Read Achang EZEKIEL 9 Bible Online

EZEKIEL 9 - Achang bible

EZEKIEL 9

¹Hauh thang lhyi ngos Mangso kaiq zis xauhgyo. Hau wus lyis joeng das bang eh, los geh. Namoq dah kyonhkhyi chi lha los geh, ge.

²Yhenmuh mautsung thoq khyam khomh masyah dius khyuk yuk lvnyap thuq los. Yuk khanghmuh kyonhkhyi chi toh. Dyiyhwiq wuot, lhaih dah vyhang chi toh soeu dvyuk nyamoq yah bos los. Nyamoq dvnganh wvng los las thunk phon yvm mas yap joq.

³Hauh uhlyis Israel Mangso phunk gas nyang nyeis dah Kherubim masyah toq las Yhenmuh khomh mas ywi loh. YHENSAIN ka dyiyhwiq wuot soeu lhyi lui.

⁴Yerusalem dvwus gonh loh las, wus mas bweh dah vchoqh vlhauq muh gvng mas noskyingh, ngaus bang yuk khanghmuh dah ngelang mas khyet comh toh aq, ge.

⁵Mangso ka gohyhamh bang lyis, Wus chank yah nyah thang chank las sat geh, hank lyis eq vlhaiq toh, hank lyis eq nhaiq vnyen goh, ge taiq zis ngos xauhgyo.

⁶Lokhoq jens, loloeu lonyi jens, ungwes moq yahge loshang jens lyis sat geh, nghuot laus eq ngelang mas khyet comh toh soeu hank lyis laus eq vzangh goh. Hauh zis hai ngah Yhenmuh masyah xi geh, ge. Housoeh las nyamoq gas Yhenmuh mas yap joq dah uhshe bang masyah xi.

⁷Mangso nyamoq lyis taiq, Yhenmuh lhyi vwot v-oeu kuot geh, khyam mha mvng yah tyink geh, loh kuot geh, ge. Housoeh las nyamoq wus mas dius tsain sat xi.

⁸Nyamoq sat loh nyeis lyis houmha ngos kyingh dvnyeis. Ngos nyeisjvng mas gop las kaiq zis gas, Yomzains YHENSAIN eh, nvng gas Yerusalem lyis nhaiqyo las nyet shih dah Israel jens yuk khanghmuh lyis sat lhyeh, oen.

⁹Mangso phuk taiq zis gas, Israel yahge Yuda dius jens gas gyukphoh yaunos kuot goeus. Nyamoq dvmau gonh dius sat zis yah lyilhyweq las Yerusalem mas dius sat yobos yah dyingh joq. Nyamoq gas, YHENSAIN nyamoq dah mau lyis she tyamp toh goeus las ngos nyamoq lyis ma nyvng lo, ge.

¹⁰Housoeh las ngos nyamoq lyis nhaiq ma nyen; nyamoq gohyhamh lyis kuot vgus, ngos nyamoq lyis kuot das.

¹¹Hauh thang lhyi dyiyhwiq wuot soeu tauh los las YHENSAIN lhyi, Ngos nah vmingh vgus kuot goeus, ge.