Read Achang EZEKIEL 35 Bible Online

EZEKIEL 35 - Achang bible

EZEKIEL 35

¹YHENSAIN ngos lyis jis.

²Nyang taiq, Lvcang eh, Edom mau lyis taiq hoeuh aq.

³Ngos, Yomzains YHENSAIN taiq nyeis zis dius jens lyis taiq kyoh aq. Edom boms jens eh, ngos nah jeswus nghuot. Ngos nvng lyis jyamhjyuklhyuk nyeisgyih yos kuot das.

⁴Ngos nah wus jens lyis thyoqpi toh das. Nah mau lyis jyamhjyuklhyuk kuot das. Housoeh lyis ngos YHENSAIN nghuot yvlyis nvng seq das.

⁵Nvng gas Israel dah ma thank lo jeswus nghuot. Nyah dyoqbis zainsmuh shishenh lyis nyah dius jens lyis sat. Nyah yaunos gvng mas nyang lyis thang thank joeng shishenh lyis eq sat.

⁶Housoeh las jyoengh ngos, Yomzains YHENSAIN ka dwis nyeis Mangso nghuot zis yah dvyhangteh, shei cho ka nah uhpui loqkyoq nghuot. Nvng ma yoh phang luiq. Nvng mas dius sat yobos bos.[29] Sat cho ka nvng lyis chank khat das.

⁷Ngos Edom boms mau lyis tyeihgesles kuot las houcho suh lai soeu khanghmuh lyis sat das.

⁸Ngos hauh boms jens lyis mvng yah nghop das, jes mas sat zis xauh bang dah mvng gas jing jens, langhkhau jens mas tsain gyoh loh das.

⁹Ngos nvng lyis vcaiq vto jyamhjyuklhyuk kuot das, nah wus jens mas hank eq ma doms nyeis lo das. Housoeh ngos YHENSAIN nghuot yvlyis nvng seq das.

¹⁰Ngos YHENSAIN ka nyamoq dah Mangso nghuot khoq laus eq, Yuda yahge Israel aiq nyau yah dvgeh nyamoq dah mau gas nvng yah sen lha, nyamoq lyis nvng sain ge taiq.

¹¹Housoeh las jyoengh, ngos Yomzains YHENSAIN ka dwis nyeis Mangso nghuot zis yah dvyhangteh, nvng ngah dius jens lyis nhaiqyo, noh, hoeng cho xiklyis ngos nvng lyis lvto tauh phuk das. Nvng nyamoq lyis kuot goeus cho, ngos nvng lyis joeng nyeis yvlyis nyamoq seq das.

¹²Housoeh lyis nvng ma phauhgis taiq zis, ngos YHENSAIN xauhgyo cho nvng seq das. Hau ma phauh gis cho ka Israel boms jyamhjyuklhyuk bweh las namoq thonh das xiklyis nghuot goeus ge cho nghuot.

¹³Nvng ngos lyis tyi lha malyen lo moengs dang taiq zis ngos xauhgyo goeus.

¹⁴Yomzains YHENSAIN taiq, mungkvn gonh gas nvng dyoq gyoh cho lhyi gauslaus shoq ngos nvng lyis jyamhjyuklhyuk kuot das.

¹⁵Ngos sain dah Israel mau jyamhjyuklhyuk mus yvlyis nvng gauslaus vgus ngos nvng lyis kuot das. Seir boms jens, Edom mau gonh jyamhjyuklhyuk mus das. Housoeh lyis ngos YHENSAIN nghuot yvlyis yuk khanghmuh seq das, ge.