Read Achang EZEKIEL 48 Bible Online

EZEKIEL 48 - Achang bible

EZEKIEL 48

¹Mautsung shot maukyo ka Mediteranean Thomh masyah buisthuq shot pheh Hetlon wus, Hamat langhwuq, Enon wus, Damasku munghdan yahge Hamat munghdan vjo maukyo tsain nghuot. Dvkoq dvkoq gas buisthuq pheh maukyo mhayah buiswvng pheh Mediteranean Thomh jweh shoq dvm zis dvdyet dyet xauh yoeus. Mautsung mhayah mautyi pheh vzoh yah o mha bang xauh yoeus. Dan Asher Napthali Manase Ephraim Ruben Yuda

⁸Hauh mau dah gohtoeu dvdyet gas lhyenwhei yhung das xiklyis toh toh. Houka mautsung mhayah mautyi pheh 10 main lvm, buisthuq mas zis buiswvng pheh xing choeu ka dvkoq dvkoq lyis dyei dah vdyet yah dvyih yih nghuot. Yhenmuh gas haih vdyet vkhau mha joq das.

⁹Haih vdyet dah vgungs mas 10 main xing lha 8 main lvm dah lhyenwhei joqyos gas YHENSAIN lhyi kyauh toh.

¹⁰Haih gyingshang joqyos mas phudyei bang gvmboms yoh. Nyamoq dah gvmboms gas buisthuq masyah buiswvng pheh 10 main, mautsung mhayah mautyi pheh 4 main keq chah. YHENSAIN dah Yhenmuh gas hauh joqyos vgungs mas joq chah.

¹¹Hai gyingshang dah maunyeis gas, Zadok dah vnyau vshih phudyei bang xiklyis nghuot das. Nyamoq gas kuot shuot loh dah Israel jens yah ma tsoq, Lewi vkoq teh ma kuot, ngos lyis lomluk luk phuqsoe goeus.

¹²Housoeh las nyamoq gas Lewi jens yah sen dah maunyeis nvm, maunyeis lhyenwhei yoh, hauh zis gas gyingshang thank joqyos nghuot das.

¹³Lewi jens eq phudyei bang dah maunyeis dah mautyi pheh lhyenwhei maunyeis dvchuq yoh das. Hou eq buisthuq masyah buiswvng pheh 10 main, mautsung mhayah mautyi pheh 4 main nghuot.

¹⁴Houka YHENSAIN lhyi kyauh dah maunyeis, hauh mau dvnganh mas gis thank vdoeus nghuot. Cha eq ma gis ungh, ma gis thaiq, hank lyis eq ma gis cheh dyei. Houka gyingshang lha YHENSAIN yah sen.

¹⁵Hau lhyenwhei maunyeis mas nyet dah vdoeus 10 main yah 2 main ka ma gyingshang nghuot laus eq houka dius jens yhung das xiklyis nghuot. Nyamoq houmha nyeis las hauh maunyeis yoh yhung. Wus gas hauh vgungs mas nghuot chah.

¹⁶Hauh wus gas dvshot 2,520 gaiq dah soefuqthunk nghuot das.

¹⁷Wus yvmlhaink yah dvshot 140 gaiq lvm dah pa tsain bos das.

¹⁸Wus dye kuot thang lhyi nyet joq dah maunyeis gas gyingshang maunyeis dah mautyi pheh joq. Houka buisthuq pheh 4 main yah 2 main, buiswvng pheh 4 main yah 2 main nghuot. Houka hauh wus mas nyeis bang yos zwi zo das xiklyis yhung das.

¹⁹Hauh wus mas nyeis bang hank laus eq, khah vkoq masyah los laus eq hauh yos mas gis zwi zo.

²⁰Hauh vdyet mas gvm toh, vgungs mas dah maunyeis dvkoeuq gonh gas soefuqthunk nghuot. Dvshot dvshot keq lyis 10 main nghuot las wus kuot dah maunyeis bos das.

²¹Hai Yhenmuh, phudyei bang dah maunyeis, Lewi jens dah maunyeis yahge wus bos dah maunyeis dah buisthuq shot, buiswvng shot nyet dah maunyeis gas guon dah zaulo yah sen. Houka buisthuq pheh buisthuq maukyo jweh las buiswvng pheh gas Thomh muh jweh. Hauh yvlyis mautsung pheh Yuda yah sen dah vdyet, mautyi pheh Benyamin yah sen dah vdyet yah khomp lhaink toh.

²³Hai lhyenwhei vdyet dah mautyi pheh, nyet shih vkoq jens dvkoq dvdyet xauh yoeus das. Houka buisthuq maukyo mhayah buiswvng pheh Mediteranean Thomh jweh shoq shoq nghuot. O mha mautsung mhayah mautyi pheh vzoh yah dyei toh. Benyamin Simon Isakha Zebulun Gad

²⁸Mautyi pheh Gad vkoq lyis dyei dah gvmboms maukyo ka, Tamar masyah buiswvng mautyi pheh Kadesh Meriba jeisdwang pheh loh lho lha, buiswvng mautsung pheh Egutu maukyo chank yah Mediteranean Thomh jweh.

²⁹Yomzains YHENSAIN taiq, Heika Israel vkoq jens sain das nyhenshang maunyeis vdyet gvmgoh das cho nghuot, ge.

³⁰Yerusalem wus mas wvng dah khomh 12 khomh bos. Ciank nyei shot mas dvshot keq lyis 2,520 gaiq bos las houmha khyam khomh somh koeuq bos. Dvkhomh lyis Israel dah nyings dvkoeuq chank las dyei toh. Mautsung pheh ciank mas dah khyam khomh jens lyis Ruben, Yuda yahge Lewi; buisthuq pheh khyam khomh jens lyis Yosep, Benyamin yahge Dan; Mautyi ciank Simon, Isakha yahge Zebulun; Buiswvng pheh Gad, Asher yahge Napthali nghuot.

³⁵Wus nyei shot ciank xing choeu dvnganh lyis 10,080 gaiq nghuot. Gvshih masyah hauh wus nyings gas, YHENSAIN Heimha Nyeis, ge das.