Read Achang EZEKIEL 40 Bible Online

EZEKIEL 40 - Achang bible

EZEKIEL 40

¹Heika zvn saiq dvci vnyeih nghuot. Ngamoq jonsdoeus loh dah aiqci oeng vzvn, Yerusalem wus gyoh tyamp thang lhyi dvci nyei vzvn lyis nghuot. Hauh nyeih lyis, YHENSAIN dah yomsoq ngah thoq mas nghuot zis ngos soh. Nyang ngos lyis shwih loh.

²Nyoqnyvng mas Mangso ngos lyis Israel mau mas shwih los las, boms nyhang thoq mas toh. Hauh boms dah mautyi pheh wus teh yoeuh doeus dah yhen jens ci toh zis nyvng.

³Nyang ngos lyis houmha tanh tanh shwih loh. Ngos houmha thunk teh bvng dah dius dvyuk nyvng. Nyah loq mas jei khying keq twih dvkhvt yahge keq lyang dvkoeuq chi lha khyam khomh yvm mas yap joq.

⁴Nyang ngos lyis taiq, Lvcang eh, ngos nvng lyis heimha shwih los yvmvyah, zungh yoeuh aq, vlhomuh gyo aq, ngos nvng lyis chixoeuq zis dvnganh tanh tanh kamp gyo las nvng nyvng ya nyvng zis Israel jens lyis taiq kyoh nhang, ge.

⁵Ngos nyvng zis gas Yhenmuh nghuot. Hauh vyvm chank yah ciank bos. Hauh vbusbih gas 10 pe xing dah keq lyang yoeus las ciank lyis keq. Houka nyhang choeu 10 pe, thoeu zis eq 10 pe nghuot.

⁶Hauh thang lhyi nyang buisthuq pheh xoeu toh khyam khomh mas loh. Nyang zvmlhangh mas doq loh las vthyoh masyah khomhdwang mas keq lyis houka 10 pe nyhang.

⁷Khomh lai lyis cholo dvkhvt bos. Hau cholo dah loqwi loqyos pheh zungh das yvplo dvshot somh koeuq koeuq bos. Hauh yvplo jens gas soehuq thunk tsain nghuot las dvshot dvshot gas 10 pe nghuot. Hauh yvp tyoyvm dvkoeuq yah dvkoeuq jo gas 8 pe thoeu joq. Hauh zis tsain lai lyis 10 pe xing lha, Yhenmuh pheh xoeu toh dah wumuk yvp pheh loh cholo dvkhvt bos.

⁸Nyang wumuk yvp lyis keq lyis houka 14 pe nyhang yvlyis nyvng. Houka Yhenmuh pheh ni thank cho vthang yahge ciank pheh vthang jweh shoq 3 pe thoeu.

⁹

¹⁰Hauh cho thyi shot haq shot mas bos dah zungh yvp jens gas dvyih yih nghuot. Hauh jo mas dah tyoyvm jens eq dvnganh dvyhangteh thoeu.

¹¹Thang lhyi, hauh dius yuk hau khyam khomh cho mha dah cho lhyi keq lyis, lywas choeu dvnganh lyis 22 pe nghuot las khyam khomh jo mas gas 16 pe nghuot.

¹²Zungh das yvp jens dvyvp dvyvp dah xik mas, 20 loqshih nyhang lha 20 loqshih thoeu dah tyoyvm nyhen dvkoeuq koeuq joq. (Hauh yvp jens gas 10 pe soehuq thunk tsain nghuot.)

¹³Hauh thang lhyi nyang yvp nungsthank tyoyvm[32] masyah cho thyitvp twi twi yvp nungsthank tyoyvm jweh shoq mas keq lyis houka 42 pe nghuot.

¹⁴Khyamkhau pheh thuq loh dah thang thank vyvp bos. Nyang hauh yvp lyis keq lyis houka 34 pe lvm zis nyvng.

¹⁵Khyamkhomh ciank nghe masyah vtheh thang thank yvp jweh shoq, khyam khomh cho xing choeu dvnganh lyis 84 pe nghuot.

¹⁶Hau yvp jens mas nghe pheh xoeu toh tyoyvm jens mas eq, yvp jo vkhau tyoyvm mas eq khomhbaiq lo tsain bos. Cho pheh xoeu toh dah tyoyvm vkhau pheh dyomszains silho tsain thwang tap toh.

¹⁷Hauh vbusbih gas ngos lyis khyam khomh cho yah khyam khau mha shwih wvng loh. Houmha ciank lyis nges las yvp somhci ci toh. Hauh xik mas luk nyhoeuh joqyos bos.

¹⁸Houka Khyamkhau yvmlhaink yah jyeq kat toh. Hai khyamkhau nghe puk gas khyamkhau vkhau puk thoq lyis nyhen.

¹⁹Houmha nyhang dah khyamkhau vkhau puk pheh loh dah khyam khomh cho dvkhvt bos. Hauh dius yuk hau khyamkhau nghe puk masyah vkhau puk pheh loh dah cho jo lyis keq lyis houka 168 pe bos.

²⁰Hauh thang lhyi hauh dius yuk gas mautsung shot pheh khyamkhau nghe vpuk mas wvng loh khyam khomh cho lhyi keq.

²¹Cholo dah dvshot pheh somh yvp yvp bos dah zungh das yvplo jens, hau yvp jens jo mas dah tyoyvm jens, wumuk yvp dvnganh dah keq cho ka buisthuq khyam khomh mas zis yah dvyhangteh nghuot. Khyamkhomh cho dvnganh lyis xing choeu 84 pe, vtyi 42 pe nghuot.

²²Wumuk yvp, khomhbaiq jens yahge dyoms zains silho thwang tap zis eq, buisthuq khyam khomh mas zis yah doeusgoh. Heimha zvmlhangh nyhet keq yah khyam khomh pheh doq loh; wumuk yvp gas vthang pheh nghuot las khyamh khau pheh xoeu toh.

²³Mautsung khyam khomh cho yah khyamkhau lai lyis khyamhkhau vkhau puk pheh loh dah khyam khomh cho bos. Houka buisthuq pheh zis yah dvyhangteh nghuot. Hauh dius yuk gas hau khyam khomh cho aiq koeuq jo mas keq lyis houka 168 pe bos.

²⁴Hauh thang lhyi hauh soeu ngos lyis mautyi shot pheh shwih loh las, houmha ngamoq gohtoeu khyam khomh cho dvkoeuq nyvng. Nyang hau vkhau tyoyvm jens yahge nyah wumuk yvp tsain keq lyis houka vkhang vgus gus nghuot.

²⁵Houmha khyam khomh cho mha dah yvp jens mas dah khomhbaiq jens gas vgus gus nghuot. Hau khyam khomh cho dah xing choeu dvnganh lyis 84 pe, lvm choeu 42 pe nghuot.

²⁶Zvmlhangh nyhet keq yah khyamkhau vkhau puk khyam khomh pheh doq loh. Nyah wumuk yvp eq vthang mha joq las khyamkhau pheh xoeu toh. Tyoyvm vkhau pheh dyoms zains silho thwang tap toh. Hauh zis cholo pheh xoeu toh.

²⁷Heimha eq Khyamkhau vkhau puk pheh loh dah khyam khomh cho dvkhvt bos. Hauh soeu hau khyam khomh cho aiq vkhvt lyis keq lyis houka 168 pe nghuot.

²⁸Hau vbusbih ngos lyis mautyi khyam khomh cho yah khyamkhau vkhau puk pheh shwih wvng loh. Nyang hau khyam khomh cho lhyi keq lyis nghe pheh tyoyvm dah khyam khomh cho yah dvyih yih nghuot.

²⁹Zungh das yvp jens, nyah wumuk yvp yahge nyah vkhau pheh tyoyvm jens gas gohtoeu khyam khomh cho jens yah dvyih yih nghuot. Houmha khomhbaiq jens eq, khyam khomh cho mha dah yvp jens eq tsain bos. Xing choeu dvnganh lyis 84 pe, lvm choeu 42 pe nghuot.

³⁰

³¹Gohtoeu khyamkhau pheh xoeu toh dah wumuk yvp, cholo chank yah tyoyvm mas dyoms zains silho tsain thwang tap toh. Zvmlhangh xet keq yah haih khyam khomh mas doq loh.

³²Hau vbusbih gas ngos lyis buisthuq khyam khomh cho yah khyamkhau vkhau puk pheh shwih wvng loh. Nyang hau khyam khomh cho lhyi keq lyis houka gohtoeu yah dvyih nghuot.

³³Nyah zungh dah yvp jens, nyah wumuk yvp yahge vkhau pheh nyah tyoyvm jens lyis eq gohtoeu khyam khomh cho teh vgus gus keq. Houmha yvmlhaink yah khomhbaiq jens, wumuk yvp tsain bos. Hau xing choeu dvnganh lyis 84 pe, lvm choeu 42 pe nghuot.

³⁴Hauh wumuk yvp gas khyamkhau nghe puk pheh xoeu toh. Cholo chank yah dah tyoyvm mas dyomszains silho tsain thwang tap toh. Zvmlhangh xet keq yah haih khyam khomh mas doq loh.

³⁵Hauh thang lhyi hauh vbusbih ngos lyis mautsung khyam khomh cho pheh shwih loh. Nyang hauh yvlyis keq lyis houka gohtoeu yah dvyih yih nghuot.

³⁶Houyah dvyhangteh, houmha vkhau tyoyvm shunk toh dah zungh yvp jens, wumuk yvp yahge yvmlhaink khomhbaiq eq tsain bos. Hauh dah xing choeu dvnganh lyis 84 pe, lvm choeu 42 pe nghuot.

³⁷Wumuk yvp[33] gas khyamkhau nghe puk pheh xoeu toh. Cholo chank yah dah tyoyvm mas dyoms zains silho tsain thwang tap toh. Zvmlhangh xet keq yah haih khyam khomh mas doq loh.

³⁸Mautsung shot pheh khyamkhau nghe puk, khyamkhau vkhau puk khyam khomh cho mha yhen dvyhen jyeq kat toh. Hauh zis khyamkhau pheh xoeu toh dah wumuk yvp pheh khomh phank kat toh. Houmha doeu gonh ngheq phudyei dah lomhxangh gaunyhauq lyis tsain cheih.

³⁹Haih wumuk yvp mas kihgus dvshot aiq koeuq mulas kihgus nyei koeuq joq. Hauh kihgus jens thoq mas doeu gonh ngheq phudyei jyungshuk, nghuot ya yaunos jyungshuk, yobos khyuot jyungshuk tsain sat.

⁴⁰Hauh yvp nghe pheh, mautsung khyam khomh dah wumuk mas dvyhangteh kihgus dvshot aiq koeuq mulas kihgus nyei koeuq joq.

⁴¹Lomhxangh gaunyhauq sat das kihgus dvnganh lyis xet koeuq nghuot. Yvp khau mha nyei koeuq, khyamkhau mha nyei koeuq nghuot.

⁴²Ngheq dyei jyungshuk sont yvmas yhung das xiklyis jyeq kat toh yhen mas khwih dah luk kihgus nyei koeuq nghuot. Houka nyhang choeu 31 loqshih dvkhyamh, vthoq gas 21 loqshih soehuqthunk nghuot. Lomhxangh gaunyhauq sat lyis yhung dah kyahsoe eq haih kihgus thoq mas tsain kih.

⁴³Kihgus thoq yvmlhaink yah lywas choeu loq 3 shih bos dah vkhop khop toh. Phudyei das shoh dvnganh hauh kihgus jens thoq mas kih toh.[34]

⁴⁴Hauh thang lhyi nyang ngos lyis khyamkhau vkhau puk pheh shwih loh. Khyamkhau vkhau puk mas yvp aiq yvp bos. Dvyvp gas mautsung khyam khomh cho vyvm mas nghuot las mautyi pheh xoeu toh. Gohtoeu dvyvp gas mautyi khyam khomh cho yvm mas nghuot las mautsung pheh xoeu toh.

⁴⁵Hauh vbusbih ngos lyis taiq, Mautyi pheh xoeu toh yvp gas Yhenmuh mas phuqsoe dah phudyei bang xiklyis nghuot.

⁴⁶Mautsung pheh xoeu toh yvp gas phon mha phuqsoe dah phudyei bang xiklyis nghuot. Hau phudyei bang dvnganh gas Zadok dah vnyau vshih nghuot. Nyamoq gas Lewi vkoq masyah khyen toh las, YHENSAIN xikkhonh mas nyang lyis loh phuqsoe das xiklyis toeuh yoh bang dvnghuot, ge.

⁴⁷Hauh vbusbih hauh khyamkhau vkhau puk lyis keq lyis, houka 168 pe soefuqthunk nghuot. Yhenmuh gas buiswvng shot pheh joq las, phon ka hauh ganthoq mas joq.

⁴⁸Hauh thang lhyi nyang ngos lyis Yhenmuh dah wumuk yvp mas shwih wvng loh. Nyang wumuk lyis keq lyis houka 9 pe nauh las lvm choeu 24 pe nghuot. Thyishot haq shot tyoyvm gas 5 pe thoeu.

⁴⁹Wumuk yvp mas zvmlhangh yah doq loh. Hauh yvp gas 34 pe lvm las 20 pe nyhang. Wumuk mas zains dvshot dvkoeuq mulas zains aiq koeuq bos.