq khyoq das.

¹⁰Nyamoq dah nyang jens gvng mas twangh dah phvlhau bungh gas nvng lyis nghop das. Dyoq gyoh joq dah nah wus khomh cho nyamoq dah nyang yah she dah lhyingh, jeslhyingh, lai loh thwe ka namoq dah wusciank lyis nhont das.

¹¹Nyamoq dah nyangdvp nah talhoeu chank tsain wuih lai das; nyamoq dah moengsa yah nah dius jens lyis sat das. Goeng dah nah zains jens gas nyeisjvng mas lains das.

¹²Nah jeswus gas nah zisyos yoeus loh das, nah hu lhyi khauh loh das. Nah tyoyvm lyis lang khyoq das, pyo dah nah yhen lhyi thyoq sanh tyamp das. Nyamoq nah luk, thyeh, pvtvmya lyis thomh mas doeuh khyoq das.

¹³Ngos nah chunghthwe lhyi doms nhang das, nah toenk khvlhank thwe lyis tsingtsam kuot das.

¹⁴Ngos tyeihgesles luk kyingh toh das. Houmha oeng gaiq bang nyho yoh lhap das. Hauh wus khanhamp eq ma doms ci lo das. Ngos, Yomzains YHENSAIN taiq goeus.

¹⁵Taire wus lyis Yomzains YHENSAIN heisoeh ge taiq. Nvng somh loh lyis, thomh yvm chank yah nyeis bang gas hau sat zis xauh bang kaiq ngaus thwe gvng mas nyamoq tsain gyuk dvn das.

¹⁶Thomh yvm mas nyeis dah dius nyau jens dah hwankti jens dvnganh gas nyamoq hwankti tank masyah gyoh los. Nyamoq dah dyixing, khoh kat dyi tsain khyuot tyamp das. Nyamoq gas nyeisjvng mas tsung lha tsain nvn nyeis. Nyamoq gas nah uhpui loqkyoq gvng mas svsoh gyuk las nvn zis ma no das.

¹⁷Nyamoq gas nah xiklyis hai uhngauh lvkhyank tsain kat das. Nyings hoeuh dah wus gas monh tyamp goeus. Nyah sangpho jens gas thomh masyah shenh loh goeus.[21] Haih wus mas dah dius jens gas thomh jens lyis guon khoq. Thomh yvm mas nyeis bang dvnganh tsain gyuk dvn.

¹⁸Gvshih hauh zis gyoh nyeih lyis goeujo jens nvn. Nyamoq dah dius jens houteh dyoqbis cho gvng mas tsain dvn.

¹⁹Yomzains YHENSAIN taiq, Ngos nvng lyis hank ma nyeis lo dyoq gyoh joq dah wus teh tyeihgesles kuot das. Ngos nvng lyis nauh dah thomh jeis yah nghop das.

²⁰Gohlhain yoq lyis nyeis khoq bang yah tsoq das zis ngos nvng lyis shei dah mungkvn mas khyoq kat das. Ngos nvng lyis nyeisjvng khau mungkvn, vcaiq vto dyoqbis bang ge shei bang dah phung mha bos das zis nyamoq mas nyeis nhang das. Housoeh nvng gas kang dwis mau ge nah joqyos yoeus las khanhamp eq ma doms xauh nyeis lo.

²¹Ngos nvng lyis gyukphoh yikhyoh kuot las hauh zis nah xiklyis thang thank nghuot. Dius jens nvng lyis xo mvbeh, nghuot laus eq nvng lyis khanhamp eq ma nyvng lo das. Yomzains YHENSAIN taiq goeus.