Read Achang DANIEL 1 Bible Online

DANIEL 1 - Achang bible

DANIEL 1

¹Yehoiakim Yuda hwankti kuot dah somh vzvn lyis Babilon hwankti Nebukhaneza gas Yerusalem lyis los zan las hauh wus lyis lhaink toh.

²YHENSAIN ka nyang lyis hwankti Yehoiakim yahge Yhenmuh zisyos dvkhamh lyis jons loh nhang. Nyang gas thung dius dvyhamh lyis eq Babilon pheh shwih loh. Hau jons loh dah zisyos lyis nyah mangso yhenmuh zisyos toh yvp mas tsain kat toh.

³Hwankti nyah Unuk dah vgyis Ashphena lyis zaudang khyoq zis gas, Jonsdoeus los dah Israel loyvm jens dvyhamh, hwankti yhen mha bang, zau yhen mha bang khyen los aq.

⁴Nyamoq gas yungh, yik, vlhomuh pot toh bang, lvnyap seq lwis bang, gungs mas nos ma bos bang nghuot chah. Housoeh lyis nyamoq gas hwankti yhen mha phuqsoe mon bang bweh das. Ashpena gas nyamoq lyis Babilon nyingh nghap jyauh lhaih jyauh soeu nghuot.

⁵Hwankti zaudang khyoq shih zis gas, nyamoq lyis nyeih khanghmuh hwankti yhen khyam mha bang yah dvyhangteh dah zonoms yahge zvbiq dyei chah. Hai pot cho somh zvn thang lhyi nyamoq lyis hwankti xikkhonh mas shwih thuq xoeuq das, ge.

⁶Hauh bang mas khyen zis xauh bang gas Daniel, Hanania, Mishael yahge Azaria moq nghuot. Hauh bang dvnganh gas Yuda vkoq mas zis nghuot.

⁷Unuk vgyis gas nyamoq lyis Belteshaza, Shadrak, Meshak, Abenego ge nyings saiq tsain dyei.

⁸Daniel gas hwankti yhen khyam mha zonoms yahge zvbiq zo shuk zis yah nyah gungs lyis ma lhoq ma shang ma mus nhang das ge nghamh thyet toh. Housoeh las nyang Ashpena lyis nyang lyis pangh das zis sang.

⁹Mangso ka Ashpena lyis Daniel thoq mas nhaiqnyen shohgyo das cho kuot dyei.

¹⁰Nghuot laus eq Ashpena gas hwankti lhyi gyuk las, Daniel lyis taiq zis gas, Hwankti ka namoq zo shuk das xiklyis nghamh thyet toh. Namoq gas gohtoeu loyvm jens teh ma nghuot zis nyvng lyis, nyang ngos lyis sat das, ge.

¹¹Housoeh las Daniel gas, nyang yahge nyah dyenschangh somh yuk moq lyis yoeuh das xiklyis Ashpena toeuq toh dyei dah zungh soeu jyank mas loh.

¹²Nyang taiq, Ngamoq zo shuk das zis anghphoq yahge jeis dyei lha dvci nyeih shi yoeuh aq.

¹³Hauh thang lhyi ngamoq yah hwankti yhen khyam mas zis zo dah loyvm jens lyis byi yoeuh aq: ngamoq lyis nvng nyvng vgus kuot aq, ge.

¹⁴Nyang gas hauh bang lyis dvci nyeih shi yoeuh nhang das zis xamxonh.

¹⁵Shishenh dye lyis nyamoq gas hwankti wom zo bang dvnganhmoq thoq lyis zes yanghzan, zes yombos joq.

¹⁶Housoeh las hou mhayah hau zungh soeu ka, hwankti dyei dah zonoms gungsthaiq nyamoq lyis anghphoq tsoq las zo loh nhang.

¹⁷Mangso ka hauh loyvm nyei yuk lyis seq cho, maussauh mas lyes cho yahge xuq yvmas seqgyo cho vja ja bos nhang. Hauh thoq lyis nyang Daniel lyis nyoqnyvng yahge yhetmoq vja ja seq pho dah joeui dyei.

¹⁸Hwankti toh dyei dah shishenh somh zvn thank lyis Ashpena gas hauh loyvm jens dvnganh lyis Nebukhaneza jyank mas shwih loh.

¹⁹Hwankti ka nyamoq dvnganhmoq yah jisgoh.Dvnganhmoq mas Daniel, Hanania, Mishael, Azaria moq yah doeus soeu hank eq ma bos zis nyvng. Housoeh las nyamoq gas hwankti dah muh mas wvng los.

²⁰Hwankti nyei dah nyeidang cha nghuot laus eq, chah soe toqh kat laus eq haih loyvm nyei yuk gas nyah munghdan mas bot thyet bang, hweq kat bang thoq lyis dvci huon zes seq.

²¹Daniel gas Pasha hwankti zainsmuh Kuru Babilon lyis ung lha hwankti doq shoq hwankti khyam mha nyeis.