Read Achang EZEKIEL 36 Bible Online

EZEKIEL 36 - Achang bible

EZEKIEL 36

¹YHENSAIN taiq, Lvcang eh, Israel boms jens lyis jis las ngos, Yomzains YHENSAIN nyamoq xiklyis bos dah loeus lyis gyo geh oen taiq kyoh aq. Israel dah jeswus jens pyo las taiq, Gvshih hau gohlhain dah jing jens gas ngamoq zis nghuot! ge.

³Lvpe pe aq, hauh thang lhyi ngos Yomzains YHENSAIN taiq nyeis zis taiq hoeuh aq, Yhenkyoh dius nyau jens Israel boms lyis nyhik las thyoq yoeus loh uhlyis dvnganhmoq gas Israel lyis laihwangh.

⁴Housoeh las gvshih ngos, Yomzains YHENSAIN, Israel boms jens jing jens, langhkhau yahge jeislo lvng jens, dyoqgyoh joq dah joqyos jens, vyvm vwi mas dah dius nyau jens yah thyoq yoeus las jwangh khoq, dius ma nyeis dah wus jens lyis cha taiq nyeis zis gyo aq.

⁵Ngos, Yomzains YHENSAIN yvmlhaink mas dah dius nyau jens, zes las Edom mau lyis tyi lha ngah nhaiqyo nyi ngeh zis yah taiq thuq. Edom jens gas ngah maunyeis lyis dius ngis khyoq las gaus gaus yis yis amh yoeus, sain yoeus las nyamoq dah katjang kuot.

⁶Housoeh las Israel mau lyis lvpe pe aq: boms jens, jing jens, jeislo lvng jens yahge langhkhau jens lyis ngos Yomzains YHENSAIN noh nhaiqyo zis yah cha taiq nyeis zis taiq kyoh aq. Khasoeh ge lyis dius nyau jens gas nyamoq lyis laihwangh zis yah ngelang gyoh nhang goeus.

⁷Ngos Yomzains YHENSAIN ka namoq vyvm vwi mas dah dius nyau jens lyis, laihwangh zis xauh das oen dangthoengh toh goeus.

⁸Nghuot laus eq Israel boms mas saiqzains jens gas vhuq doms nyonh las namoq ngah dius Israel xiklyis vshih shih das. Namoq Israel jens ma nyangh lyis yhen mha tauh los das.

⁹Ngos namoq shot pheh nghuot las ngos namoq dah maunyeis doms phuk zis yah jyo khyoq shoq kuot das.

¹⁰Ngos namoq lyis nyoshoq jebais nhang das, namoq gas wus jens mas nyeis las dyoq gyoh joq zis dvnganh doms ci das.

¹¹Ngos dius jens yahge gaunyhauq lyis jebais nhang das. Houmha namoq xikpheh thoq lyis zes nyo los das las loshang jens nyoshoq bos das. Ngos namoq lyis xikpheh nyeis ku teh doms nyeis nhang das. Xikpheh thoq lyis nyeisgis nhang das. Housoeh lyis ngos YHENSAIN nghuot yvlyis namoq seq das.

¹²Ngos ngah dius Israel jens lyis hauh mau mas shwih tauh los las nyeis nhang das. Houka namoq nyang dah mau nghuot das las, nah loshang jens lyis khanhamp eq ma doms yuot shet lo das.

¹³Ngos Yomzains YHENSAIN taiq, Hauh mau gas dius zo, nah dius nyau masyah loshang jens shwih loh, ge dius jens taiq zis jus.

¹⁴Nghuot laus eq gvshih masyah houka dius lyis ma zo lo, nah lojens lyis eq ma thyoq loh lo. Ngos Yomzains YHENSAIN taiq goeus.

¹⁵Hauh mau gas dius nyau jens yah yisnaus toeuq zis ma xauhgyo lo das. Dius jens nyhap zis ma nyvng lo das. Hauh mau gas nyah vnyau lo jens lyis ma lhuot loh lo das. Ngos Yomzains YHENSAIN taiq goeus.

¹⁶YHENSAIN ngos lyis jis.

¹⁷Nyang taiq, Lvcang eh, Israel jens nyamoq mau mas nyeis uhlyis nyamoq nyeisyap cho yahge kuot cho yah mau lyis vwot v-oeu kuot. Nyamoq dah wotwu gas ngah xikkhonh mas mesmus vmesbih dah vchoqh vlhauq teh nghuot.

¹⁸Hauh mau mas nyamoq dius sat gvng mas, phvra gvng mas nyamoq hauh yvlyis vwot v-oeu kuot. Housoeh las ngos nyamoq thoq mas ngah nhaiqyo zis huot khyoq.

¹⁹Ngos nyamoq nyeisyap cho yahge kuot cho xiklyis ngos nyamoq lyis dang thang thyet las lvbaus mau mas sanh tyamp.

²⁰Nyamoq khalhye loh khalhye ngah gyingshang nyings lyis ngelang gyoh cho she los. Khasoeh ge lyis dius jens gas, Haih bang gas YHENSAIN dah dius jens nghuot laus eq, nyamoq gas nyah mau masyah thuq loh chah goeus, ge.

²¹Ngos ngah gyingshang nyings xiklyis ehnyet ma tap. Israel jens gas nyamoq jweh dah dius nyau mas ngah gyingshang nyings lyis ngelang gyoh cho she los.

²²Housoeh las ngos Yomzains YHENSAIN Israel xiklyis bos dah loeus nyamoq lyis dyei aq. Israel jens eh, ngos kuot das zis gas namoq xiklyis ma nghuot. Namoq dyos jweh dah mau khanghmuh mas namoq ngelang khyoq goeus dah ngah gyingshang nyings xiklyis dvnghuot.

²³Namoq dius nyau jens mas ngelang khyoq dah ngah gyingshang nyings - ngos dius nyau jens mas ngah kuhxing nyings dah gyingshang cho kuot xoeuq lyis, ngos YHENSAIN nghuot yvlyis nyamoq seq das. Ngos Yomzains YHENSAIN taiq goeus. Ngos gyingshang cho dius nyau jens lyis chixoeuq das xiklyis ngos namoq lyis yhung das.

²⁴Ngos namoq lyis dius nyau khanghmuh yahge mau khanghmuh masyah shwih yoeus las, namoq nyang dah mau mas doms shwih kat das.

²⁵Ngos namoq thoq mas tsingh-kan jeis tyitsant das las, namoq dah phvra yahge namoq lyis lhoq lhoeuh dah vyhang dvnganh masyah namoq lyis tsingh-kan nhang das.

²⁶Ngos namoq lyis nhaiqlom vsaiq, ehnyet vsaiq dyei das. Namoq mas than dah lukzains nhaiqlom lyis yoeus tyamp las domsyos gyo dah nhaiqlom dyei das.

²⁷Ngos namoq vkhau mha ngah Dyos kat dyei das las, ngah lyi chank las ngos namoq lyis dyei toh dah tyingtoh dang lyis chank das xiklyis pangh das.

²⁸Housoeh namoq gas, ngos namoq dah phauh thyeih moq lyis dyei toh dah mau mas nyeis das. Namoq gas ngah dius duot las ngos eq namoq dah Mangso duot das.

²⁹Namoq lyis lhoq lhoeuh dah vyhang dvnganh masyah ngos namoq lyis khyuot yoeus las jyo nyoshoq yoh das zis doengs toh das. Housoeh las namoq phanghkhauq ma xauh lo das.

³⁰Ngos namoq dah shihzains mas shih yahge maunyeis mas jyo yhomh cho nyo los nhang das las yuot shet gvng mas dius nyau jens mas xoqphuh cho khanhamp eq ma xauh kham lo das.

³¹Namoq gas namoq dah ma gis wotwu yahge kuot shuot cho lhyi soh das. Namoq dah yaunos yahge lyi ma chi cho gvng mas namoq nyang gungs lyis choqh das.

³²Israel jens eh, ngos namoq xiklyis haih zis dvnganh ma kuot yvlyis seq nhang mes. Ngos namoq lyis namoq kuot goeus dah xoqphuh cho yahge ngelang gyoh cho lhyi soh nhang mes. Ngos Yomzains YHENSAIN taiq goeus.

³³Yomzains YHENSAIN taiq, Ngos namoq dah yaunos dvnganh cheihshang lhyi, ngos namoq lyis namoq dah wus jens mas doms nyeis nhang das, dyoq gyoh joq yvlyis doms tsuk nhang das.

³⁴Nah maunyeis chank gyangh suh lai soeu khanghmuh gas hauh zis mhanh kha iq thoeu zis nyvng. Nghuot laus eq ngos nvng lyis khyam doms kuot nhang das.

³⁵Yuk khanghmuh gas, Haih mau gas lhyang nyang dyoq gyoh goeus. Gvshih gas Eden khyam teh bweh goeus. Wus jens eq monh tyamp goeus laus eq goengtoenk las dius jens dyingh goeus, ge das.

³⁶Doeng nyeis shih dah yhenkyoh dius nyau jens gas ngos YHENSAIN ka dyoq gyoh goeus dah wus jens lyis doms tsuk, nyeis gyih yos lyis doms tsungh cho lhyi eq seq das. Ngos YHENSAIN haih zis kuot das oen dangthoengh toh las tyink das.

³⁷Yomzains YHENSAIN taiq, Ngos Israel jens lyis, pangh das cho dvlhain doms dung nhang das. Ngos nyamoq lyis yvng phung teh jebais los nhang das.

³⁸Toeuq toh pwe mha phudyei das zis Yerusalem mas yvng jens dyingh joq teh, gvshih dyoq gyoh joq dah wus jens gas dius jens yah dyingh das. Housoeh lyis ngos YHENSAIN nghuot yvlyis nyamoq seq das, ge.