Read Achang EZEKIEL 39 Bible Online

EZEKIEL 39 - Achang bible

EZEKIEL 39

¹Yomzains YHENSAIN taiq, Lvcang eh, Meshek yahge Tuba dius nyau jens lyis guon dah zau, Gog lyis taiq hoeuh aq. Ngos gas nyah jeswus nghuot oen nyang lyis taiq kyoh aq.

²Ngos nyang lyis cho saiq pheh tauh nhang lha, we dah mautsung shot, Israel dah boms jweh shoq shwih loh das.

³Hauh thang lhyi Ngos nyah loqwi loq mas dah lyei yahge nyah loqyos loq mas dah nyo lyis tsain bat khyoq das.

⁴Gog yahge nyah jesphung, nyang yah buisnoms toh bang gas Israel boms mas tsain lains shei das. Ngos nyamoq dah mvng lyis nghoq jens yahge yewus jens dvnganh dah zonoms bweh nhang das.

⁵Nyamoq pa mha lains shei das. Ngos Yomzains YHENSAIN taiq goeus.

⁶Ngos Magog mau yahge jyankyvm chank yah yuk-yos-tamh-tai nyeis bang mas nyi kat xi das. Housoeh ngos YHENSAIN nghuot yvlyis yuk khanghmuh seq das.

⁷Ngah gyingshang nyings lyis, ngah dius Israel jens lyis seq nhang das las ngos ngah nyings lyis ngelang ma gyoh nhang lo das. Housoeh lyis ngos Israel dah Gyingshang Mangso, YHENSAIN nghuot yvlyis dius nyau jens seq das, ge.

⁸Yomzains YHENSAIN taiq, Ngos taiq dah hauh buisnyeis jyoengh jweh los das.

⁹Israel wus jens mas nyeis bang gas thuq las thangh xiklyis tyamp toh kyonhkhyi kui das. Nyamoq gas gos, lyei, nyo, lham, yahge lhamloq lyis thangh zvng tsain zvng las houka nyhet zvn xiklyis tham.

¹⁰Nyamoq gas pa mha thangh ma xo, saiqyos mas saiq ma thoeuq lo noh das. Khasoeh ge lyis nyamoq tyamp toh kyonhkhyi ngheq chah. Nyamoq gas nyamoq lyis thyoq goeus bang lyis thyoq das; lhuot zo bang lyis lhuot zo das, ge Yomzains YHENSAIN taiq goeus.

¹¹YHENSAIN taiq. Hai dvnganh bweh lyis, Israel mau Coh Thomh dah buisthuq pheh gyung suh bang dah Langhkhau mha Gog lyis lop-yos dyei das las cho cheiq toh. Houmha Gog yahge nyah jesphung nyhop das. Hauh langhkhau lhyi, Gog dah Jesphung Langhkhau ge lui das.

¹²Hauh mau lyis doms shang das xiklyis Israel jens hau mvng tsain ba nyhop zis lhamhmuh nyhet khyvp nyangh das.

¹³Hauh mau mas bang yuk khanghmuh nyamoq lyis bos nyhop das. Ngos ung los, haih buisnyeis xiklyis nyamoq ngos lyis nyoqnho ngelang dyei das. Ngos Yomzains YHENSAIN taiq goeus, ge.

¹⁴Lhamhmuh nyhet khyvp lai thang lhyi, nyamoq gas houcho suh lai las nyeisjvng mas mvng vjoq lo lah zis xo lha nyhop das xiklyis dius khyen kat das. Housoeh nyamoq hauh mau lyis cheihshang cho yoh kuot das.

¹⁵Nyamoq hauh mau mas doq gyoh loh zis yah dvyhangteh, lhain khanghmuh dius shohyau nyvng las hauh vnvm mas jyih toh das. Housoeh lop dwang doeu bang los las hauh yvlyis Gog dah Jesphung Langhkhau mha yoh nyhop das.

¹⁶Houmha Hamona ge dah wus eq bos das. Housoeh nyamoq hauh mau lyis cheihshang das.

¹⁷Yomzains YHENSAIN ngos lyis taiq. Lvcang eh, yvmlhaink mas dah nghoq jens yahge yewus jens dvnganh lyis, ngos nyamoq xiklyis sont nyeis dah phudyei pwe los zo geh oen khi aq. Houka Israel boms mas pwe zainsmuh nghuot das. Houmha nyamoq shoh xauh zo das, suih xauh shuk das.

¹⁸Nyamoq gas jeslo jens dah shoh xauh zo das, nyeisjvng lyis guon bang dah suih xauh shuk das. Nyamoq dvnganh gas nyhuk toh dah yvnglus, yvnglo, shvbeq yahge Bashan noeulu jens lyis sat teh sat zis tsain xauh das.

¹⁹Ngos haih dius jens lyis lomhxangh shoh sat teh sat lyis, nghoq jens yewus jens gas coeu lhyi nyamoq jo shoq zo las, suih lyis eq yet shoq xauh shuk das.

²⁰Nyamoq ngah jus mas, nyang jens, nyang ji bang yahge jeslo jens yahge jeszan bang dah shoh lyis jo shoq zo das. Ngos Yomzains YHENSAIN taiq goeus.

²¹YHENSAIN taiq, Ngos dius nyau jens lyis ngah phunk nyvng nhang das las, ngos lyi jus khyvlyis thyet cho lhyi ngah yomsoq yhung lha khasoeh kuot thuq kat yvlyis chixoeuq das.

²²Hou mhayah Israel jens gas ngos YHENSAIN, nyamoq dah Mangso nghuot yvlyis seq das.

²³Israel jens gas, nyamoq ngos lyis tyi lha cu dah yaunos gvng mas jonsdoeus loh. Ngos nyamoq lyis nungs phuk tyamp las nyamoq dah jeswus jens lyis yah, nyamoq lyis ung nhang, nyamoq lyis jes mas sat nhang cho lhyi dius nyau jens seq das.

²⁴Ngos nyamoq lyis nyamoq dah vchoqh vlhauq cho yahge lhung cho yah mon-yih zis dyei. Ngos nyamoq masyah nungs phuk loh.

²⁵Yomzains YHENSAIN taiq, nghuot laus eq gvshih ngos Yakop vnyau vshih, Israel dius jens lyis nhaiqnyen das las nyamoq lyis nyeisgis yap lhoq cho doms kuot dyei das. Ngos ngah gyingshang nyings lyis gos das.

²⁶Nyamoq lyis hank ma kyuk, nyamoq nyang mau mas jesluiq shohluiq dvlhain doms nyeis lyis, nyamoq ngos lyis phanhlyen las ngelang khasoeh gyoh cho lhyi tohnyhik das.

²⁷Ngos gyingshang cho dius nyau nyoshoq lyis chixoeuq das nyhenshang ngos ngah dius jens lyis nyamoq dah jeswus jens nyeis dah mau masyah shwih tauh los das.

²⁸Housoeh lyis ngos YHENSAIN, nyamoq dah Mangso nghuot yvlyis ngah dius jens seq das. Ngos nyamoq lyis jonsdoeus loh nhang lha gvshih nyamoq lyis tsainh yoeus las nyamoq nyang mau mas dvyuk yangh ma khyoq khoq shwih tauh los yvmvyah nyamoq haih zis seq das.

²⁹Ngos ngah dius Israel thoq mas ngah dyos huot khyoq das las nyamoq jyank masyah khanhamp eq nungs ma phuk loh lo das. Ngos Yomzains YHENSAIN taiq goeus, ge.