Read Achang EZEKIEL 31 Bible Online

EZEKIEL 31 - Achang bible

EZEKIEL 31

¹Ngamoq jonsdoeus loh zis dvci das vzvn, somh vkhyvp cangxeih nyeih lyis YHENSAIN ngos lyis jis.

²Nyang taiq, Lvcang eh, Egutu hwankti yahge nyah dius jens dvnganh lyis taiq aq. Nvng kha iq yomsoq bos! Ngos nvng lyis cha yah yoh byi das?

³Nvng gas[26] Lebanon mas dah arit saiq teh nghuot. Hauh vko ka yungh las buisshen gis joq, hau saiqzains gas jyommauh[27] lyis dons shoq nyhang.

⁴Jeis gas hauh yvlyis kuh los nhang, nyeis khau mha dah jeislvng jens eq hauh yvlyis nyoeu tsoh kat. Hauh jeislo lvng jens gas hauh saiqzains yuk yvmas jeis sanh dyei. Saiqkhyam mha bos dah saiqzains dvnganh xiklyis eq jeislo lvng tsain yaus loh nhang.

⁵Houka jeis vlhomuh yoh yvmvyah gohtoeu saiqzains jens thoq lyis zes nyhang shoq kuh los. Nyah vko jens eq nyo las xing joq.

⁶Hauh vko mha nghoq nyau khanghmuh sot tsain sot. Hauh vkhyei mha ye gaunyhauq jens lo los whop; mungkvn mas dah dius nyau jens hauh buisshen mha tsain no.

⁷Nyhang lha vko xing dah saiqzains gas kha iq yungh! Nyah vnyet gas nauh las yaus nyeis dah jeislo lvng mas dons.

⁸Mangso khyam mha dah arit saiq gas nyang lyis ma yoh byi. Khah xoeuh zains eq housoeh teh vko ma bos ku. Saiq shonh zains eq houteh vko ma bos ku. Mangso nyang dah khyam mha hou iq yungh vzains ma bos.

⁹Ngos hauh yvlyis saiq ko thuq las yungh shoq kuot toh. Houka Mangso dah Eden khyam mha dah vzains khanghmuh lyis noh nhang.

¹⁰Housoeh las hau jyommauh lyis dons shoq kuh los dah saiqzains cha mus das zis ngos Yomzains YHENSAIN nvng lyis taiq bah. Hauh zis mvno nyhang los mvno khwank.

¹¹Housoeh las ngos hauh yvlyis doeuh tyamp, guon dah lvbaus lyis kyauh. Nyang gas hauh saiqzains lyis nyang lhung cho yah mon-yih zis kuot dyei bas jungh.

¹²Lhoeng dah lvbaus vnyau yah hauh yvlyis thoeuq lhain lha toh khoq das. Nyah vkoq yahge vkyang ka hauh mau mas dah boms yahge langhkhau khanghmuh mas gyoh das. Nyah buisshen mha nyeis khoq dah dius nyau jens dvnganh eq thuq loh das.

¹³Nghoq jens gas hau lains joq dah saiqzains mas los nyeis das. Yewus jens eq hau vko thoq mas suh loh das.

¹⁴Gvshih masyah jeis gis gis yoh laus eq houyhang teh nyhang saiqzains ma yuk lo das. Nyah vthyoh gas nyhang lha jyommauh lyis dons shoq ma nghuot lo das. Hauh vzains dvnganh gas, seq shei dah vyhang teh dyoq dyuk das. Nyamoq gas shei mau mas shei goeus bang yah dvgeh dyoq dyuk das.

¹⁵Heika Yomzains YHENSAIN taiq zis nghuot. Hau saiqzains shei mau mas loh dah buisnyeis lyis, kuk dah vlho khyvlyis ngos hau nyeisjvng khau mha dah jeis gas hauh yvlyis nghop nhang das. Ngos hauh jeislvng jens lyis lang tauh yoeus las jeislo lvng nyoshoq ma yaus thuq nhang lo das. Hauh saiqzains shei goeus yvmvyah Lebanon boms jens lyis soeng soeng noq zis yah nghop nhang lha, hau saiq khyam mha dah saiqzains jens dvnganh nyhauh nhang das.

¹⁶Ngos hauh yvlyis shei mau mas khyoq kat uhlyis hauh zis gyoh dah thwe ka, dius nyau jens lyis nhont das. Eden khyam mha dah saiqzains dvnganh yahge Lebanon boms mas jeis jo jo xauh dah gis thank saiqzains, nyeis khau mha jweh goeus dah saiqzains jens hau gyoh cho lhyi nhaiqdoeus das.

¹⁷Nyamoq gas hauh zis yah dvgeh shei mau mas gyoh goeus bang yah loh tsoq goh. Nyah buisshen mha nyeis bang dvnganh gas dius nyau jens mas dyos loh das.

¹⁸Hauh saiqzains gas Egutu hwankti yahge nyah dius jens dvnganh nghuot. Eden mas dah saiq yangh hou iq ma nyhang. Nghuot laus eq gvshih gas Eden mas dah saiqzains teh shei mau mas gyoh las mangso ma bos bang yahge jes mas sat xauh bang yah dvgeh tsoq goh das. Ngos taiq goeus, ge Yomzains YHENSAIN taiq.