Read Achang EZEKIEL 29 Bible Online

EZEKIEL 29 - Achang bible

EZEKIEL 29

¹Ngamoq jonsdoeus loh zis dvci vzvn, dvci vkhyvp, dvci aiq vnyeih lyis YHENSAIN ngos lyis jis.

²Nyang taiq, Lvcang eh, Egutu hwankti lhyi taiq hoeuh aq. Nyang yahge Egutu dvmau gonh joeng zis khasoeh xauh das cho nyang lyis taiq kyoh aq.

³Heika Yomzains YHENSAIN Egutu hwankti lhyi taiq kyoh nyeis cho nghuot yvlyis taiq aq. Ngos nah jeswus nghuot. Nvng jeis mas nyeis dah mvnjung zainsmuh, nvng taiq lyis Nile lvng gas nvng kuot toh[25] las nah zis nghuot, ge.

⁴Ngos nah am chank nghweh kat las nah jeis mas dah oengdoq jens lyis nvng mas tsain tap das. Housoeh ngos nvng lyis nvng mas dap dah oengdoq jens yah dvgeh Nile lvng masyah she thuq yoeus das.

⁵Ngos nvng yahge hau oengdoq dvnganh lyis sihyos mas doeuh tyamp toh das. Nah gungsdom nyeisjvng mas lains joq las nvng lyis hank eq ma nyhop. Ngos hauh yvlyis nghoq jens yahge gaunyhauq xiklyis zonoms dyei das.

⁶Housoeh lyis Egutu dius jens dvnganh ngos YHENSAIN nghuot yvlyis seq das. YHENSAIN taiq, Israel jens gas namoq Egutu dius jens lyis pangh das xiklyis nges. Nghuot laus eq namoq gas nhuk dah lhamloq thoq lyis ma zes gis.

⁷Nyamoq nvng lyis nges lyis nvng jap loh las nyamoq dah loqsanpom lhyi thauh zis yah nyamoq kvtoq lhaiq loh. Nyamoq thyikdom yhik loh nhang.

⁸Housoeh lyis ngos Yomzains YHENSAIN nvng lyis taiq nyeis, ngos nvng lyis moengsa yah zan das zis jesphung yoh. Nyamoq gas nah dius jens yahge nah gaunyhauq jens lyis sat das.

⁹Egutu mau gas, cha ma joq dah nyeisgyih yos bweh das. Housoeh lyis Ngos YHENSAIN nghuot yvlyis nvng seq das. Khasoeh ge lyis Nile lvng lyis nvng kuot toh las nah zis nghuot ge taiq goeus.

¹⁰Ngos gas nvng yahge nah Nile lvng dah jeswus nghuot. Ngos Egutu dvmau gonh, mautsung pheh Migdol wus masyah mautyi pheh Aswan wus jweh shoq, Ethiopia maukyo chank yah nyeisgyih yos kuot das.

¹¹Dius cangsoeu eq, gaunyhauq eq houmha ma suh lai das. Nyeici zvn top houmha cha eq ma nyeis das.

¹²Ngos Egutu lyis mungkvn mas jyamhjyuklhyuk mus thank dah mau kuot das. Egutu wus jens gas nyeici zvn dyoq gyoh joq das. Gohtoeu wus jens thoq lyis zes las dyoq gyoh joq nhang das. Ngos Egutu bang lyis yaukyenh bang kuot das. Nyamoq gas mau khanghmuh mas phang yenh las gohtoeu dius jens mas nyeis das.

¹³Yomzains YHENSAIN taiq, Nyeici zvn thang lhyi, ngos Egutu jens lyis ngos nyamoq lyis sanh tyamp dah dius nyau jens masyah doms shwih tauh los das.

¹⁴Ngos nyamoq lyis nyamoq dah yhen cauh, Egutu mautyi pheh nyeis nhang das. Houmha nyamoq gas yomnhuk dah munghdan,

¹⁵yomnhuk thank munghdan nghuot das. Nyamoq gas gohtoeu dius nyau jens lyis khanhamp eq ma doms guon das. Ngos nyamoq lyis yomnhuk nhang lha nyamoq khanhamp eq dius nyau jens lyis ma doms guon lo das.

¹⁶Israel jens eq nyamoq lyis pangh das xiklyis khanhamp eq ma doms nges lo das. Egutu dah uhpui loqkyoq gas, Israel jens nyamoq lyis khau zis kha iq shuot cho nghuot yvlyis soh nhang das. Housoeh lyis ngos Yomzains YHENSAIN nghuot yvlyis Israel jens seq das, ge.

¹⁷Ngamoq jonsdoeus loh zis aiqci nyhet vzvn, cangxeih vkhyvp, das vnyeih lyis YHENSAIN ngos lyis jis.

¹⁸Nyang taiq, Lvcang eh, Babilon hwankti Nebukhaneza gas Taire wus lyis yomkat los zan. Nyang nyah jeslo jens lyis hou iq lyei dah yvwons wons nhang lha nyamoq dah uhloms buot cwe, kvtoq eq gyik cwe. Nghuot laus eq Nebukhaneza yahge nyah jesphung ka Taire lyis zan masyah vmyat cha ma bos.

¹⁹Housoeh las heika ngos Yomzains YHENSAIN taiq nyeis zis nghuot. Ngos hwankti Nebukhaneza lyis Egutu mau kyauh nyeis. Nyang gas hau yvlyis lvnyhvp thyoq las Egutu dah yoh khuiq cho lhyi nyah jesphung dah uhkung phauh khyvlyis yoeus das.

²⁰Nyang gas nyah jesphung yah ngah xiklyis muh wons goeus las ngos nyang lyis Egutu mau dyei. Ngos Yomzains YHENSAIN taiq goeus.

²¹Hauh buisnyeis lyis ngos Israel jens lyis yom doms bos nhang das. Ezekiel eh, ngos nvng lyis yuk khanghmuh yoh xauhgyo yvmas taiq nhang das. Housoeh ngos YHENSAIN nghuot yvlyis nyamoq seq das, ge.