Read Achang EZEKIEL 8 Bible Online

EZEKIEL 8 - Achang bible

EZEKIEL 8

¹Ngamoq jonsdoeus loh zis khyuk vzvn, khyuk vkhyvp, oeng vnyeih lyis Yuda jonsdoeus loh bang dah uhshe bang gas ngah yhen mha ngos yah dvgeh tsung toh. YHENSAIN dah yomsoq gas ngah thoq mas nyetlos nyettant jweh los.

²Ngos yoeuh kat lyis, nyi teh dah dius vzwvng dvkoeuq nyvng. Nyah gungs thyikdom masyah o pheh gas nyi teh doeus, thyikdom masyah thoq pheh gas thunk buot toh zis teh bvng joq.

³Nyang loq teh zis yhonh kat las ngah cam lyis tsop toh. Hauh thang lhyi haih nyoqnyvng mas Mangso dah Dyos gas ngos lyis nyhang dah lyeis mas toqh kat las Yerusalem mas shwih loh. Nyang ngos lyis mautsung pheh Yhenmuh khyam khomh chank yah, vkhau pheh wvng das khyam khomh mas shwih loh. Houmha Mangso yoeuh nhaiqyo dah phvra dvkoeuq joq.

⁴Houmha Israel dah Mangso phunk lyis nyvng. Hauh zis ngos Kheba lvng yvm mas nyeis lyis nyvng ku zis yah dvyhangteh nghuot.

⁵Mangso ngos lyis taiq, Lvcang eh, mautsung pheh yoeuh kat aq, ge. Ngos yoeuh kat lyis, wvng khyam khomh cho yvm mas dah phon nvm mas hau Mangso yoeuh nhaiqyo dah phvra joq yvlyis nyvng.

⁶Mangso ngos lyis taiq, Lvcang eh, cha mus nyeis zis nvng vnyvng lah? Heimha Israel dius jens kuot nyeis dah vchoqh vlhauq lyis yoeuh aq. Ngos lyis ngah gyingshang joqyos masyah zes zes we loh shoq khat nyeis. Nvng haih thoq lyis nyoqnho ngelang zes gyoh phoh yvlyis nyvng das.

⁷Nyang ngos lyis vkhau pheh wvng los khomh mas shwih loh las, ciank mas dwang dvkoeuq lyis chixoeuq.

⁸Nyang taiq, Lvcang eh, heimha ciank lyis thyoq phank aq, ge. Ngos thyoq phank lyis khomh dvkoeuq nyvng.

⁹Nyang ngos lyis taiq, Wvng loh aq, houmha nyamoq kuot nyeis dah ma gis cho, vchoqh vlhauq lyis yoeuh aq, ge.

¹⁰Housoeh las ngos wvng las yoeuh. Hau ciank mas du shweh loh ja dvnganh, gohtoeu choqh phoh dah gaunyhauq yahge Israel jens paiq nyeis dah gohtoeu phvra lho khyet tap toh.

¹¹Houmha Israel uhshe bang nyhetci nyeis, Shephan lo Yazania eq bos. Dvyuk dvyuk xangh bvn chi lha hau xangh masyah nyikhauh thuq nyeis.

¹²Mangso ngos lyis nyei zis gas, Lvcang eh, Israel uhshe bang cha gauh kuot nyeis zis vnyvng lah? Nyamoq dvnganh gas nyang yuk nyang toeu dah gungslho lhyi tsain paiq nyeis. Nyamoq dah jyampgus gas, YHENSAIN yang lyis ma nyvng. Nyang hauh mau lyis she tyamp toh goeus, ge.

¹³Hauh thang lhyi YHENSAIN ngos lyis taiq. Nvng nyamoq hauh thoq lyis zes vchoqh vlhauq zis kuot yvlyis nyvng das.

¹⁴Housoeh nyang ngos lyis Yhenmuh dah mautsung khomh pheh shwih loh las vmesbih jens Tamuz mangso shei lha ngaus nyeis yvlyis chixoeuq.

¹⁵Nyang nyei zis gas, Lvcang eh, nvng hauh zis vnyvng lah? Nvng hauh thoq lyis zes choqh phoh zis yangh nyvng das, ge.

¹⁶Housoeh las nyang ngos lyis Yhenmuh khyam khau mha shwih loh. Gyingshang joqyos mas wvng loh khomh nvm, phon yahge wumuk jo mha yukgis aiqci oeng yuk ko nyeis. Nyamoq gas gyingshang joqyos lyis nungs phuk zis yah buisthuq pheh xoeu lha buis thuq los yvlyis tsain paiq gop joq.

¹⁷YHENSAIN ngos lyis taiq: Lvcang eh, nvng hauh zis vnyvng lah? Hai Yuda dius jens gas heimha nvng nyvng dah vchoqh vlhauq kuot dah muh yahge mau gonh lyis lhuot zo zis yah dyingh nhang zis yah kyingh nhaiq ma tap. Nyamoq hai Yhenmuh mas los kuot dah vchoqh vlhauq muh yah ngos lyis nhaiq zes yo nhang. Nyamoq ngos lyis yoh ya yoh kuot khyvlyis ngos lyis ma phauh gis kuot.

¹⁸Nyamoq ngah nhaiqyo zis xauh chah. Ngos nyamoq lyis ma lhaiq toh das, nhaiqnyen cho ma chixoeuq das. Nyamoq kha iq kaiq dung laus eq ngos ma gyo dyei das, ge.