Read Achang EZEKIEL 4 Bible Online

EZEKIEL 4 - Achang bible

EZEKIEL 4

¹Mangso taiq, Lvcang eh, jyenhchvp dvkoeuq nah xikkhonh mas toh las houmha Yerusalem wus silho khyet toh aq.

²Hauh wus lyis lhaink toh aq; gvduk tsain doeu geh; wus mas yoeuh das zis tsoh ciank ci lha cho kuot aq, yvmlhaink yah thoenggus toh aq, wus lhaink yah ciank thungh thyoq das saiq doms toh geh.

³Thyeq dvkhyamh yoeus las nvng yahge wus jo mas ciank teh kuot toh aq. Nvng hau wus pheh xoeu toh aq; houka wus lyis lhaink toh, nvng gas hauh wus lyis lhaink toh soeu nghuot. Heika Israel vnyau xiklyis vlho nghuot das.

⁴Hauh thang lhyi nvng gas loqwi pheh jyont toh aq. Ngos nah thoq mas Israel vnyau dah yobos kih dyei das. Nyamoq dah yobos gvng mas nvng houmha 390 nyeih nyeis las kham chah. Nyamoq dah joeng cho nyangh das zvn nyhenshang dvzvn xiklyis dvnyeih ngos nvng lyis zaudang khyoq goeus.

⁶Hauh zis dye lyis, nvng loqyos pheh phanh las Yuda dah yobos xiklyis nyeici nyeih kham chah. Nyamoq dah joeng cho dvzvn xiklyis dvnyeih toh.

⁷Yerusalem lyis lhaink toh yvmas yoeuh tsuk toh aq. Wus lyis tyi lha nah loqtsop tyi zis yah lvpe pe aq.

⁸Ngos nvng lyis twih toh das las, hauh wus lyis lhaink toh cho thank shoq nvng dvshot masyah gohtoeu dvshot mas ma yoh phanh.

⁹Gvshih nvng Sunghso, bali, nukdu, zainsdoq, sunghso nes, cungh sunghso yoeus las auh dvkoeuq mas kat lhoeuq las nah xiklyis ohlhyoq kuot aq. Nvng loqwi shot jyont toh buisnyeis somhxo gauci nyeih gyo lyis zo das zis nghuot.

¹⁰Nvng dvnyeih lyis ohlhyoq 230 gram dvgis zo, Hauh zis toeuq toh shishenh lyis zo aq.

¹¹Jeis eq laiq las dvnyeih lyis aiq khuq dvshuk aq; toeuq toh shishenh lyis shuk aq.

¹²Nvng dius jyoq kyuk yah nyikhyomp kuot aq, hauh nyi mas ohlhyoq piq las nvng lyis yuk khanghmuh yoh nyvng yvmas zo aq.

¹³YHENSAIN taiq, Heika Israel jens gas, Ngos nyamoq lyis lvbaus mau mas sanh tyamp lyis nyamoq lyi yah tung toh dah zonoms lyis xauh zo das vlho nghuot.

¹⁴Nghuot laus eq ngos phuk taiq zis gas, Ma nghuot, Yomzains YHENSAIN eh, ngos gas ngvnyang gungs lyis vwot v-oeu khanhamp eq ma kuot. Ngos loshang yoq lyis yah nyang pheh yah shei dah gaunyhauq shoh, yewus ngat sat shoh khanhamp eq ma zo ku. Ma lhoq oen nghamh dah zonoms lyis khanhamp eq ma zo, oen.

¹⁵Housoeh las Mangso taiq, Gis goeus, hauh gungsthaiq ngos nvng lyis noeu khyeih yhung nhang das, nvng hauh thoq mas nah ohlhyoq yoh piq, ge.

¹⁶Nyang ngos lyis taiq shih, Lvcang eh, ngos Yerusalem lyis dyei dah ohlhyoq lyis thyet tyamp das. Houmha nyeis bang gas zonoms yahge jeis lyis laiq las zo shuk zoh lyis shanghsenh zis yah chiqjyen das.

¹⁷Nyamoq mas ohlhyoq yahge jeis thank loh das las nyamoq yomgyau das. Nyamoq dah yaunos gvng mas nyamoq gyih lains loh das, ge.