Read Achang EZEKIEL 3 Bible Online

EZEKIEL 3 - Achang bible

EZEKIEL 3

¹Mangso taiq, Lvcang eh, nvng nyvng zis zo aq, haih sauhdain zo aq. Hauh thang lhyi Israel dius jens lyis loh jis aq, ge.

²Housoeh ngos nhuot haq las, hau sauhdain zo das xiklyis nyang ngos lyis dyei.

³Nyang taiq, Lvcang eh, hai ngos nvng lyis dyei dah sauhdain zo las nah womdau tyink aq, ge. Ngos hauh zis zo goeus las hauh zis dyoyhei teh chau.

⁴Hauh thang lhyi Mangso taiq, Lvcang eh, Israel dius jens jyank mas loh las nyamoq lyis ngos nvng lyis taiq ya taiq nhang zis taiq kyoh aq.

⁵Ngos nvng lyis yau dah lvbaus nyingh kat dah dius nyau jyank mas ma nhang, Israel vnyau jyank mas dvnhang.

⁶Ngos nvng lyis yau las nvng ma seqgyo dah nyingh kat dah dius nyau zains jens jyank mas nhang lhyi, nyamoq nah dang gyo das.

⁷Nghuot laus eq Israel dius jens gas hank eq ma mes gyo das; nyamoq ngah dang yangh ma Gyo das. Nyamoq dvnganh gas nhaiqlom than lha, toeu nghank bang nghuot.

⁸Gvshih ngos nvng lyis nyamoq teh, nhaiqlom than, than toeklhoek kuot das.

⁹Ngos nvng lyis lukmuh lom teh goeng nhang das, sing teh than nhang das; hau gomloeus jens lyis vgyuk.

¹⁰Mangso tsoq taiq shih, Lvcang eh, tanh tanh kamp gyo las ngos nvng lyis taiq kyoh zis dvnganh comh toh aq.

¹¹Jonsdoeus loh dah nah dius nyau jyank mas loh las, ngos Yomzains YHENSAIN nyamoq lyis taiq zis nyamoq gyo laus, ma gyo laus taiq kyoh aq, ge.

¹²Hauh thang lhyi Mangso dah dyos yah ngos lyis toq kat las, ngos ngah nungsthank mas thwe than yah taiq nyeis yvlyis xauhgyo. Houka Maukhung nyhang mha YHENSAIN dah phunk lyis chungh, ge.

¹³Yewus jens lyeis mas dungs dvgeh phap zis yahge lhyingh thwe ka nyeisjvng dwis teh nyings huomh toh thwe lhyi ngos xauhgyo.

¹⁴YHENSAIN dah yomsoq gas ngah thoq mas yomkat duon los las nyah dyos yah ngos lyis shwih loh lyis ngos nhaiqkhoh las nhaiqyo.

¹⁵Housoeh ngos gas jonsdoeus loh bang nyeis dah Kheba lvng yvm, Tel Abib mas jweh loh. Ngos lyis houmha nyhet nyeih hau ngos nyvng cho yahge xauhgyo cho yah nhiq zaiq toh.

¹⁶Nyhet nyeih lai thang lhyi YHENSAIN ngos lyis jis.

¹⁷Lvcang eh, ngos nvng lyis Israel vnyau lyis zungh soeu kuot nhang. Ngos nvng lyis dyei dah zaih nhang cho nyamoq lyis zaih nhang aq.

¹⁸Ngos gas, ma gis soeu dvyuk yuk lyis shei das oen taiq laus eq, nvng nyah kang luiq das zis nyah ma gis cho thaiq das xiklyis nyang lyis ma taiq kyingh las nyang yaunos dap shih lyis shei loh das. Hauh cangjau ngos nvng lyis sang das.

¹⁹Ma gis soeu lhyi nvng taiq kyingh goeus laus eq nyang yaunos kuot cho ma no lyis nyang nyah yaunos dap zis yah shei das; nghuot laus eq nah kang ka luiq das.

²⁰Dvyuk yuk jyoengh gis zis yah xi lha ma gis zis kuot loh lyis ngos nyah xik mas thungh lains gus toh las nyang shei das. Nyah yaunos gvng mas nyang shei das. Nyang kuot ku dah gis cho lhyi ngos ma soh dyei das: ngos nyah cangjau nvng lyis sang das.

²¹Nvng dius gis lyis yaunos ma kuot shoq taiq kyingh nyeis las, nyang nah dang gyo zis yah yaunos ma kuot lyis, nyang dwis nyeis, nah kang eq luiq das.

²²Ngos YHENSAIN dah yomsoq bos zis soh las nyang ngos lyis taiq nyeis zis xauhgyo. Toq las langhkhau mha thuq e aq, ngos nvng lyis houmha jis das, ge.

²³Housoeh las ngos langhkhau mha e. Ngos houmha YHENSAIN dah phunk lyis nyvng. Houka ngos Kheba lvng yvm mas nyvng ku teh zis nghuot. Ngos gas nyeisjvng mas gop.

²⁴Nghuot laus eq Mangso dyos ngah jyank mas wvng las ngos lyis toq yap nhang. YHENSAIN ngos lyis taiq, Loh las nah yhenkhau mha lungh joq aq.

²⁵Lvcang eh, nvng gas twih yah twih zis xauh das las, nvng moqphung mha ma yoh thuq loh das.

²⁶Ngos nah lhyo lhyi shei nhang lha nvng gas hau gomloeus toq dah dius jens lyis ma yoh taiq kyingh das.

²⁷Hauh thang lhyi ngos nvng lyis doms jis lyis, nvng lyis dang taiq das yomsoq doms dyei las nvng gas nyamoq lyis ngos Maukhung Jesphung YHENSAIN taiq yvlyis taiq kyoh das: nyamoq gas gomloeus vnyau nghuot yvmvyah, dvyhamh gyo yoeus das, laus eq dvyhamh gas tyamp toh das.