Read Achang EZEKIEL 46 Bible Online

EZEKIEL 46 - Achang bible

EZEKIEL 46

¹Yomzains YHENSAIN taiq, khyamkhau vkhau puk pheh wvng dah Buisthuq khyam khomh cho ka muh zwi dah khyuk nyeih gyo lyis nyheih toh chah. Nghuot laus eq No nyeih yahge Lhamhmuh canh pwe lyis phank toh chah.

²Guon nyeis zaulo gas khyamkhau nghe puk masyah khyam khomh cho dah wumuk yvp mas wvng las, phudyei bang nyah ngheq phudyei doeu gonh ngheq las, nyenstap jyungshuk phudyei uhlyis, hau khyam khomh zains jens nvm mas yap joq das. Nyang hau khyam khomh mas paiq lho lha doms tauh thuq loh chah. Hau khyam khomh gas nyenhthang jweh shoq ma gis nyheih.

³No nyeih khanghmuh yahge lhamhmuh canh pwe khanghmuh dius jens dvnganh eq khyam khomh xik mas YHENSAIN lhyi gop las paiq chah.

⁴Zau gas, no nyeih lyis YHENSAIN lhyi doeu gonh ngheq phudyei khyvlyis nos ma bos dah yvnglo khyuk doeu, yvnglus dvdoeu chi los chah.

⁵Nyang yvnglus dvdoeu xiklyis jyo jyungshuk dvpungh, yvnglo xiklyis nyang dyei mes nyhoq chi los chah. Jyo jyungshuk dvpungh xiklyis tsanlun coeu dvjoi dvkhyamh chi los chah.

⁶Nyang Lhamhmuh canh Pwe mha nos ma bos dah noeulu kyoh dvdoeu, yvnglo khyuk doeu, yvnglus dvdoeu thyeq chah.

⁷Noeulu dvdoeu xiklyis jyo jyungshuk, yvnglus dvdoeu xiklyis jyo jyungshuk dvpungh pungh nghuot chah. Yvnglo dvdoeu xiklyis gas zaulo dyei mes nyhoq dyei chah. Jyo jyungshuk dvpungh mas tsanlun coeu dvjoi dvkhyamh bos chah.

⁸Zaulo gas khyam khomh cho wumuk yvp masyah thuq las nyang wvng los yvchank yah thuq loh chah.

⁹Dius jens dvpwe pwe mas YHENSAIN lhyi los dye paiq lyis, mautsung khyam khomh cho wvng bang gas mautyi khyam khomh cho thuq chah: mautyi khyam khomh cho wvng bang gas mautsung khyam khomh cho thuq chah. Wvng yvcho hank eq ma gis thuq. Twi twi khyam khomh cho thuq chah.

¹⁰Dius jens los lyis zaulo eq wvng chah. Nyamoq thuq loh lyis nyang eq thuq chah.

¹¹Doengs dah Pwe nyeih gyo lyis jyo jyungshuk gas noeulu dvdoeu nghuot ya yvnglus dvdoeu xiklyis dvpungh nghuot chah. Yvnglo dvdoeu xiklyis gas paiq bang dyei mes nyhoq dyei das. Jyo jyungshuk dvpungh dyei khanghmuh tsanlun coeu dvjoi dvkhyamh dyei chah.

¹²Guon dah zaulo gas YHENSAIN lhyi , dvnganh ngheq dyei jyungshuk nghuot ya, nyenstap jyungshuk yah xihhonh jyungshuk dyei mes lyis nyah xiklyis khyamkhau vkhau puk pheh wvng dah buisthuq khyam khomh phank dyei das. Nyang gas hau jyungshuk lyis No nyeih lyis kuot zis yah dvyhangteh kuot chah. Khyamkhomh gas nyang doms thuq loh thang lhyi nyheih chah.

¹³YHENSAIN taiq, Nvp yau nvp YHENSAIN lhyi jyungshuk khyvlyis zvn dyingh las nos ma bos dah yvnglo dvdoeu, doeu gonh ngheq dyei chah. Haih jyungshuk gas nyeih yau kuot dyei chah.

¹⁴Nvp yau nvp sunghso mons oeng paung yah dvgeh monh nis das zis tsanlun coeu dvjoi dah dvgohyih jyungshuk eq kuot chah. YHENSAIN xiklyis haih jyungshuk dah lyi gas vcaiq caiq ma kuot ma gis nghuot.

¹⁵Yvnglo, monh yahge tsanlun coeu ka YHENSAIN lhyi vcaiq vto nvp yau nvp dyei chah.

¹⁶Yomzains YHENSAIN tying toh: guon nyeis zaulo gas nyang sain dah maunyeis dvchuq chuq nyah lo dvyuk yuk lyis jyungshuk dyei lyis, hauh zis gas nyah yhenbang dah zisyos khyvlyis hau loloeu yah sen.

¹⁷Nghuot laus eq guon zaulo gas nyah maunyeis, nyah muh mas bang dvyuk yuk lyis dyei lyis houka doms toeu dah zvn doms jweh lyis zaulo dah zisyos doms duot das. Houka nyang yah sen, nyang yahge nyah lo jens kyingh vjangh yoh sain.

¹⁸Guon dah zaulo gas, dius jens hank dah zisyos eq ma gis yoeus loh. Nyah lo lyis dyei dah maunyeis gas nyang lyis toeuq dyei toh dah maunyeis mas zis nghuot chah. Housoeh lyis ngah dius jens dah maunyeis yoeus zis yah nyamoq hank lyis eq ma zaiq jus das.

¹⁹Hauh thang lhyi hauh dius yuk gas ngos lyis mautyi pheh khyamkhau vkhau puk dah khyam khomh nvm, mautsung shot xoeu toh dah wumuk yvp jens mas shwih loh. Haih zis gas phudyei bang dah gyingshang yvp tsain nghuot. Nyang gas hau yvp jens dah buiswvng pheh joqyos dvkoeuq lyis tuonh kat.

²⁰Nyang ngos lyis taiq, Haih joqyos gas phudyei bang yaunos jyungshuk khyvlyis dyei dah shoh nghuot ya yobos khyuot jyungshuk khyvlyis dyei dah shoh jyauq las monh jyungshuk piq joqyos nghuot. Dius jens yobos ma bweh das xiklyis gyingshang zis cha eq khyamkhau nghe puk pheh ma gis chithuq loh, ge.

²¹Hauh thang lyis nyang ngos lyis khyamkhau nghe puk pheh shwih loh las khyam nyei thunk dah dvthunk dvthunk mas xing choeu 68 pe, lvm choeu 48 pe bos dah khyamlo dvkoeuq koeuq lyis chixoeuq.

²³Khyamlo khanghmuh yvmlhaink yah luk ciank bos. Ciank lyis nges las nyikhyomp tsain ci toh.[37]

²⁴Hauh dius yuk ngos lyis taiq, Haih zis gas Yhenmuh jyeidwis jens dius jens dyei dah phudyei jyauq dah wom jyauq yhen tsain nghuot, ge.