Read Achang EZEKIEL 30 Bible Online

EZEKIEL 30 - Achang bible

EZEKIEL 30

¹YHENSAIN ngos lyis doms jis.

²Nyang taiq, Lvcang eh, ngos Yomzains YHENSAIN taiq nyeis zis pe lha taiq hoeuh aq. Nvng haih dang tsain kaiq taiq chah. Gyukphoh buisnyeis jweh los nyeis.

³Hauh buisnyeis ni goeus, YHENSAIN kuot das buisnyeis ni goeus: jyommauh nhoenk buisnyeis, dius nyau jens xiklyis yau cho nghuot das.

⁴Egutu mas jes bos das, Ethiopia mau mas chiqjyen zainsmuh bos. Egutu mas nyoshoq sat zis xauh das. Hauh mau gas lvnyhvp duot las dyoq gyoh joq.

⁵Hauh jes mas Ethiopia, Libya, Lidia, Arabia, Kub masyah nghoh dah jeslo jens eq sat zis xauh das, ngvnyang dius jens mas zis yangh sat zis xauh das.

⁶YHENSAIN taiq, mautsung pheh Migdol masyah mautyi pheh Aswan jweh shoq Egutu mau lyis khomp dyei bang dvnganh hauh jes mas gyoh das. Egutu bang khwank dah jesphung dyoqbis das. Ngos, Yomzains YHENSAIN taiq goeus.

⁷Hauh mau gas mungkvn mas jyamhjyuklhyuk mus thank joqyos nghuot das. Nyah dah wus jens eq dvnganh dyoq gyoh joq das.

⁸Ngos Egutu lyis nyi ngheq las, nyang lyis khomp dyei bang dvnganh sat zis xauh lyis ngos YHENSAIN nghuot yvlyis nyamoq seq das.

⁹Hauh buisnyeis jweh las, Egutu dyoqbis loh lyis, ngos sangpho mhayah loeus kyoh bang nhang lha masoh mathamh nyeis dah Ethiopia bang lyis loh nhauh nhang das las nyamoq dvn das. Hauh buisnyeis jweh los nyeis, ge.

¹⁰Yomzains YHENSAIN taiq, Egutu dah yohkhuiq cho lhyi tomh das xiklyis ngos Babilon mas dah hwankti Nebukhaneza lyis yhung das.

¹¹Nyang yahge nyah dah lhoeng dah jesphung hauh mau lyis jyamhjyuklhyuk los kuot tyamp das. Nyamoq gas Egutu lyis moengsa yah zan das las, hauh mau gas mvng yah tsain dyingh das.

¹²Ngos Nile lvng lyis kanh nhang lha Egutu lyis ma gis bang dah yomsoq khau mha toh das. Lvbaus gas hau dvmau gonh lyis jyamhjyuklhyuk kuot das. Ngos YHENSAIN taiq goeus.

¹³Yomzains YHENSAIN taiq, Ngos phvra yahge Memphi mas dah ma jus mangso jens lyis mhont das. Egutu lyis hank ma guon lo das. Ngos dius jens dvnganh lyis kyuk tant das.

¹⁴Ngos Egutu mautyi pheh jyamhjyuklhyuk kuot das, mautsung pheh Zoan wus lyis nyi ngheq kat das. Ngos Thebe dah wusmuh lyis joeng das.

¹⁵Ngos Egutu dah thoenkgus jesdvp zainsmuh nghuot dah Pelusium wus lyis ngah nhaiqyo cho soh nhang das. Ngos Thebe wus dah yoh khuiq cho lhyi mhont das.

¹⁶Ngos Egutu lyis nyi ngheq kat das las Pelusium gas chiqjyen das. Thebe wusciank gas thyoq khyoq das las Memphi wus gas shanghsenh das.

¹⁷Heliopoli yahge Bubasti wus mas dah wotyamh jens gas hau jes mas shei das, gohtoeu dius jens gas jonsdoeus loh das.

¹⁸Ngos Egutu dah yomsoq lyis khyauh las nyamoq khwank nyeis dah yom thank loh nhang lhyi Tehapnehe mas mauchuot los das. Jyommauh gas Egutu lyis nghop las nyah wus jens mas dah dius jens lyis shwih jons loh das.

¹⁹Ngos Egutu lyis heisoeh joeng lyis, ngos YHENSAIN nghuot zis nyamoq seq das, ge.

²⁰Ngamoq jonsdoeus loh zis dvci das vzvn, das vkhyvp, nyhet vnyeih lyis YHENSAIN ngos lyis jis.

²¹Nyang taiq, Lvcang eh, ngos Egutu hwankti dah loqyom lyis khyauh goeus. Hauh yvlyis hank ma thop dyei, sham yoh doms zwis das yombos shoq ma twih wons toh dyei.

²²Housoeh las gvshih haih zis gas ngos Yomzains YHENSAIN taiq zis nghuot. Ngos Egutu hwankti dah jeswus nghuot. Ngos nyah loqyom aiq shot lyis yah khyauh das- Gis vloq eq, gyau goeus vloq eq nghuot. Housoeh moengsa ka nyah loq masyah gyoh das.

²³Ngos Egutu bang lyis mungkvn dvkhauyah sanh tyamp das.

²⁴Ngos Babilon hwankti loqyom lyis yombos nhang lha, ngah moengsa nyah loq mas kyauh das, nghuot laus eq ngos Egutu hwankti dah loqyom lyis khauh das. Housoeh nyang gas nyah jeswus xikkhonh mas noskyingh zis yah shei das.

²⁵Nghuot goeus, ngos nyang lyis yomnhuk nhang lha Babilon hwankti lhyi yombos nhang das. Ngos nyang lyis ngah moengsa kyauh lyis, nyang gas Egutu pheh yings das. Ngos YHENSAIN nghuot yvlyis yuk khanghmuh seq das.

²⁶Ngos Egutu bang lyis mungkvn dvkhauyah sanh tyamp das. Housoeh lyis ngos YHENSAIN nghuot yvlyis nyamoq seq das, ge.