Read Achang EZEKIEL 45 Bible Online

EZEKIEL 45 - Achang bible

EZEKIEL 45

¹Dvkoq dvkoq xiklyis maunyeis gvm dyei lyis, dvgvm gas YHENSAIN lhyi dyei chah: houka xing choeu 10 main, lvm choeu 8 main nghuot. Hauh maunyeis chuq gas gyingshang chah.

²Haih maunyeis chuq mas dvshot 840 pe bos dah soehuqthunk gas Yhenmuh joqyos xiklyis nghuot chah. Hauh yvmlhaink yah yos 84 pe lvm joq chah.

³Haih maunyeis dvgohyih lyis xing choeu 10 main, lvm choeu 4 main keq chah: houmha gyingshang thank dah Yhenmuh joqyos bos das.

⁴Houka, YHENSAIN dah Yhenmuh mas nyang lyis phuqsoe dah phudyei bang xiklyis gvm toh, hauh mau mas dah gyingshang joqyos duot das. Houka nyamoq dah yhen yahge Yhenmuh xiklyis maunyeis bos das.

⁵Gohtoeu dvgohyih gas Yhenmuh mas muh zwi bang Lewi jens xiklyis vso maunyeis khyvlyis gvm toh zis nghuot. Houmha nyamoq nyeis das wus jens bos das. [35]

⁶Gyingshang joqyos dah thang lhyi 10 main xing lha 2 main lvm dah gohtoeu dvjoqyos gas Israel hank eq gis nyeis dah wus nyhenshang joqyos gvm toh.

⁷Guon dah zaulo xiklyis eq nyeisjvng gvm toh. Gyingshang maunyeis dah buiswvng maukyo mhayah buiswvng pheh Mediteranean Thomh jweh shoq lvm loh das. Buisthuq maukyo mhayah hauh mau dah buisthuq maukyo jweh shoq lvm loh. Housoeh las hauh xing choeu ka Israel dvkoq xiklyis toeuq dyei dah maunyeis xing choeu yah doeusgoh.

⁸Haih maunyeis gas Israel mau mas guon nyeis dah zaulo jens yoh dah gvmboms nghuot. Housoeh las nyang dius jens lyis ma zaiq lo, nyet shih maunyeis Israel vkoq jens lyis sain nhang das.

⁹Yomzains YHENSAIN taiq, Namoq Israel dah guon bang eh, namoq yaunos kuot zis svsoh nyangh goeus. Gyvzaiq gyvnang kuot cho yahge lhuot zo cho toh tyamp geh. Jus cho yahge lyi jus cho kuot geh. Namoq ngah dius jens lyis nyamoq mau masyah khanhamp eq ma doms gis khat thuq lo. Ngos Yomzains YHENSAIN namoq lyis haih zis taiq nyeis.

¹⁰Yuk khanghmuh jus dah jvng yahge luh yhung chah.

¹¹Vkyuk laiq dah epha yahge jeis laiq dah bat dvyih nghuot chah; homa gas houmha chi dah laiq ja nghuot las, dvhoma mas dvci epha yahge dvci bat yih goh.

¹²Nah jvngshih gas o mha khyvlyis nghuot chah. Gera aiqci mha dvshekel, shekel khyukci mha dvmina bos chah.

¹³Heika nvng dyei chah dah jyungshuk mas nges das vpom nghuot. Yhomh dah sunghso: 60 boms mas dvboms, Bali: 60 boms mas dvboms Tsanlun zains mas dah coeu: 100 boms mas dvboms dyei chah.[36] Yvng: Israel dah katjang mas yvng aiqxo doeu mas dvdoeu mulas jyo jyungshuk, doeu gonh ngheq dyei gaunyhauq yahge nyenstap jyungshuk gaunyhauq chi los chah. Housoeh lyis nah yaunos khyuot zis xauh das. Ngos Yomzains YHENSAIN tying toh.

¹⁶Hauh mau mas dius jens dvnganh gas Israel lyis guon nyeis zaulo jyank mas haih jyungshuk tsain chi los chah.

¹⁷Lhamhmuh canh pwe, no nyeih yahge gohtoeu pwe jens mas Israel dvnyau gonh xiklyis doeu gonh ngheq phudyei gaunyhauq, jyo jyungshuk, zvbiq jyungshuk thyeq das zis gas hau zaulo dah yvwons nghuot das. Nyang gas Israel dah yaunos yoeus tyamp das xiklyis yaunos jyungshuk, jyo jyungshuk, dvnganh ngheq dyei jyungshuk yahge nyenstap jyungshuk dyei chah.

¹⁸Yomzains YHENSAIN taiq, Nvng cangxeih lhamhmuh khyvp das vnyeih lyis nos ma bos noeulu dvdoeu phudyei zis yah Yhenmuh cheihshang chah.

¹⁹Phudyei soeu ka hai yaunos jyungshuk suih dvkhamh yoeus las Yhenmuh khomh zains mas, phon thoq nyei thunk mas, khyamkhau vkhau puk pheh wvng dah khyam khomh cho zains mas tsain juot das.

²⁰Hauh lhamhmuh khyvp nyhet vnyeih lyis hank laus eq ma soh mathamh zangh kuot dah yaunos nyhenshang houyah dvyhangteh kuot chah. Heisoeh khyvlyis nvng Yhenmuh lyis gyingshang nhang toh das.

²¹Namoq gas, cangxeih vkhyvp, dvci nyei vnyeih lyis Lhuiq Kat Pwe kuot xi das. Hau nyhet nyeih, yuk khanghmuh bicheih ma kat ohlhyoq zo das.

²²Hauh pwe dah cangxeih vnyeih lyis hauh zaulo gas, nyah yaunos yahge dius jens dvnganh dah yaunos xiklyis phudyei das zis noeulu dvdoeu thuq chah.

²³Nyang gas hauh pwe nyhet nyeih top, dvnyeih lyis nos ma bos dah noeulu nyhet doeu, yvnglus nyhet doeu YHENSAIN lhyi doeu gonh gonh ngheq phudyei chah. Nyang dvnyeih dvnyeih yaunos jyungshuk khyvlyis beq lus dvdoeu eq phudyei chah.

²⁴Nyang noeulu yahge yvnglus phudyei lyis dvdoeu xiklyis jyo jyungshuk dvpungh, tsanlun coeu dvjoi dvkhyamh bos chah.

²⁵Nyhet vkhyvp dvci oeng vnyeih lyis xi kuot dah gyung cho Phunk Pwe mha nyhet nyeih top zaulo gas dvnyeih lyis yaunos xiklyis dvyhangteh phudyei chah, dvyhangteh dvnganh ngheq dyei jyungshuk phudyei chah, jyo jyungshuk yahge tsanlun coeu dvyhangteh bos chah.